நல்லவர் யார்...? கெட்டவர் யார்...?

முந்தைய பதிவின் இணைப்பு இங்கே சொடுக்கவும்

திருவள்ளுவருடன் உரையாடல் தொடர்கிறது... குறளின் குரலாக...
(முடிவில் அடியேன் கேட்ட கேள்விற்கு இவ்வளவு கோபமா...?)

---

பொருட்பால் - அங்கவியல் - 64. அமைச்சு

---

கலர் கலரா... கனவா வருது வள்ளுவரே...! சரி, இப்படிப்பட்ட அமைச்சரவையைக் கெடுக்கவே சூழ்ச்சி நடக்குமே...?

நடக்காது... ஏன்னா நல்லது கெட்டதைப் பிரித்துப் பார்க்கிற இயல்பான நுண்ணறிவும், அதோடு சேர்ந்த நூலறிவும் இருக்கிற அமைச்சர்களுக்கு எதிராக, எந்த நுட்பமான சூழ்ச்சிகளும் நிற்க முடியாம ஓடிப் போய்டும்...

மதிநுட்பம் நூலோடு உடையார்க்கு அதிநுட்பம்
யாவுள முன்நிற் பவை (636)

சத்தியம் தவறாத உத்தமன் போலவே நடிக்கிறார்² சமயம் பார்த்துப் பல வகையிலும் கொள்ளை அடிக்கிறார்² பக்தனைப் போலவே பகல் வேசம் காட்டி - பாமர மக்களை வலையினில் மாட்டி... எத்தனை காலம் தான் ஏமாற்றுவார் இந்த நாட்டிலே...? சொந்த நாட்டிலே... நம் நாட்டிலே... ⟪ © மலைக்கள்ளன் ✍ தஞ்சை ராமையா தாஸ் ♫ S.M.சுப்பையா நாயுடு 🎤 T.M.சௌந்தரராஜன் @ 1954 ⟫

---

அப்படியாச் சொல்றீங்க...! ம்... சரி, இந்த "தனக்குத்தானே சூன்யம்" வச்சிக்கிறது - அதாவது வெறும் நூலறிவு...! ஏட்டுச் சுரைக்காய் கறிக்கு உதவுமா...?

பல நாடுகளோட புதுமைகளைப் புத்தகங்கள் மூலம் அறிஞ்சி, செயல்படுத்தும் திறமை இருக்க வேண்டியது அவசியம் தான்... ஆனா, அது நம்ம நாட்டின் இயற்கைக்கு, நாட்டு மக்களுக்கு ஒத்து வருமான்னு பலமுறை யோசித்து, அந்தப் புதுமையான செயல்களை நிறைவேற்ற வேண்டும்...

செயற்கை அறிந்தக் கடைத்தும் உலகத்து
இயற்கை அறிந்து செயல் (637)

ஹேய்.....ய்யா... டிங்கிரி டிங்காலே மீனாட்சி டிங்கிரி டிங்காலே... உலகம் போற போக்கைப் பாரு தங்கமே தில்லாலே² அதிகமாகப் படிச்சி படிச்சி மூளை கலங்கிப் போச்சி, அணுக்குண்டைத் தான் போட்டுக்கிட்டு அழிஞ்சு போகலாச்சி² அறிவில்லாம படைச்சிப்புட்டா மிருகமென்னு சொன்னோம் - அந்த மிருகமெல்லாம் நம்மைப் பார்த்து சிரிக்குதுன்னா செய்வோம்...? ⟪ © அன்பு எங்கே ✍ V.சீதாராமன் ♫ வேதா 🎤 T.M.சௌந்தரராஜன் @ 1958 ⟫

---

ஐயோ... இன்றைக்கு நாடு சுடுகாடு ஆகுறதுக்கு சங்கு ஊதுறாங்களே வள்ளுவரே... சொல்புத்தியும் கேட்காம, சுயபுத்தியும் இல்லாம செயல்பட்டா...?

அப்படி எந்த வேலையையும் தொடங்கினா ஆபத்து தான்... எந்த வேலையிலும் அனுபவப்பட்ட திறமைசாலி அமைச்சர்களா கூட இருக்கணும்... அதே சமயம் நல்லது கெட்டதைச் சம்பந்தப்பட்டவர்கிட்டே தைரியமா சொல்றது ஒரு அமைச்சரோட கடமையாகும்...! அப்படி இருந்தா எந்த வேலையும் திறம்படச் சாதிக்க முடியும்...!

