அருமையாச் சொன்னீங்க...!

வணக்கம் நண்பர்களே... எழுதுவதற்கு எழுத்துக்கள் பேசுகின்றன... மேடைப் பேச்சிற்கு எழுத்துக்கள் திக்குகின்றன..! பலரின் திறமைகள் தெரியாமலும் போய் விடுகின்றன... என்னவாகும்..? வாங்க கேட்போம்...


(1) அப்படிச் சொல்லுங்க...! (2) சரியாச் சொன்னீங்க...! (3) புறணி-பரணி-தரணி

(1) விழாவில் பேச அதிகாரியிடம் சொல்லி விட்டு, மேலதிகாரி வெளியூர் சென்று விட்டார்... (2) விழாவில் வேறு மாதிரி நடந்ததைத் துணை அதிகாரியிடம் விசாரித்தார்... (3) இதனால் அலுவலகத்தில் அரட்டை... படிக்காதவர்கள் பதிவின் மீது சொடுக்கிப் படித்து விட்டு வந்தால் நன்று... இப்போது நிறுவன முதலாளியும் மேலதிகாரியும் உரையாடுகிறார்கள்...

---

வணக்கம் முதலாளி... புறணி பேசுறவங்க நம்ம அதிகாரியைப் பற்றி என்ன வேண்டுமானாலும் பேசுவாங்க... அவர் பேசுறசொல்லின் வகைகள் தெரிந்தவர்... வந்தவங்க படித்தவங்களா, இல்லையான்னு பார்த்துட்டு, அதற்கேற்ற மாதிரி பேசுவாறே தவிர, பிழையா பேச மாட்டார்... அதிகாரி மனசு சுத்தம் ஐயா...

721 வகையறிந்து வல்லமை வாய்சோரார் சொல்லின்
தொகையறிந்த தூய்மை யவர்.

அது சரி ஐயா... பயப்படாமல் பேசணுமில்லே, அதே சமயம் தான் படித்ததையெல்லாம், விழாவிலே வந்தவங்க எல்லோருமே ஏற்றுக் கொள்கிற மாதிரி எடுத்துச் சொன்னாத் தானே, அவரு நன்றாகப் படித்தவர் என்று சொல்ல முடியும்...?

722 கற்றாருள் கற்றார் எனப்படுவர் கற்றார்முன்
கற்ற செலச்சொல்லு வார்.

சரிங்க முதலாளி... அவரென்ன போருக்கா போறார்...? பயப்படாம சண்டை போட்டுச் சாகிறதுக்கு ! தேவையில்லாத விசயத்துக்கும் அடிபிடி சண்டை எல்லாம் போட பல பேர் இருக்காங்க... ஆனா பேசுவதற்கு இவர் மாதிரி சில பேர் தான் இருக்காங்க...

723 பகையகத்துச் சாவார் எளியர் அரியர்
அவையகத்து அஞ்சா தவர்.

அதுக்குச் சொல்லலே... பல வகையான நூல்களைப் படித்தவங்க அவையிலே, அவங்களுக்கு மனசுக்குப் பிடிக்கிற மாதிரி சொல்லணும், அதே சமயம் அவங்க சொல்றதையும் கேட்டுக்கணும் இல்லையா...? எல்லாமே தெரிந்த மாதிரி இருந்தா எப்படி...?

724 கற்றார்முன் கற்ற செலச்சொல்லித் தாம்கற்ற
மிக்காருள் மிக்க கொளல்.

இவர் வந்தவங்களுக்குப் பயப்படாம, அங்கே என்னென்ன கேள்வியெல்லாம் கேட்பாங்க, எப்படி பதில்கள் சொல்லணும்னு, விவரமா தயார் செய்துகிட்டு போயிருக்கணும்...

725 ஆற்றின் அளவறிந்து கற்க அவையஞ்சா
மாற்றங் கொடுத்தற் பொருட்டு.

கோழைகளுக்குக் கையிலே வாள் இருந்தும் பிரயோசனமில்லேயா... நுட்பமான அறிவு உள்ளவங்க இடத்திலே, படிச்ச எந்தப் புத்தகமும் பயன் தரவே தராது...

726 வாளொடென் வன்கண்ணர் அல்லார்க்கு நூலொடென்
நுண்ணவை அஞ்சு பவர்க்கு.

நல்லாச் சொன்னீங்க முதலாளி... படிச்சவங்க கூடிய அவையிலே, பயந்துகொண்டே பேசுறவங்க மனசிலே, இல்லேன்னா கையிலே இருக்கிற நூல், பகைவரின் போர்க்களத்திலே நடுங்கும் பேடியின் கையிலே இருக்கும் வாளுக்குச் சமம்...

