மறக்க வேண்டியதும்... மறக்கக் கூடாததும்...

அனைவருக்கும் வணக்கம்... திருக்குறளுக்கு முதன்முதலில் உரை எழுதிய மணக்குடவர் முதல் பரிமேலழகர் வரை... அவ்வளவு ஏன், இன்றைக்கு வரைக்கும் உரை எழுதியவர்கள் அனைவரும், ஒரு சொல்லுக்கு மறதி என்றே எழுதி உள்ளார்கள்... ஆனால் ஒருவர் :-


முந்தைய பதிவுகள்:
→என்னது மறதியா...?←
→மிதப்பின்மை (பகுதி 1)←
→மிதப்பின்மை (பகுதி 2)←
ஓர் இலக்கை நினைத்துக்கொண்டு அயராது அந்த வேலையைச் செய்துகொண்டு இருப்போம்... இடையில் நாம் நினைத்தது போல் நடக்கவில்லை என்றாலும் கிட்டத்தட்ட முடித்த வேலை, மனதிற்கு மகிழ்வைத் தந்தவுடன், அந்த வேலையை நிறுத்திவிடுவோம்... சிலநேரம் ஆர்வத்தின் காரணமாக அந்த இலக்கையும் அடைவதுண்டு... அடியேன், "தாத்தா எழுத்துக்களில் செய்யாத கணக்கியல் நுட்பமா...?" என்று நினைப்பேன்...! வெற்றிக்கு எல்லையில்லை... ஆனால் தோல்வி கிடைத்ததில்லை...! அப்படித்தான் "பாடும் நிலாவே" கேட்பொலியில், வானிலிருந்து வரும் நுட்பத்தைச் செய்வதற்கு முன், வழியில் நடந்து செல்லும் போது சில நுட்பங்களைக் கடந்து செல்ல நேரிட்ட போது, கிடைத்த ஒரு நுட்பத்தை இந்தப் பதிவில் பயன்படுத்தியுள்ளேன்...! நாட்களானால் நுட்பம் மறந்து விடும் என்பதற்கல்ல; நுட்பத்தைப் பயன்படுத்தவில்லை என்றால் மறந்து விடலாம்...!

கீழே ⑯ குறள்களின் எண் வரிசைப்படி உள்ள சுருக்கமான குறளின் குரலை வாசித்துவிட்டு, தங்க நிற வண்ணப்பெட்டியில் தேர்வு (Tick) செய்யலாம் அல்லது அந்த வரியில் எங்குச் சொடுக்கினாலும் தேர்வு ஆகி விடும்...! ⑩-திற்குப் பின் காமத்துப்பாலில் ⑪ & ⑯ - இவை இரண்டும் 'ஆண்களுக்கு அல்லவா?' என்று எண்ணுவது பொருளற்றது...! அன்பைப் பகிர்வதில் உணர்வும் உணர்ச்சியும் ஒன்றென்பதால், ஆண் பெண் என்கிற பேதம் கிடையாது...! "உள்ளம் இரண்டும் ஒன்று - நம் உருவம் தானே இரண்டு...?" மேலும், "நெஞ்சம் மறப்பதில்லை, அது நினைவை இழப்பதில்லை..." அல்லவா...?! அதனால் சில சொற்களை மாற்றி வாசிப்பதோடு, ஒரு தகவல் :- தோழி என வெளிப்படையாகத் தோழியை நோக்கி, காதல் தலைவி கூறுவதாக உள்ள குறள்கள் : 1262, 1284 மட்டுமே...! √ தொடருவோமா...? முடிவை முடிவில் காண்க... நன்றி...

---

மறக்க வேண்டியதும்... மறக்கக் கூடாததும்...

