கை வந்த கலை...

ஏன் என்ற கேள்வி - இங்கு கேட்காமல் வாழ்க்கை இல்லை... நான் என்ற எண்ணம் - கொண்ட மனிதன் வாழ்ந்ததில்லை... பகுத்தறிவு பிறந்ததெல்லாம் கேள்விகள் கேட்டதனாலே² உரிமைகளைப் பெறுவதெல்லாம் - உணர்ச்சிகள் உள்ளதனாலே² (படம் : ஆயிரத்தில் ஒருவன்) கேள்வியைத் தேடி அறிகிற அறிவாளி... கேள்வியோடு மட்டுமே திரிகிற முட்டாள்... இந்த இரண்டு பேருலே யாரு சந்தோசமா இருப்பாங்க...? என்னைக் கேட்டா எந்தக் கஷ்டமும் படாம கேள்வியை மட்டும் கேட்கிற முட்டாள் தான் சந்தோசமா இருப்பான்னு தோணுது... உனக்கு எப்படி தோணுது...?


பதிலையும் சொல்ற மனசாட்சி தான் சந்தோசமா இருப்பான்னு தோணுது...! ஹிஹி... சந்தோசப்படும் எல்லோருமே அறிவாளிகள் தான்... ஏன்னா முட்டாளுக்குச் சிரிக்கத் தெரியாது... சந்தோசமா இருக்கவும் பிடிக்காது... எப்போதும் அறிவாளிகள் தான் சந்தோசமா இருப்பாங்க... அடுத்தவர்களையும் சந்தோசப்படுத்திக்கிட்டே இருப்பாங்க...

இதைக் கேள்வியா கேட்டதுக்காக சிரிக்கிறதா...? இல்லை சும்மா இருக்கிறதா...? சிரிக்கலைன்னா என்னை வேறு பட்டியலில் சேர்த்து தஞ்சாவூர் கல்வெட்டிலே ?! எதற்கும் சிரிச்சு வைக்கிறேன்... ஹா.... ஹா... மன்னவர் பொருள்களைக் கை கொண்டு நீட்டுவார், மற்றவர் பணிந்து கொள்வார்... மாமன்னன் கர்ணனோ தன் கரம் நீட்டுவான், மற்றவர் எடுத்துக் கொள்வார்... வலது கை கொடுப்பதை இடது கை அறியாமல், வைப்பவன் கர்ண வீரன்... வறுமைக்கு வறுமையை வைத்ததோர் மாமன்னன்... வாழ்கவே வாழ்க வாழ்க ஆ... (படம் : கர்ணன்) இப்போ ஒரு கேள்வி : "உன் வாழ்க்கை உன் கையில்" என்று சொல்கிறோமே... "உன் வாழ்க்கை உன் மனதில்" என்று சொன்னாயே இப்பதிவில் ??? "எண்ணம் போல் வாழ்வு" என்பதாலா...?

என்றும் என்னைப் பரவசப்படுத்தும், சந்தோசப்படுத்தும் "நீயே உனக்கு என்றும் நிகரானவன்" என்ற பாடலுக்காக எழுதினேன்... இந்தப் பதிவு உருவான சிந்தனையைப் பதிவின் முடிவில் தெரியும் மனசாட்சி... சரி இப்போ விசயத்திற்கு வா... மிருகங்களிடமிருந்து மனிதன் வந்தவன் என்றாலும், அவனை விலங்களிடமிருந்து வேறுபடுத்திக் காட்டியது கைகள் அல்லவா...? நான்கு கால்களிடமிருந்து நிமிர்ந்த மனிதன், இரண்டு கால்களை கைகளாக மா(ற்)றிய பிறகு தான் உழைப்பு என்பதே உருவாகத் தொடங்கிச்சி... தனக்குத் தேவையான உணவு, உடை, இருப்பிடம் என எல்லா நிலைகளிலும் தன்னிறைவு பெற, அவன் கைகளையே முதன்மை கருவிகளாகப் பயன்படுத்தத் தொடங்கினான்... ஆதிமனிதன் சிக்கிமுக்கி கற்களை உரசி நெருப்பை உருவாக்கியது முதல், இன்று கணினியில் உலகையே வலைப்படுத்தி நிற்பது வரை கைகளே முதன்மை ஆதாரமாகத் திகழ்ந்து கொண்டிருக்கு...! கல்லுடைக்கும் கடின வேலை முதற்கொண்டு, ஓவியம் வரையும் நுட்ப வேலை வரை கைகள் இல்லையென்றால் எதுவுமே கை வராம போயிடும் என்பது எவ்வளவு நிதர்சனமான உண்மை...!