அறிகொன்று அறியான் எனினும் உறுதி
உழையிருந்தான் கூறல் கடன் (638)

குறுக்கு வழியில் வாழ்வு தேடிடும் குருட்டு உலகமடா... இது கொள்ளையடிப்பதில் வல்லமை காட்டும் திருட்டு உலகமடா - தம்பி தெரிந்து நடந்து கொள்ளடா, இதயம் திருந்த மருந்து சொல்லடா... இருக்கும் அறிவை மடமை மூடிய இருட்டு உலகமடா, வாழ்வில் எந்த நேரமும் சண்டை ஓயாத முரட்டு உலகமடா - தம்பி தெரிந்து நடந்து கொள்ளடா, இதயம் திருந்த மருந்து சொல்லடா // விளையும் பயிரை வளரும் கொடியை வேருடன் அறுத்து விளையாடும்² - மனம் வெந்திடும் தோட்டக்காரனிடம்... மிரட்டல் வார்த்தைகள் ஆடும், பல வரட்டு கீதமும் பாடும்... வித விதமான பொய்களை வைத்துப் புரட்டும் உலகமடா - தம்பி தெரிந்து நடந்து கொள்ளடா... இதயம் திருந்த மருந்து சொல்லடா... ⟪ © மகாதேவி ✍ பட்டுக்கோட்டை கல்யாணசுந்தரம் ♫ விஸ்வநாதன்-ராமமூர்த்தி 🎤 T.M.சௌந்தரராஜன் @ 1957 ⟫

---

"இந்த நாடும் நாட்டு மக்களும் நாசமாகப் போகட்டும்"-ன்னு தன்னோட நன்மையே பிரதானம்ன்னு இருக்கிறவங்க அமைச்சரவையிலே இருந்தா...?

நமக்கும் மட்டும் இல்லே... நாட்டோட தலைவிதி மாத்துறதே, கூடவே இருக்கிறவங்க தான்... மக்களை நினைக்காம, சுயநலம் இருக்கிற ஒரே ஒரு ஆளை வைச்சிக்கிறதும் ஒன்னு தான்... எழுபது கோடி எதிரிகளை வைச்சிக்கிறதும் ஒன்னு தான்...

பழுதெண்ணும் மந்திரியின் பக்கததுள் தெவ்வோர்
எழுபது கோடி உறும் (639)

ஊருக்கு உழைப்பவன்டி, ஒரு குற்றம் அறியானடி, உதை பட்டு சாவானடி² எருமைக் கன்னுக்குட்டி - என்னெருமைக் கன்னுக்குட்டி என்எருமைக் கன்னுக்குட்டி.. எருமை-கன்னு-குட்டி... என்னெருமைக் கன்னுக்குட்டி... நல்லதுக்குக் காலமில்லை, நடப்பதெல்லாம் வெளிப்பகட்டு² சொல்லப்போனா வெட்கக்கேடு² // ஏய்ச்சுப் பொழைக்கிறவன் ஏழடுக்கு மாளிகையில் எகத்தாளம் போடுறானே... அவன் பேச்சை மறுக்கிறவன் பிச்சை எடுக்கிறானே.... // நாட்டுக்குத் தலைவனென்று நம்பும்படி பேசிவிட்டு வேணுசெல்வம் வாரியே போவாரடி... நாடு செழிக்க எண்ணி நாளெல்லாம் வேலை செய்யும், ஏழைக்குக் காலமில்லே, எவன் எவனோ வாழுகின்றான்... : ⟪ © மந்திரி குமாரி ✍ மு.கருணாநிதி ♫ G.ராமநாதன் 🎤 அறிவன் @ 1950 ⟫

---

சரியாச் சொன்னீங்க ஐயனே... வாயிலே வடை சுட்ற ஆட்கள் தான் இப்போ பெருகிகிட்டு வர்றாங்க... என்ன செய்றது...?

முதல் கேள்விக்குச் சொன்ன பதில் தான் என்றாலும், இதை இதைச் செய்யணும், எந்த நேரத்தில் செய்யணும், எப்போ முடிக்கணும், இதுக்கெல்லாம் என்னென்ன தேவை, எத்தனை பேர் தேவை - இப்படி ஏகப்பட்ட திட்டங்களோட இருக்கிறவங்ககிட்டே, செயல்திறன் இல்லேன்னா, ஒன்னும் வேலைக்கு ஆகாது...! அந்த வேலை முழுசா முடியாம அரைகுறையா தான் இருக்கும்...! இறங்கி வேலை செய்றது தான் தீர்வு...!