---

   ① அறம் செய்வதிலும் மேற்பட்ட ஆக்கம் இல்லை; அதை மறப்பதிலும் மிக்கக் கேடு இல்லை...    ② குற்றமற்றவரின் நட்பை மறக்காதே; துன்பத்தில் துணையாக இருந்தவரின் நட்பை இழக்காதே...    ③ மறக்கக்கூடாதது பிறர் செய்த நன்மையை; மறக்க வேண்டியது அப்பொழுதே அவர் செய்த தீமையை...    ④ கற்றதை மறந்தால் மீண்டும் கற்கலாம்; ஒழுக்கம் தவறினால் கற்றவன் வாழ்வு கெடும்...    ⑤ பிறர் செய்த குற்றத்தை எப்போதும் பொறுத்துக் கொள்க; அதைவிட அப்பொழுதே மறத்தல் நல்லது...    ⑥ பிறர்க்குத் தீமை தரும் செயலை மறந்தும் நினைக்காதே; நினைத்தால் உனக்குத் தீமை தரும் செயலை அறம் எண்ணும்...    ⑦ துறந்தவர்கட்கு உதவுதலை விரும்புவது சரியே; அதனால் துறவாத மற்றவர்கள் தவம் செய்வதை மறக்கக்கூடாது...    ⑧ யாரிடத்திலும் கோபம் கொள்வதை மறந்து விடு; மறக்கவில்லையென்றால் எல்லா தீமையும் வரும்...    ⑨ ஆட்சியாளர் குடிமக்களைக் காக்காவிடின் தொழில்களால் ஆகும் பயன் குறையும்; அவரவர் தொழில் அறிவும் மங்கும்...    ⑩ காலந்தாழ்வு, மறதி, சோம்பல், உறக்கம் இவை நான்கும் கெட்டழிபவர் விரும்பும் அணிகலன்கள்...    ⑪ போராடும் கண்களை உடையவளின் குணத்தை நான் மறந்தால்தானே நினைப்பதற்கு...?    ⑫ என்னவரை நினைத்தாலும் உள்ளத்தைப் பிரிவுத் துன்பம் சுடும்போது, மறந்தால் வாழ்வேது...?    ⑬ தோழி, இன்று என்னவரை மறந்தால் என் மெல்லிய தோள்கள் அழகு இழக்கும்; அணிகலன்களும் நீங்கும்...!    ⑭ தோழி, பிரிவுத் துயரத்தால் சண்டையிடச் சென்றால், மறந்த என் நெஞ்சோ அவரருகிலேயே இரு என்கிறது...!    ⑮ என்னவர் மறந்தும், மறக்காத என் மடமையுடைய நெஞ்சத்தால், உயிரினும் சிறந்த நாணத்தை மறந்தேன்...!    ⑯ பிரிவின்போது உன்னை நினைத்தேன் என்றேன்; அப்படியென்றால் ஏன் மறந்தீர் என்றாள் என்னவள்...!

