முத்துப்பல் சிரிப்பென்னவோ...

முந்தைய பதிவுகள் :
அறத்துப்பால் : ① சிரிக்க சிரிக்க... ② மானிட லீலை...!

பொருட்பால் : ③ துன்பம் நேர்கையில்... ④ கிசுகிசு...! ⑤ அகநக... ⑥ நகைவகையர்...

⑦ உலகம் சிரிக்கிறது...! ⑧ நற்குடிப் பிறப்பு... ⑨ இருட்டினில் வாழும் இதயங்களே...

காமத்துப்பால் : ⑩ மெல்ல நகும்...


114. நாணுத்துறவுரைத்தல் : 1140. யாம்கண்ணின் காண நகுப அறிவில்லார் யாம்பட்ட தாம்படா வாறு
பைத்தியக்காரத்தனமாக ஒருவன் நடந்து கொண்டால் அவனைப் பார்த்து ஏளனமாகச் சிரிப்பது மற்றவர் இயல்பு... இங்கு காதலன் மடலேறி வருவதைப் பார்க்கும் மக்கள் அவனை அறிவு திரிந்த ஒருவனை நோக்குவதுபோல் பார்த்துச் சிரிக்கின்றனர்... "சிரிப்பவர்கள் சிரிக்கட்டும், என்வலி எனக்குத் தானே தெரியும்...! நான் பட்ட இந்தக்காதல் துன்பத்தை அவர்களும் அடையாததால்தான், அறிவில்லாதவர் என் எதிர் நின்றே சிரிக்கின்றனர்" என்று சினம் மேலிடக் காதலன் கூறுகிறான்...

இன்று நேற்று வந்ததெல்லாம், நாளை மாறலாம்... நீரில் தோன்றும் நிழல்களைப்போலே, நிலையில்லாமல் போகலாம்... நான் பார்த்து ஒன்றாகக் காணலாம், நீ பார்த்து வேறாக மாறலாம்... தெரிவது ஒன்று - புரிவது ஒன்று, மெய் அன்பு பொய்யென்று தோன்றும் போது - யார் சிரித்தால் என்ன...? இங்கு யார் அழுதால் என்ன...? தெரிவது என்றும் தெரிய வரும், மறைவது என்றும் மறைந்து விடும் :-



⟪ © இதயத்தில் நீ ✍ வாலி ♫ M.S.விஸ்வநாதன் 🎤 P.B.ஸ்ரீனிவாஸ் @ 1963 ⟫

---

118. கண்விதுப்பழி(த்)தல் : 1173. கதுமெனத் தாநோக்கித் தாமே கலுழும் இதுநகத் தக்க துடைத்து
தொழில் தொடர்பாகச் சென்றுள்ள கணவரின் பிரிவினால் ஏக்கமுறும் மனைவி கணவரைக் கண்ணால் காணமுடியவில்லையே என்று துயருறுகிறாள்... அவரை நினைக்க நினைக்க. அடக்கமுடியாமல் கண்ணீர் பெருகுகிறது... விரைந்து அவரைக் காணும் துடிப்பினால் அரற்றுகிறாள்... 'மாய்ந்து மாய்ந்து தலைவனைப் பார்த்து மகிழ்ந்ததும் இதே கண்கள்தான்; அவனைக் காணாமல் கண்ணீர் மல்குவதும் இதே கண்கள் தாமே என எண்ணுகிறாள்... கண்ணீர் உகுக்கும் கண்மேல் அவள் சினம் திரும்புகிறது... "நீ தான் என் துயரத்துக்கெல்லாம் காரணம்; அன்றைக்கு அவரை வேகமாகப் பார்த்துத் தீரா அன்பு கொண்டுவிட்டதால்தானே இன்றைக்குப் பிரிவினைத் தாங்கமுடியாமல் அழுகிறாய்?" என்று அவள் தன் கண்ணைக் கடிந்து கொண்டு "இதை எண்ணினால் சிரிப்புதான் வருகிறது" என்று கண்களைப் பழிப்பது போன்று நொந்து கொள்கிறாள்...