முறைப்படச் சூழ்ந்தும் முடிவிலவே செய்வர்
திறப்பாடு இலாஅ தவர் (640)

படிப்பு தேவை - அதோடு - உழைப்பும் தேவை - முன்னேறப் படிப்புத் தேவை, அதோடு உழைப்பும் தேவை... உண்மை தெரியும் உலகம் தெரியும் படிப்பாலே - நம் உடலும் வளரும் தொழிலும் வளரும் - உழைப்பாலே... // பாடுபட்டதால் உயர்ந்த நாடுகள் பலபல உண்டு² மனப் பக்குவம் கொண்டு மக்கள் முன்னேறக் காரணம் ரெண்டு... // வீரத்தலைவன் நெப்போலியனும் - வீடு கட்டும் தொழிலாளி...! ரஷ்யா தேசத்தலைவன் மார்சல் ஸ்டாலின் - செருப்புத் தைக்கும் தொழிலாளி...! விஞ்ஞான மேதை ஜி.டி.நாயுடு - காரு ஓட்டும் தொழிலாளி...! விண்ணொளிக் கதிர் விவரம் கண்ட சர் சி.வி.ராமனும் தொழிலாளி...! - எதற்கும்...? ⟪ © சங்கிலித் தேவன் ✍ பட்டுக்கோட்டை கல்யாணசுந்தரம் ♫ T.G.லிங்கப்பா 🎤 T.M.சௌந்தரராஜன் & குழுவினர் @ 1960 ⟫

---

அமைச்சர்களுக்குச் சரி... நாட்டு மக்களுக்கு...? அதாவது ஓட்டு போடுவதற்கு முன், நல்லவர் யார்...? கெட்டவர் யார்...? என்று எவ்வாறு அறிந்து தெரிந்து புரிந்து கொண்டு தேர்ந்தெடுப்பது...? கோவிச்சுக்காதீங்க வள்ளுவரே...!

நம்ம தாத்தா என்ன சொல்லி இருப்பார்...? அடுத்த பதிவில் பார்ப்போம்...

---

பெருமூச்சு விடாதீங்க, கொஞ்சம் பொறுங்க... "ஹேஹே... இப்படியெல்லாம் அமைச்சர்கள், இனிமேல்...?" என்று எனக்கும் உங்களைப் போல் தோன்றியது... நொந்துபோன மனதிற்குப் பாடல்களே சிறு மருந்து...! எடுத்துக்காட்டு வேண்டுமா ? இதோ :-

உலகின் மிக உயரமான பிரம்மாண்ட வல்லபாய் பட்டேல் சிலையைப் பற்றி என்ன நினைக்கிறீர்கள்...? உங்களுடன் சேர்த்துப் பெருமைப்படுகிறேன்... ஆனால் எனக்கு உடனே ஞாபகம் வந்தது → அண்ணாந்து பார்க்கின்ற மாளிகை கட்டி... அதன் அருகினில் ஓலை குடிசை கட்டி... பொன்னான உலகு என்று பெயரும் இட்டால் - இந்த பூமி சிரிக்கும், அந்த சாமி சிரிக்கும்... (படம் : என் அண்ணன் / இயற்றியவர் : கவிஞர் கண்ணதாசன்) சிரித்தாலும் சிந்திப்போம்... இப்படிப் பாடல் வரிகள் நடுவிலிருந்தால், பதிலுக்கும் அடுத்த கேள்விற்கும் தொடர்பு இல்லாமல், சிந்தனை மாறக்கூடும்... அதனால் அதை மறைத்துள்ளேன்...

இப்படி தாத்தாவின் ஒவ்வொரு பதிலுக்குப் பின்னால் சுத்திக்கிட்டு இருப்பதைச் சுட்டியாலே (Mouse) சொடுக்கினால், குறளும், பாடலும் வரும்...! கைப்பேசியில் வாசிப்பவர்களும் விரலால் கொடுக்கலாம்...! கேட்க நிறுத்த பட்டனையும் சொடுக்குங்க... பாடலில் இருக்கிற சில வரிகளையும் கொடுத்துள்ளேன்... அதை படிச்சிட்டா, குறள் விளக்கத்தையும் மீண்டும் படிப்பீர்கள்...! உங்க முகபாவனைகளும் மாறலாம்...! சில பாடல்களைக் கேட்டால், இன்றைய உண்மை நிலைமைக்குச் சிந்தனையும் வரும்... நொந்துபோய் சிரிப்பும் வரும்...!

---

தாத்தா என்ன சொல்லி இருப்பார்...? இங்கே சொடுக்கித் தொடரவும்... அதற்கு முன் இந்தப் பதிவைப் பற்றித் தங்களின் கருத்து என்ன...?

---

புதிய பதிவுகளை பெறுதல் :

---

தொடர்புடைய எண்ணங்களின் வண்ணங்கள் சில :

முகநூல் மூலம் கருத்துக்களை பகிர :