புத்தக வாசிப்பு என்பது...

"களவும் கற்று மற" என்று சொல்கிறார்களே... திருட்டைக் கூட கற்றுக்கொண்டு பிறகு மறந்து விடு என்று அர்த்தமா...? இது ரொம்ப தவறாச்...சே...! "களவும் கற்க மற" என்று இருக்க வேண்டுமோ...? தவறு என்பது தவறிச் செய்வது, தப்பு என்பது தெரிந்து செய்வது² தவறு செய்தவன் திருந்தப் பார்க்கணும், தப்பு செய்தவன் வருந்தியாகணும் ! நல்ல நல்ல பிள்ளைகளை நம்பி - இந்த நாடே இருக்குது தம்பி... (படம் : பெற்றால் தான் பிள்ளையா) முன்னோர்கள் சொன்னதில் தவறா...? தப்பா...?

மனசாட்சி தம்பி, பெரியோர்கள் சரியாகத்தான் சொல்லியிருக்காங்க... நாம எடுத்துக் கொண்டது தான் தவறு... இல்லை இல்லை தப்பு...! பிறருக்குச் சொந்தமான பொருளை "சூது" முறையில் ஏமாற்றி எடுத்துக் கொண்டாலும் அதுவும் திருட்டு தான்... நம்ம வள்ளுவர் "சூது"ங்கிற அதிகாரத்திலே :


கவறும் கழகமும் கையும் தருக்கி
இவறியார் இல்லாகி யார். (குறள் எண் 935)
சிறு விளக்கம் : சூதாடு கருவியையும், சூதாடுமிடத்தையும், தனது ஆடும் கைத்திறனையும் பெருமை பேசிக் கொண்டு, சூதை விடாது பற்றிக் கொண்டிருப்பவர், தனது செல்வமெல்லாம் இல்லாமல் போய்விட்டது என்றே எண்ணலாம்...

கவறு = சூதாடும் கருவி, கழகம் - சூதாடும் இடம் - இந்த இரண்டையும், தம் கைகளையும் நம்பி மேல் சென்றவர்கள் ஒன்றும் இல்லாதவராய் ஆகி விடுவார்கள்... திருட்டும், சூதும் செய்வது கைகள்... "இவ்விரண்டையும் கையில் தொடாமல் இரு" என்பதே பெரியோர்கள் சொன்ன அறிவுரை... "களவும் கவறு மற" என்பதே சரி...

ஹேஹே... இன்றைக்கெல்லாம் தாயக்கட்டைகள் தேவையில்லை... கண்களும், புன்னகையும் உட்பட அனைத்தும் சூது...! கரன்சி நோட்டு கட்டு - கண்ணை ரெண்டும் மறைக்குது... நாயி வித்த காசு கூட லொல்லு லொல்லுனு குரைக்குது... காசு பணம் துட்டு மணி மணி... காசு பணம் துட்டு மணி மணி...→படம் : சூது கவ்வும்←இப்போ என்னை... அதாவது சில புத்தகங்களை வாசிக்கும் போது பல சூதுகள் கவ்வுதே ஏன்...?

பண்டித ஜவஹர்லால் நேரு அவர்கள், நம் நாட்டின் பிரதமராக இருந்த போது, ஒருமுறை சென்னைக்கு வந்த போது, வாசிப்பதற்கு அந்த மாதத்தில் வெளியாகியிருக்கின்ற மிக முக்கியமான புத்தகத்தை நூலகத்திலிருந்து தருவித்துத் தருமாறு கேட்க, உடனே அதிகாரிகள் வாகனத்தை எடுத்துக் கொண்டு, சென்னையிலிருக்கின்ற மிகப் பெரிய நூலகமான கன்னிமாரா நூலகத்திற்குச் சென்று, புத்தகத்தை நூலகம் வாங்கப்பட்டு விட்டதை உறுதி செய்து விட்டு, நூலக அலமாரிகளில் தேடிப் பார்த்து, அங்கு இல்லை எனத் திகைத்தவுடன், உடனே நூலக அதிகாரிகள் அந்த நூலை யாரேனும் எடுத்துச் சென்றிருப்பார்கள் என்பதை அறிய, புத்தகம் வழங்கும் பேரேட்டில் தேடினால், அந்தப் பேரேட்டில் நூலில் பெயரை எழுதி ஒருவர் கையெழுத்திட்டு விட்டு எடுத்துச் சென்றிருப்பது யார் தெரியுமா...?