கண்ணாற கண்டகாட்சி, கானல் நீராய் மாறிப்போமோ...? என் உள்ளம் கொண்ட இன்பம், என்னை விட்டு நீங்கிபோமோ...? கண்ணீரே சொந்தமாகும், காலம் வந்து சேருமோ...? கலையாத துயர் மேகம், என் வாழ்வில் என்றும் சூழுமோ...? எந்நாளும் வாழ்விலே - கண்ணான காதலே... என்னென்ன மாற்றமெல்லாம் காட்டுகின்றாய் - ஆசை நெஞ்சிலே...



⟪ © விடிவெள்ளி ✍ அ.மருதகாசி ♫ A.M.ராஜா 🎤 P.சுசீலா @ 1960 ⟫

---

128. குறிப்பறிவுறுத்தல் : 1274. முகைமொக்குள் உள்ளது நாற்றம்போல் பேதை நகைமொக்குள் உள்ளதொன் றுண்டு
அரும்பிலிருந்து மலராகி உதிர்வது வரை உள்ள பதிமூன்று படிநிலைகள் : (1) அரும்பு – அரும்பும் நிலை, (2) நனை – அரும்பு வெளித்தெரியும் நிலை, (3) முகை – முத்துப்போன்ற வளர்ச்சி நிலை, (4) மொக்குள் – நாற்றத்தின் உள்ளடக்க நிலை, (5) முகிழ் – மணத்துடன் முகிழ்த்தல், (6) மொட்டு – கண்ணுக்குத் தெரியும் மொட்டு, (7) போது – மொட்டு மலரும்பொழுது காணப்படும் புடைநிலை, (8) மலர்- மலரும் பூ, (9) பூ – பூத்த மலர், (10) வீ – உதிரும் பூ, (11) பொதும்பர் – பூக்கள் பலவாகக் குலுங்கும் நிலை, (12) பொம்மல் – உதிர்ந்து கிடக்கும் புதுப் பூக்கள், (13) செம்மல் – உதிர்ந்த பூ பழம்பூவாய்ச் செந்நிறம்பெற்றழுகும்நிலை

ஊருக்கு கணவன் திரும்ப வந்தபின் மனைவியின் எண்ணத்தில் காதல் விம்மி நிற்கிறது... உள்ளம் முழுக்க மகிழ்ச்சி இருந்தாலும் அதை முழுவதுமாக வெளிக்காட்டாமல் புன்னகை மட்டும் காட்டுகிறாள்... அது நகைமொக்குள் என்று அழைக்கப்பட்டு அரும்பு மணத்துடன் முகிழ்ப்பதற்கு முன்னால் உள்ள நிலையுடன் ஒப்பிடப்பட்டது... மலரப் போகின்ற மொட்டில் இருக்கும் மணம்போல மனைவியின் நகைமுகிழ்ப்பில் ஒரு குறிப்பு உண்டு...!

செவ்வல்லி கை தொட்டு - சிலை வண்ண மெய் தொட்டு - சந்தித்த இன்பங்கள் நூறல்லவோ... கண்ணா உன் தோள் தொட்டு - கதை சொல்லும் நாள் தொட்டு - காணாத ஆனந்தம் வேறல்லவோ... முத்தங்கள் இட சொல்லவோ - சத்தங்கள் வரும் அல்லவோ... இந்த மோகம் யார் தந்ததோ... முத்துப்பல் சிரிப்பென்னவோ... முல்லைப்பூ விரிப்பல்லவோ... தங்கப்பாளம் போல் உந்தன் அங்கமோ...



⟪ © பூக்காரி ✍ பஞ்சு அருணாச்சலம் ♫ M.S.விஸ்வநாதன் 🎤 T.M.சௌந்தரராஜன், P.சுசீலா @ 1973 ⟫

---

நகை முற்றும்... கருத்திட்ட அனைவருக்கும் நன்றிகள் பல...

---

புதிய பதிவுகளை பெறுதல் :

---

தொடர்புடைய எண்ணங்களின் வண்ணங்கள் சில :

முகநூல் மூலம் கருத்துக்களை பகிர :