727 பகையகத்துப் பேடிகை ஒள்வாள் அவையகத்து
அஞ்சு மவன்கற்ற நூல்.

ஆமா இப்ப சொல்லுங்க... நல்லவங்க அவையிலே, அவங்க ஏற்றுக் கொள்ளும்படி நல்ல பொருள்பற்றிப் பேசத் தெரியாதவங்க, எத்தனை புத்தகம் படித்திருந்தாலும் பயன் இல்லாமல் போகும்... இது உங்களுக்கும் தெரியும் தானே....?

728 பல்லவை கற்றும் பயமிலரே நல்லவையுள்
நன்கு செலச்சொல்லா தார்.

தெரியும் முதலாளி... என்ன படிச்சாலும், நல்லாப் படிச்சவங்க அவையிலே பேசும்போது பயந்தா, படிக்காதவங்களை விட கேவலமா போயிடுவோம் என்கிறதும் தெரியும்...

729 கல்லா தவரின் கடையென்ப கற்றறிந்தும்
நல்லா ரவையஞ்சு வார்.

சரியாச் சொன்னீங்க... இப்படி அவைக்குப் பயந்து, தான் படித்ததை எல்லாம் கேட்கிறவங்களைக் கவரும்படி பேசத் தெரியாதவங்க, அறிவுள்ளவங்களா இருந்தாலும், அறிவில்லாதவர்களுக்கே சமம்... இதையும் தெரிஞ்சு வச்சிக்குங்க...

730 உளரெனினும் இல்லாரொடு ஒப்பர் களன்அஞ்சிக்
கற்ற செலச்சொல்லா தார்.

"சரிங்க முதலாளி
அருமையாச் சொன்னீங்க...!"

---

என்ன நண்பர்களே... சொல் வன்மையும், அவை அறிதலும் வேண்டும்... புறங்கூறுதலை புறந்தள்ளி விட்டு, தெளிவான திடமான மனதை உருவாக்கிக் கொண்டால் அவை அஞ்சாமை (73) மிகவும் எளிதானதும் முக்கியமானதும் அல்லவா...? குறள்களின் விளக்கங்களைக் குறள்களின் குரலாக மேலே ஓரளவு சொல்லி உள்ளேன்; சரியா இருக்கா ?-சொல்லுங்க...

"சொல்லாத சொல்லுக்கு விலை ஏதும் இல்லை" என்று கண்ணதாசன் பாடல்வரிகளைக் கேட்டிருப்போம்... மௌனம் சிறந்த மொழி என்பதும் அனைவருக்கும் தெரியும்... 'அப்படிச் சொல்லுங்க' என்று நீங்கள் வரவேற்க, அப்படி ஆரம்பித்த இந்த தொடர் (திருக்குறளை அதிகாரங்களாக எழுதுவது) அனுபவங்கள் இருந்தாலும், உங்களின் ஊக்கம் தான் முக்கியக் காரணம்...


அனைவருக்கும் மிக்க நன்றி... மேடைப்பேச்சு ஒருபுறம் இருக்கட்டும்... அதைப்பற்றி வரும் பதிவில் அலசுவோம்... இதுவரை எழுதிய அதிகாரங்களின் பதிவுகளை மூன்று பிரிவுகளாகப் பிரிக்கிறேன்... அந்தந்தப் பதிவுகளைப் படித்தவர்கள் மேலும் சிந்திக்கலாம்... தினமும், யாரிடமும் எதைப்பற்றியும் பேசும் போது :


(1) உண்மையா ? → சொல் வன்மை → அப்படிச் சொல்லுங்க...!
(2) பேசலாமா ? → அவை அறிதல் → சரியாச் சொன்னீங்க...!
(3) தேவையா ? → புறங்கூறாமை → புறணி-பரணி-தரணி

இந்த மூன்றையும் கவனத்தில் கொண்டால், கேட்பவருக்கு மட்டுமல்ல... நமக்கே நாம் செய்து கொள்ளும் உதவி இதை விட ஏதும் உண்டோ...?

பேசுங்கள் ! பேசுங்கள் ! ஆனால்...? இங்கே சொடுக்கித் தொடர்வதற்கு முன் இந்தப் பதிவைப் பற்றி...

நண்பர்களே... தங்களின் கருத்து என்ன ?

---

புதிய பதிவுகளை பெறுதல் :

---

தொடர்புடைய எண்ணங்களின் வண்ணங்கள் சில :

முகநூல் மூலம் கருத்துக்களை பகிர :