எவ்வளவு பெரிய வரி ! கேட்ட கேள்விற்குப் பதிலில்லை,ம்... மேலே சொல்லு !

C.N.அண்ணாதுரை... பேரறிஞர் அண்ணாதுரையின் பெயர் தான் அது...! மிகப் பெரிய எழுத்தாளரும், அறிஞரும், பிரதமருமான நேருஜி அவர்கள் விரும்பிய அந்தப் புத்தகத்தை, அவரைப் போலவே விரும்பி அவருக்கு முன்பே படிக்க எடுத்துச் சென்றிருக்கிறார் அறிஞர் அண்ணா... நல்ல புத்தகங்களை வாசிக்கும் எண்ணங்களில் அறிஞர்கள் ஒத்துப் போவது சகஜம் தானே...?

அதனால் தான் அவர்கள் அறிஞர்கள்... நல்லதையே வாசிக்க வேண்டும் இல்லையெனில் நேரம் வீண் என்பதை அவரவர் அனுபவமும் வயதும் ஒரு நாள் சொல்லும்...!



⟪ © குலமகள் ராதை ✍ கண்ணதாசன் ♫ K.V.மகாதேவன் 🎤 T.M.சௌந்தரராஜன் @ 1963 ⟫
சினிமா ஸ்டாருங்க படங்களை போட்டா - தெருவில் பேப்பர் கிடைக்கலே² அதில் சிரிப்பு கார்ட்டூன் காதல் கேசுகள் - சேர்த்தால் பிஸினசு மொடையிலே² உலகம் இதிலே அடங்குது உண்மையும் பொய்யும் விளங்குது² கலகம் வருது தீருது அச்சுக் கலையா நிலமை மாறுது² காதல் கதைகள் படிப்பதற்கென்றே வாலிபர் கூட்டம் வாங்குது² அந்தக் கதையில வருவத மனசில நெனச்சி ராத்திரி பகலா ஏங்குது² வானொலி, தொலைக்காட்சி, சினிமா, கைப்பேசி, இணையம் என அறிவியல் வளர்ச்சியில் ஊடகங்கள் வளர்ந்து கொண்டே போகும் போது, புத்தக வாசிப்பு என்பதே படுபயங்கர பாதாளத்திற்குச் சென்று விட்டது அல்லது தூங்கி விட்டது என்பதே எனது ஏக்கம்...!

மனசாட்சி, அப்படித்தான் பரவலாகப் பேசிக் கொண்டிருக்கிறோம்... குடும்பத்தில் நாளிதழ் வாசிப்பு குறைந்து விட்டது, அதிலும் காட்சி ஊடகங்களின் அபரிமிதமான தாக்கங்களால், வீட்டில் பெண்களுக்குப் புத்தக வாசிப்பு என்பது இல்லாமலே போய் விட்டது... குழந்தைகள் பள்ளிப்பாடங்கள் படிப்பது கூட கடமைக்கே என்றெல்லாம் பேசி விவாதிக்கிறோம்...

அன்றைக்குப் படிக்காத பள்ளிப் பாடங்களை இன்றைக்குப் பெற்றோர்கள் தான் முதலில் படிக்கிறார்கள் என்பது இன்றைய நிலை...! அவை நல்லது... (வேறு வழி...?) நாம் தான் முதல் ஆசிரியர்கள்... அப்புறம் ஆண்கள் பல தரப்பட்ட புத்தகங்களை வாசித்து, அவனுக்குக் கூட பிரயோசனமில்லாமல் போகுதே... பெண்கள் வாசித்தால் அந்த தலைமுறையையே வாசிக்க வைக்குமே...

