புறணி - பரணி - தரணி

வணக்கம் நண்பர்களே... (1) விழாவில் பேச அதிகாரியிடம் சொல்லி விட்டு, மேலதிகாரி வெளியூர் சென்று விட்டார்... (2) விழாவில் வேறு மாதிரி நடந்ததைத் துணை அதிகாரியிடம் விசாரித்தார்... இந்த இரு பகிர்வின் இணைப்புகள் (1) அப்படிச் சொல்லுங்க...! (2) சரியாச் சொன்னீங்க...! இப்போது "நடந்தது என்ன...?" என்று அறியாமல் அலுவலகத்தில் அதைப் பற்றி என்ன பேசுகிறார்கள்...?


181 : "இந்த துணை அதிகாரி அறத்தைச் சொல்லாமல் பாவமே செய்தாலும், இரு கோடுகள் தத்துவம் தெரியாததால், மனதில் இருக்கும் கஷ்டங்களை வைத்துக் கொண்டு "எனக்குத் தான் ரொம்ப வேலை... என் துயரம் தான் உலகத்தில் மிகப் பெரியது" என்று புலம்பித் திரியுறாரு... ஆனால் நம் மனதில் உள்ள நமது அதிகாரியின் அன்பைப் பூட்டி வைக்க முடியுமா...? கண் கலங்குதுப்பா... துணை அதிகாரி புறம் பேசாமல் இருந்தால், அதுவே அவருக்கு நல்லது..."

அறங்கூறான் அல்ல செயினும் ஒருவன்
புறங்கூறான் என்றல் இனிது.

182 : "நமது அதிகாரி இல்லாத போது, அவரைப் பற்றிப் பொல்லாங்கு பேசுவது அறவழிக்கு எதிரான காரியங்களைச் செய்வதை விடக் கொடுமை ஆச்சே... இந்த துணை அதிகாரி, நமது அதிகாரியிடம் பொய்யாகச் சிரித்துச் சிரித்துப் பேசுவது பெருங்கேடு..."

அறனழீஇ அல்லவை செய்தலின் தீதே
புறனழீஇப் பொய்த்து நகை.

183 : "...ம்... இப்படி நேரில் ஒரு மாதிரியும், அவர் இல்லாத போது வேறு மாதிரியும் புறங்கூறிப் பொய்மையாக நடந்து உயிர் வாழ்வதை விடச் செத்துப் போகலாம்... அவ்வளவு கோபம் வருதுப்பா... அது தான் அற நூல்கள் சொல்கிற ஆக்கத்தைத் தரும்..."

புறங்கூறிப் பொய்த்துயிர் வாழ்தலின் சாதல்
அறங்கூற்றும் ஆக்கத் தரும்.

184 : "நமது அதிகாரி இருக்கும் போது நேருக்கு நேராகக் குறைகளைக் கடுமையாகச் சொல்ல வேண்டியது தானே...? பின் விளைவுகளை எண்ணிப் பார்க்காமல் ஒருவரைப் பற்றிக் குறை கூறுவது ரொம்பத் தவறு... தைரியம் இல்லாத துணை அதிகாரி..."

கண்நின்று கண்ணறச் சொல்லினும் சொல்லற்க
முன்னின்று பின்நோக்காச் சொல்.

185 : "சின்னப் பிள்ளைத்தனமா இருக்கே... இதிலிருந்தே தெரியலையா...? துணை அதிகாரி அறவழி நிற்பவர் அல்ல என்பதைப் புறங்கூறும் இழிவான செயலால் தெளிவாகப் புரிகிறது..."

அறஞ்சொல்லும் நெஞ்சத்தான் அன்மை புறஞ்சொல்லும்
புன்மையாற் காணப் படும்.

186 : "இவர் என்னென்ன சொன்னாரோ யாருக்குத் தெரியும்...? அவர் சொன்னதிலேயே கொடுமையானவற்றை ஒரு நாள், இவர் மேலே திரும்ப வரும் பாரு..."