---

  ①  4. அறன்வலியுறுத்தல் : 32. அறத்தினூஉங்கு ஆக்கமும் இல்லை அதனை மறத்தலின் ஊங்கில்லை கேடு   ②  11. செய்ந்நன்றியறிதல் : 106. மறவற்க மாசற்றார் கேண்மை துறவற்க துன்பத்துள் துப்பாயார் நட்பு   ③  11. செய்ந்நன்றியறிதல் : 108. நன்றி மறப்பது நன்றன்று நன்றல்லது அன்றே மறப்பது நன்று   ④  14. ஒழுக்கமுடைமை : 134. மறப்பினும் ஓத்துக் கொளலாகும் பார்ப்பான் பிறப்பொழுக்கங் குன்றக் கெடும்   ⑤  16. பொறையுடைமை : 152. பொறுத்தல் இறப்பினை என்றும் அதனை மறத்தல் அதனினும் நன்று   ⑥  21. தீவினையச்சம் : 204. மறந்தும் பிறன்கேடு சூழற்க சூழின் அறஞ்சூழும் சூழ்ந்தவன் கேடு   ⑦  27. தவம் : 263. துறந்தார்க்குத் துப்புரவு வேண்டி மறந்தார்கொல் மற்றை யவர்கள் தவம்   ⑧  31. வெகுளாமை : 303. மறத்தல் வெகுளியை யார்மாட்டும் தீய பிறத்தல் அதனான் வரும்   ⑨  56. கொடுங்கோன்மை : 560. ஆபயன் குன்றும் அறுதொழிலோர் நூல்மறப்பர் காவலன் காவான் எனின்   ⑩  61. மடியின்மை : 605. நெடுநீர் மறவி மடிதுயில் நான்கும் கெடுநீரார் காமக் கலன்   ⑪  113. காதற்சிறப்புரைத்தல் : 1125. உள்ளுவன் மன்யான் மறப்பின் மறப்பறியேன் ஒள்ளமர்க் கண்ணாள் குணம்   ⑫  121. நினைந்தவர்புலம்பல் : 1207. மறப்பின் எவனாவன் மற்கொல் மறப்பறியேன் உள்ளினும் உள்ளம் சுடும்   ⑬  127. அவர்வயின்விதும்பல் : 1262. இலங்கிழாய் இன்று மறப்பின்என் தோள்மேல் கலங்கழியும் காரிகை நீத்து   ⑭  129. புணர்ச்சிவிதும்பல் : 1284. ஊடற்கண் சென்றேன்மன் தோழி அதுமறந்து கூடற்கண் சென்றதுஎன் னெஞ்சு   ⑮  130. நெஞ்சோடுபுலத்தல் : 1297. நாணும் மறந்தேன் அவர்மறக் கல்லாஎன் மாணா மடநெஞ்சிற் பட்டு   ⑯  132. புலவி நுணுக்கம் : 1316. உள்ளினேன் என்றேன்மற் றென்மறந்தீர் என்றென்னைப் புல்லாள் புலத்தக் கனள்

---

⑪↭⑯ இவற்றில் முழு மதிப்பெண் என்று நினைக்கிறேன்......! மீதம் பத்தில், ஏழில் தேறுவேன் போல...!

---

சரி, வாங்க இன்றைய பதிவிற்கு செல்வோம்...! பொச்சாவாமை அதிகார குறள்கள் அனைத்தும் மறதியைக் குறிப்பதில்லை... முப்பால் முழுவதிலும், "எவற்றையெல்லாம் மறக்க வேண்டியது...? எவற்றையெல்லாம் மறக்கக்கூடாதது...?" என்று ஐயன் சொல்லியுள்ளதைத் தொகுத்தேன்... கூடுதலாக நம் கணக்கியலான முதல் + கடை கணக்கையும் செய்து, திருக்குறள் எண்ணான 7 வருவதையும் கண்டேன்...! நீங்களும் செய்து பார்க்கும்போது, அடையும் பெருமிதத்திற்கு எல்லையிருக்காது... வாழ்நாள் இருக்கும்வரை மறக்கவும் செய்யாது... இதேபோல் "பொச்சாப்பு" என்பதையும், முப்பால் முழுக்க தேடி கணக்கியல் செய்யலாம்...! அப்புறம் வாசிப்பவர்களும் மறக்காமல், தான் பெற்ற மதிப்பெண்களைக் கருத்துரையில் விருப்பமிருந்தால் சொல்லலாம்... நன்றி...

எழுத்துக்களின் கணக்கியலைச் செய்ய வைத்த காரணங்கள் பல உண்டு... அவற்றில் இந்த பொச்சாவாமை அதிகாரம் மற்றும் இதன் குறள்கள் பற்றிய பலரின் புரிதல்கள் ஒரு காரணமாகும்...

---

புதிய பதிவுகளை பெறுதல் :

---

தொடர்புடைய எண்ணங்களின் வண்ணங்கள் சில :

முகநூல் மூலம் கருத்துக்களை பகிர :