கேள்வி மட்டும் கேளு...! அந்த உண்மையை பிறகு பேசலாம்...! நாளிதழ், வாரயிதழ், மாதயிதழ் என உற்பத்தி குறைந்து போய் இருக்கிறதா...? என்று பார்த்தால், அது தான் இல்லை... புதிய புதிய இதழாய் சஞ்சிகைகள் பெருக்கிக் கொண்டே தான் போகின்றன... புத்தகங்களின் வளர்ச்சியோ அபரிமிதமான வளர்ச்சியைத் தான் எட்டி உள்ளது... விலையோ அதனை விட...! ஆங்காங்கே நடக்கும் புத்தகத் திருவிழாவில் புத்தகங்கள் கோடிக் கணக்கில் விற்றுத் தீர்ந்து கொண்டிருக்கின்றன... திருவிழா கூட்டம் போல மக்கள் வந்து வாங்கி திரும்புகின்றனர்... அப்படியானால் ஊடகங்களின் வளர்ச்சியால் புத்தகங்களின் வாசிப்பு குறைந்து விட்டது என்று சொல்வதை ஏற்றுக் கொள்ள முடியுமா...? இது ஒரு சிக்கலான கேள்வி...?

என்னது ஒரே ஒரு கேள்வியா...? விழாவிற்கு வரும் வருகை அளவிற்குப் புத்தகங்கள் விற்பனை ஆகுகின்றனவா...? "கேள்விப்பட்டதில்" புத்தக விலையை விட, வயிறும் நிரம்பவில்லையாம்... விலை அப்படி...!

வயிற்றுக்கு உணவில்லை என்றால் வரலாறே மாறிப்போகும்...! அதனால் "செவிக்குணவு இல்லாத போழ்து சிறிது வயிற்றுக்கும் ஈயப் படும்."

செவிச்சுவை உணராமல் வாயின் சுவைக்காக மட்டுமே வாழும் மக்கள் இருந்தால் என்ன...? செத்தால் என்ன...? இரண்டும் ஒன்னு தான்னு நீ சொன்ன கேள்வி அதிகாரத்தில் கடைசி குறள்...! இப்போது எனது கேள்வி குரல்கள் : வாங்குகிற புத்தகங்களைச் சிரத்தையோடு வாசிப்பவர்கள் எத்தனை பேர்...? அப்படி வாசிப்பதனால் கிடைத்த ரசனைகளை / சுவாரஸ்யங்களை / "ஸ்பெஷல்" இன்ப துன்பங்களை நண்பர்களிடம் பகிர்ந்து கொள்வதோ அல்லது புத்தகம் வாங்க வசதி இல்லாதவர்களிடம் தருவது எத்தனை பேர்...? இல்லையென்றால் பலரும் வாசித்து பயன் பெறட்டும் என்று அவ்வப்போது ஊரிலிருக்கும் நூலகத்தில் ஒப்படைப்பது எத்தனை பேர்...? இவற்றை விட வாசிப்பின் மூலம் கிடைக்கும் நற்சிந்தனைகளை வாழ்வில் நடைமுறைப் படுத்த முயல்கிறோமா...? இல்லை "வாங்கின புத்தகங்களில் எத்தனை சதவீதம் நம் வாழ்க்கைக்குப் பயன்படக் கூடியவை...?" என்றாவது சிந்திக்கிறோமா ? சிந்தித்தால் - அதன்படி வாழ்வை வளப்படுத்துகிறோமா...?

என்றாவது என்பது எந்த நாள் என்றும் எடுத்துக்கொள்ளலாம் தானே...? பதில்கள் சொன்னால் மீண்டும் என்னைச் சூது கவ்வும்... ஹிஹி... உனது கேள்விகள் அவரவர் மனம் சம்பந்தப்பட்டவை, இருந்தாலும் வேறுவிதமாக ஒரு கருத்துக்கணிப்பு நடத்தி விடலாம்... சரியா...?

---

நண்பர்களே, "புத்தக வாசிப்பு என்பது..." பற்றிய உங்களது எண்ணங்களை கருத்துரைப் பெட்டியில் சொல்லுங்கள்... நன்றி...

---

புதிய பதிவுகளை பெறுதல் :

---

தொடர்புடைய எண்ணங்களின் வண்ணங்கள் சில :

முகநூல் மூலம் கருத்துக்களை பகிர :