பிறன்பழி கூறுவான் தன்பழி யுள்ளும்
திறன்தெரிந்து கூறப் படும்.

187 : "மகிழ்ச்சியாகப் பேசி நட்புக் கொள்ளும் நன்மை தெரியாத இவருக்கு, இருக்கிற கொஞ்ச நண்பர்களைக் கூடப் பழித்துப் பேசியே பிரித்து விடுவார்... எதுக்கும் நாம ஜாக்கிரதையாக இருக்கணும்..."

பகச்சொல்லிக் கேளிர்ப் பிரிப்பர் நகச்சொல்லி
நட்பாடல் தேற்றா தவர்.

188 : "ஆமா... எனக்கு ஒரு சந்தேகம்... இப்படி நெருங்கிப் பழகுபவர்கள் கிட்டே குறையைக் கூடப் புறம் பேசித் தூற்றுகிறாரே, பழகாதவர்கள் கிட்டே எப்படி மோசமாக நடந்து கொள்வாரோ....? இதிலே அடுத்த வாரம் கல்யாணம் வேற, பொண்ணு வீட்டார் பாவம்..."

துன்னியார் குற்றமும் தூற்றும் மரபினார்
என்னைகொல் ஏதிலார் மாட்டு.

189 : "பொண்ணு மட்டுமா...? பிறக்கப் போகிற குழந்தைகளும் இப்படித் தானே வளரும்... இப்படி ஒருவர் நேரில் இல்லாதபோது பழிச்சொல் பேசும் இவர்களைப் போல ஆட்களின் பாரத்தைச் சுமப்பதே அறம் என்று, இந்த நிலம் எப்படித் தான் சுமந்து கொண்டிருக்கிறதோ...?"

அறன்நோக்கி ஆற்றுங்கொல் வையம் புறன்நோக்கிப்
புன்சொல் உரைப்பான் பொறை.

190 : "அது சரி...! /// சுட்டும் விரலால் எதிரியைக் காட்டி குற்றம் கூறுகையில்.... மற்றும் மூன்று விரல்கள் உங்கள் மார்பினை காட்டுதடா... மூடர்களே, பிறர் குற்றத்தை மறந்து முதுகைப் பாருங்கள்... முதுகினில் ஆயிரம் அழுக்கு அதனைக் கழுவுங்கள்.../// கண்ணதாசன் பாடல் தெரியுமில்லே... யாருக்கும் வெட்கமில்லை - இது படத்தோட பேரு... அடுத்தவங்க குற்றம் கண்டுபிடிப்பதற்கு முன்னாடி, தனது குற்றத்தைப் பார்த்தார்கள் என்றால் இந்தப் புறங்கூறும் பழக்கம் ஓடிப் போயிடும்... வாழ்க்கையும் நிம்மதியாகச் சந்தோசமாக இருக்கும்..."

ஏதிலார் குற்றம்போல் தங்குற்றங் காண்கிற்பின்
தீதுண்டோ மன்னும் உயிர்க்கு.

" அமைதி...அமைதி... "என்று சொல்லிக் கொண்டே உள்ளே நுழைந்தார் மேலதிகாரி... என்ன பேசியிருப்பார்கள் என்று அவருக்குத் தெரியாததா...? அதிகாரியை அழைத்துப் பேசவேண்டும் என்று நினைத்துக் கொண்டிருந்த போது... /// அழகுக் குட்டிச் செல்லம், உன்னை அள்ளித் தூக்கும் போது, உன் பிஞ்சு விரல்கள் மோதி, நான் நெஞ்சம் உடைந்து போனேன்... ஆளைக் கடத்திப் போகும், உன் கன்னக்குழியின் சிரிப்பில், விரும்பி மாட்டிக் கொண்டேன், நான் திரும்பிப் போக மாட்டேன்... அம்மு நீ... என் பொம்மு நீ... மம்மு நீ... என் மின்மினி.../// என்று கைப்பேசி அழைக்க, மேசையில் (மேலே) உள்ள படத்தைப் பார்த்துக் கொண்டே, தன் செல்ல மகளிடமும், மனைவியிடமும் பேசிய மகிழ்ந்த அவருக்கு, மனதில் நினைவுக்கு வந்த குறள் :