பொதுவா மனிதனுக்கு மூளை தலையில் இருக்குன்னு சொல்வோம்... ஆனா செயல்படும் திறத்தை வைத்துப் பார்த்தா, மனிதனுக்கு மூளை கைகளையே இயங்குதளங்களாகக் கொண்டு செயல்படும் அதிசயத்தைப் பார்க்கிறேன்... ஆற்று நீரைத் தேக்கி வைத்து அணைகள் கட்டும் கைகளே... ஆண்கள் பெண்கள் மானம் காக்க ஆடை தந்த கைகளே... சேற்றில் ஓடி நாற்று நட்டுக் களை எடுக்கும் கைகளே... செக்க வானம் போல என்றும் சிவந்து நிற்கும் கைகள் எங்கள் கைகளே... // பலன் மிகுந்த எந்திரங்கள் படைத்தது விட்ட கைகளே... பாதை போட்டு உலகை ஒன்றாய் இணைத்து வைத்த கைகளே... பாரில் உள்ள பெருமை யாவும் படைத்ததெங்கள் கைகளே... பச்சை ரத்தம் வேர்வையாகப் படிந்து நிற்கும் கைகள் எங்கள் கைகளே... உழைக்கும் கைகளே உருவாக்கும் கைகளே... உலகை புது முறையில் உண்டாக்கும் கைகளே... உண்டாக்கும் கைகளே...



⟪ © தனிப்பிறவி ✍ கண்ணதாசன் ♫ K.V.மகாதேவன் 🎤 T.M.சௌந்தரராஜன் @ 1966 ⟫
நல்ல பாட்டு மனசாட்சி... உழைப்பது, உணவீட்டுவது, சமைப்பது, சாப்பிடுவது, எழுதுவது, வரைவது, தூக்குவது என்று எந்தச் செயல்களுக்கும் கைகளே ஆதாரங்கள்... அதனால் தான் வாழ்க்கையிலும் கை இருக்கிறது, நம்பிக்கையிலும் கை இருக்கிறது, இயற்கையிலும் கை இருக்கிறது, செயற்கையிலும் கை இருக்கிறது... பறக்கிற பறவை இறக்கையிலும் கை இருக்கிறது... அதனால் நம் வாழ்க்கையில் எல்லா நிகழ்வுகளும் "நம் கையில் இருக்கின்றன" என்று கூறுகிறோம்...



⟪ © இன்றுபோல் என்றும் வாழ்க ✍ முத்துலிங்கம் ♫ M.S.விஸ்வநாதன் 🎤 T.M.சௌந்தரராஜன் @ 1977 ⟫
அன்புக் கை இது ஆக்கும் கை, இது அழிக்கும் கையல்ல... சின்னக் கை ஏர் தூக்கும் கை, இது திருடும் கையல்ல...² நேர்மை காக்கும் கை, நல்ல நெஞ்சை வாழ்த்தும் கை - இது ஊழல் நீக்கும் தாழ்வைப் போக்கும் சீர் மிகுந்த கை... இது நாட்டைக் காக்கும் கை... உன் வீட்டைக் காக்கும் கை... இந்தக் கை நாட்டின் நம்பிக்கை... இது எதிர்காலத் தாயகத்தின் வாழ்க்கை² (படம் : இன்று போல் என்றும் வாழ்க) புகையிலும் கை இருக்கிறது, பகையிலும் கை இருக்கிறது ← இவற்றால் உருவாகும் அழுகையிலும் கை இருக்கிறது ! எப்பூடி...? ஹா... ஹா...

