இருட்டினில் வாழும் இதயங்களே...

முந்தைய பதிவுகள் : ① சிரிக்க சிரிக்க... ② மானிட லீலை...! ③ துன்பம் நேர்கையில்... ④ கிசுகிசு...! ⑤ அகநக... ⑥ நகைவகையர்... ⑦ உலகம் சிரிக்கிறது...! ⑧ உறவும் பகையும் உண்டு...


100. பண்புடைமை : 999. நகல்வல்லர் அல்லார்க்கு மாயிரு ஞாலம் பகலும்பாற் பட்டன்று இருள்
நகல்வல்லர் யார்...? சிரித்து மகிழ்தல் என்பது மக்களாகப் பிறந்த அனைவருக்கும் இயல்பாகவே இருக்க வேண்டிய சிறந்த குணங்களில் ஒன்று... ஆனால் பழகும் மனிதர்களுடன் கூடி மகிழ்ச்சியாகப் பழகுவதற்குள்ள திறனைப் பயிற்சியாலும் வளர்த்துக்கொள்ளலாம்... அதே சமயம் மற்றவர்கள் நம்மைப்பற்றி வேடிக்கையாக ஏதாவது பேசிச் சிரித்தாலும் முகஞ்சாய்த்துப் போகாமல் அதை நல்ல முறையில் எடுத்துக் கொண்டு பொறுத்துக் கொள்வதற்கும் ஒரு வல்லமை வேண்டும்... இப்பண்புகள் கொண்டவர் தான் நகல்வல்லர்...

"தான் உண்டு; தனது வேலை உண்டு" என்று யாருடனும் மனம் திறந்து பேசாமல் பேதைமையாக வாழ்தல்.. "சுற்றில் நடப்பது எதையும் கண்டுகொள்ளக்கூடாது" என்று அக்கறையின்மையால் அக்கம்பக்கம் குடியிருப்பவரைக் கூட தெரியாமல், தன்னைப் பற்றியும் ஊருக்குத் தெரியாது என வாழும் அறிவிலிகள்... "நமக்கு எதுக்கு வம்பு...? இருக்கிற இடம் தெரியாமல் வாழ்ந்துட்டு போயிடணும்" என்று தனிமையிலேயே பொழுதைக் கழிக்க முயலும் மூடர்கள்... கவியரசர் :- பனி மலையில் தவமிருக்கும் மாமுனியும், கொடி படையுடனே பவனி வரும் காவலரும், கவிதையிலே நிலை மறக்கும் பாவலரும், கவிதையிலே நிலை மறக்கும் பாவலரும், இந்த அவனியெல்லாம் போற்றும் ஆண்டவனாயினும் :- தனிமையிலே இனிமை காண முடியுமா...? அதனால் இவர்கள் உலகநடை முறை வாழ்க்கைக்குத் தகுதி அற்றவர்கள்... பிறருடன் கலந்து மகிழ்கின்றபோதுதான் உள்ளம் பண்புறும் என்பதை உணராதவர்கள்... எவரைப் பார்த்தாலும் பகைவர்போல் பாராதது போல ஒதுங்கிப் போவதும் கடுகடுத்த முகத்துடன் உறுமி முறைத்துப் பார்த்தும் செல்வார்கள்... உலகமறியா, உள்மகிழ்ந்து வாழும் பண்பில்லாத இவர்களுக்குப் பகற்பொழுதும் இருளிலேயே வாழ்பவர்கள் என்கிறார் ஐயன்...

இருட்டினில் வாழும் இதயங்களே - கொஞ்சம் வெளிச்சத்தில் வாருங்கள்... நல்லவர் உலகம் எப்படி இருக்கும் - என்பதை பாருங்கள்... எத்தனை காலம் மனிதன் வாழ்ந்தான் என்பது கேள்வி இல்லை -
"அவன் எப்படி வாழ்ந்தான்...?"
என்பதை உணர்ந்தால் - வாழ்க்கையில் தோல்வியில்லை²



⟪ © நான் ஆணையிட்டால் ✍ வாலி ♫ M.S.விஸ்வநாதன் 🎤 T.M.சௌந்தரராஜன் @ 1966 ⟫

---

104. உழவு : 1040. இலமென்று அசைஇ இருப்பாரைக் காணின் நிலமென்னும் நல்லாள் நகும்
உடல் உழைப்பைக் கொடுக்க ஆயத்தமாய் இருந்தால், எவரும் உழவுத் தொழிலை மேற்கொண்டு பயன் பெறலாம்... அள்ளிக் கொடுக்கும் நிலம் இருந்தும் செயற்படாத சோம்பரைக் கண்டு, "நல்வாய்ப்பைப் பயன்படுத்திக்கொள்ள இயலாதவனாக இருக்கிறானே..." என்று நிலம் என்னும் நல்லாள் ஏளனத்துடன் நகுமாம்... எத்தொழிலும் நாட்டமின்றி "தனக்கு ஒன்றுமில்லையே" என்று சுற்றித் திரியும் சோம்பேறிகளை நோக்கி, "வேளாண் தொழிலில் உழைத்து வாழ்..." எனச் சொல்கிறார் ஐயன்... உழவு என்பது கடுமையான உடல் உழைப்பு; நெற்றி வியர்வை நிலத்தில் சிந்த உழைக்க வேண்டும்... ஆனாலும் வேளாண் முயற்சி சிறந்த பயன் அளிக்கும்... நறுந்தொகை - வெற்றிவேற்கை - 68. "வித்தும் ஏரும் உளவா யிருப்ப எய்த்து அங்கிருக்கும் ஏழையும் பதரே" என்ற பழம்பாடல், நிலத்தை உழுது பயிரிடத் தேவையான வித்துக்களும் உழும் ஏரும் கையில் இருக்கும்பொழுது சோர்வடைந்து ஏழ்மையில் வாடுவதும் பதரே என்கிறது...

மண்ணிலே தங்கம் உண்டு மணியும் உண்டு வைரம் உண்டு - கண்ணிலே காணச் செய்யும் கைகள் உண்டு வேர்வை உண்டு - நெஞ்சிலே ஈரம் உண்டு பாசம் உண்டு பசுமை உண்டு - பஞ்சமும் நோயும் இன்றி பாராளும் வலிமை உண்டு - சேராத செல்வம் இன்று சேராதோ...? - தேனாறு நாட்டில் எங்கும் பாயாதோ...? போராடும் வேலை இல்லை யாரோடும் பேதம் இல்லை - ஊரோடும் சேர்ந்துண்ணலாம் ஆஆஆ... கை கட்டிச் சேவை செய்து கண்கள் கெட்டு உள்ளம் கெட்டு - பொய் சொல்லிப் பிச்சை பெற்றால் அன்னை பூமி கேலி செய்வாள்... தேர் கொண்ட மன்னன் ஏது...? பேர் சொல்லும் புலவன் ஏது...? ஏர் கொண்ட உழவன் இன்றிப் போர் செய்யும் வீரன் ஏது...?



⟪ © பழநி ✍ கண்ணதாசன் ♫ விஸ்வநாதன்-ராமமூர்த்தி 🎤 T.M.சௌந்தரராஜன், சீர்காழி கோவிந்தராஜன், P.B.ஸ்ரீனிவாஸ் @ 1965 ⟫

---

அறத்துப்பால், பொருட்பால் முடிந்து காமத்துப்பாலில் நகை தொடரும்...

---

புதிய பதிவுகளை பெறுதல் :

---

தொடர்புடைய எண்ணங்களின் வண்ணங்கள் சில :

முகநூல் மூலம் கருத்துக்களை பகிர :