குழலினிது யாழினிது என்பதம் மக்கள்

மழலைச்சொல் கேளாதவர். (66)

---

என்ன நண்பர்களே... 'சொல் வன்மையும்' வேண்டும். 'அவை அறிதலும்' வேண்டும். இவற்றை விட முக்கியமாக அறிந்து கொள்ள வேண்டியது 'புறங்கூறாமை' அதிகாரத்தில் (19) உள்ள பத்து குறள்களும்... அதனின் விளக்கங்களைக் குறள்களின் குரலாக மேலே ஓரளவு சொல்லி உள்ளேன்... இரண்டும் சரியாக இருக்கா என்று பாருங்க...

"/// பதவி வரும்போது பணிவு வர வேண்டும்... துணிவும் வரவேண்டும் தோழா... பாதை தவறாமல் பண்பு குறையாமல் பழகி வரவேண்டும் தோழா... அன்பே உன் அன்னை... அறிவே உன் தந்தை... உலகே உன் கோவில்... ஒன்றே உன் வேதம்... மூன்றெழுத்தில் என் மூச்சிருக்கும்... அது முடிந்த பின்னாலும் பேச்சிருக்கும்... உள்ளம் என்றொரு ஊர் இருக்கும்... அந்த ஊருக்குள் எனக்கொரு பெயர் இருக்கும்... கடமை அது கடமை... கடமை அது கடமை.../// இப்படியெல்லாம் இருக்க முடியுமாப்பா...?"

மனமே... உண்மையும் மூன்றெழுத்து தான்... உள்ளம் அறிய உண்மை பேசுபவன், தவமும் தானமும் செய்பவரைக் காட்டிலும் உயர்ந்தவன் ஆவான்.

மனத்தொடு வாய்மை மொழியின் தவத்தொடு

தானஞ்செய் வாரின் தலை. (295)

"சரி... நேரில் போய்ப் பேசினால்...?"

கடக்க முடியாத அரணும், பிற சிறப்புகளும் இல்லாத மனிதர்கள் என்றாலும், அவர்கள் இருக்கும் இடத்திற்கே சென்று தாக்குவது கடினம்.

சிறைநலனும் சீரும் இலரெனினும் மாந்தர்

உறைநிலத்தோடு ஒட்டல் அரிது. (499)

"சிவப்பு எண்களைப் பார்க்கும் போது 19 (1)(A), 66 A, 295 A, 499 பிரிவு ஞாபகம் வருதே... ஏதேனும் உள்நோக்கம்...? சரி அதை விடு... தலைப்பைப்பற்றி...?"

மனமே... முதல்லே நம் மனதைப் புறங்கூறாமல் இருக்கணும்...! தலைப்பின் விளக்கம் : சுயசிந்தனையற்றவர்களின் தொடர் ஊக்கத்தினால் ஒருவர் பேசும் தேவையற்ற, உண்மையற்ற பேச்சுக்கள்... இல்லை என்றால் கோபத்தால் வரும் திட்டுக்கள்... பரணில் தங்கி, (பேசுபவரின் மனதில் தங்கி) ஒரு நாள் அவருக்கே திரும்ப வருமென்று பெரியவங்க சொல்வாங்க...

---

புறணி பேசாமலும் கேட்காமலும் இருந்தால் தரணி பேசும்...

---

தரணி பேசுவது இருக்கட்டும்... நாம் எவ்வாறு பேச வேண்டும் என்பதை அறிய இங்கே சொடுக்கி தொடர்வதற்கு முன் இந்தப் பதிவைப் பற்றி...

நண்பர்களே... தங்களின் கருத்து என்ன ?

---

புதிய பதிவுகளை பெறுதல் :

---

தொடர்புடைய எண்ணங்களின் வண்ணங்கள் சில :

முகநூல் மூலம் கருத்துக்களை பகிர :