அது சரி... உன் சிரிப்பிலும் இருக்கிறது, என்றும் இருக்க வேண்டும்... "இருக்கும்" வரை தேவை : புன்னகை... இப்போ கதை சொல்லும் நேரம் :-

---

ஒரு ஊருக்கு ஒரு சாமியார் வந்திருந்தார்... அவர் எல்லாம் தெரிந்த ஞானி... அவரிடம் என்ன கேள்வி கேட்டாலும் உடனே சரியான பதிலைச் சொல்லி விடுவார் என்று ஊரெங்கும் ஒரே பேச்சு... இரண்டு இளைஞர்கள் சந்தித்துக் கொண்டனர்... "ஊருக்கு எல்லாம் தெரிந்த ஞானி வந்திருக்கிறாராமே... எந்த கேள்வி கேட்டாலும் துல்லியமாகப் பதில் சொல்லும் அறிவாளியாமே அவர்... அவரை நாம் இரண்டு பேரும் சேர்ந்து முட்டாளாக்கும் முயற்சியில் ஈடுபடுவோமா...?" என்று திட்டமிடத் தொடங்கினர்... ஒரு இளைஞன் ஒரு சிட்டுக்குருவியைப் பிடித்து தன் உள்ளங்கையில் வைத்து, மற்றொரு கையால் மூடிக் கொண்டான்... இப்போது இருவரும் ஞானி முன்னால் போய் நின்று, கைகளை மூடி வைத்திருந்த இளைஞன், "இப்போது என் கைகளுக்குள் ஒரு குருவி இருக்கிறது... அது இறந்து போய் இருக்கிறதா....? இல்லை உயிரோடு இருக்கிறதா...?" இதைக் கேட்ட ஞானி சிரித்தார்... "மகனே... அது உயிரோடு இருப்பதும், இறந்து போவதும் உன் கைகளில் இருக்கிறது... உயிரோடு இருக்கிறது என்று நான் சொன்னால், கைகளால் அதை அழுத்தி இறந்து போனதாகக் காட்டுவாய்... இறந்து போய் இருக்கிறது என்று நான் சொன்னால், அப்படியே அழுத்தாமல் உயிரோடு காட்டுவாய்... எல்லாம் உன் கைகளில் தான் இருக்கிறது..." என்றார் ஞானி... திகைத்துப் போயினர் இளைஞர்கள்... மேலும் ஞானி சொன்னார், "இந்தக் குருவிக்கு மட்டுமல்ல... நம் வாழ்க்கையின் உயர்வும், தாழ்வும் நம் கைகளில் தான் இருக்கிறது... அவற்றை ஆக்க சக்தியாகப் பயன்படுத்தப் போகிறோமா...? அழிவு சக்தியாக வீணடிக்கப் போகிறோமா...? என்பதும் நம் கைகளிலேயே இருக்கிறது...!"

---

நண்பர்களே... கீழுள்ள இரு காணொளிகளும் தண்ணீர் பற்றித்தான்... முதலாவது சேமிப்பது, இரண்டாவது சீரழிவது... நம்ம பதிவர்களின் கை வந்த கலைகள் : 1) அஞ்சா சிங்கம் ← செல்வின் அவர்களின் செல்வமான குறும்"பாடம்"...! 2) ஸ்கூல் பையன் ← கார்த்திக் சரவணன் அவர்களின் 1.42 நிமிடங்களில் அதிகாரம் 93...! (என்னவென்று படியுங்களேன்...)

ஆக்க சக்தியாகப் பயன்படுத்தப் போகிறோமா...?

---

அழிவு சக்தியாக வீணடிக்கப் போகிறோமா...?

---

யாருப்பா அது...? புது குறும்பு படமா...? என்னது சம்சாரம் - சிக்கனம் பற்றியா...? ஓ...சாரி... மின்சார சிக்கனத்தைப்பற்றியா...? வாழ்த்துகள்...
நண்பர்களே... தங்களின் கருத்து என்ன...?

---

புதிய பதிவுகளை பெறுதல் :

---

தொடர்புடைய எண்ணங்களின் வண்ணங்கள் சில :

முகநூல் மூலம் கருத்துக்களை பகிர :