ஆமைபோல்...

மனதிற்கு வழிகள் என்ன...? வாய், கண், மெய், செவி, மூக்கு... இந்த ஐம்புலன்களின் வேலை...? முறையே சுவை, ஒளி, ஊறு, ஓசை, நாற்றம் என்னும் உணர்வுகள்...! உணர்வுகளின் வேலை...? எதையும் நுகரவேண்டும் என்ற மன எழுச்சி உணர்வுகளுக்குப் பின்னே தான் பிறக்கிறது...! மன எழுச்சியால் நுகர்தல் கூடாதா...? இல்லை, இது புலனின்பங்கள் ஐந்தையும் அடியோடு ஒழிப்பதிலிருந்து வேறானது... அது என்ன...? ஐம்புலன்களுக்கு அடிமைப் படாமல் மனம் ஆணையிட்டு ஐம்புல இன்பங்களைத் துய்ப்பதே மன அடக்கம்....! அடங்குமா..? தன் வசப்படுத்தி விட்டால் உலக இன்பங்களை அனுபவிக்கலாம்... நடக்குமா...? பொறியடக்கம் என்பது வஞ்சகமாக அவற்றை அடக்கி வைத்தல் அல்ல... தீவினைகள் புரியாமல், தீவினைகளால் தனக்கு ஊறு வராமற் பாதுகாத்துக் கொள்ளுதற்காகவே... இதனால் பயன்...? எதிலும் அளவு இருந்தால் உலகில் "இருக்கும் வரை இன்பமே...!" இனி சொல்லாய்வு :

இந்தக் குறளிலுள்ள ஒருமை, எழுமை...? பலரும் : ஒருமை என்றால் ஒரு பிறப்பு; எழுமை என்றால் ஏழு பிறப்பு...! பரிதியும் பரிப்பெருமாளும் இவற்றுக்குப் பொருள் கூறவில்லை...! சிறப்பாக உள்ள உரை...? காலிங்கர் 'ஒருமையுள்' என்ற சொல்லுக்கு 'ஒருவழிப்பட்ட உள்ளத்திலே' எனப் பொருள் கொண்டதே... வேறு எளிமையான விளக்கம்...? ஏழெட்டு, நாலைந்து என்னும் பேச்சு வழக்குபோல...! எழுமை பற்றிய தகவல்...? இந்த சொல் சங்ககால இலக்கியங்களிலும், மற்ற பதினெண்கீழ்க்கணக்கு நூல்களிலும் பயிலப்படவில்லை...! திருக்குறளில்...? ஒருமை, எழுமை, இவ்விரு சொற்களும் சேர்ந்து, 126, 398, 835 குறள்களில் வரும்... உண்மைப்பொருளை அறிந்து கொள்ள வேண்டுமென்றால்...? ஒருமை மட்டும் உள்ள 974-வது குறளையும், எழுமை மட்டும் உள்ள 538-வது குறளையும், கணக்கியல் பதிவில் சொன்னது போல் திருக்குறள் முழுவதிலும் இவ்விரு சொற்களை ஆய்வு செய்ய வேண்டும்...

எழுமை என்றால் ஏழு பிறப்பா...? எழுபிறப்பும் என்றே 62, 107 குறள்களில் வரும்... இதில் 107-வது குறளில் எழுமை எழுபிறப்பும் என்றே ஆரம்பிக்கும்... மற்றபடி ஏழு பிறப்பு என்பது சமயம் சார்ந்த நம்பிக்கைகளால் உண்டானவை...! அதனால் என்ன...? அறம் பொருள் இன்பம் எனும் உறுதிப் பொருட்களைத் திருக்குறளில் நம்பிக்கையுடன் காணலாம்...! வீடு பேறு...? அறத்துடன் வையத்துள் வாழ்வாங்கு வாழ்ந்தாலே போதுமானது...! எல்லா பேறும் பெயரும் தானே வரும்... அதற்கு என்ன செய்ய வேண்டும்...? திருக்குறள் வீட்டில் இருக்க - படிக்க - செயல்படுத்த வேண்டும்... இந்த "மந்திரம் தந்திரம் எந்திரம்" என்று மூழ்கினால்...? தாத்தாவின் எழுத்தாணியை வாங்கி குத்துவேன்...! உறுதிப் பொருளுக்குச் சான்று...? "அடக்கம் அமரருள் உய்க்கும்" என்று இவ்வதிகாரத்து முதல் குறளில் எழுதிய தாத்தா, அதற்கு மாறாக இதே அதிகாரத்தில் ஐம்புலன்கள் அடக்கினால் ஏழு பிறப்புகள் உண்டு என்று பொருள்பட எழுதியிருக்க மாட்டார்...! அப்படியென்றால்...? ஏழு பிறவி இருக்கும் என்றால் ஒரு பிறவியில் ஐம்புலன்களை அடக்கி ஏன் சிரமப்பட வேண்டும்...? சரி, ஒருவேளை அவ்வாறே அடக்கி வாழ்ந்தவனுக்கு ஏழு பிறப்புகள் எதற்கு வேண்டும்...? ஆனாலும் ஆமையின் மெய்யடக்கம் மனிதனுக்குச் சிரமம்...! அது என்ன...? ஆமைகள் எந்தவிதத் தீங்கும் செய்வதில்லை... ஒரு ஆமையின் வாழ்நாள் தோராயமாக 80, அரிதாக 200, வியப்பாக 250, 344 ஆண்டுகள் வரை வாழ்கின்றன... சிறப்பாக ஏதேனும்...? நூறாண்டுகள் ஆன ஆமைகளின் ஈரல், நுரையீரல், சிறுநீரகம் ஆகியவற்றை ஆராய்ந்ததில், அவை இளம் ஆமைகளின் உறுப்பைப் போலவே இருந்துள்ளதாக ஆய்வு சொல்கிறது... ஆனால் மனிதனுக்கு...? சரி நம் ஆய்வு முடிந்ததா...?

இல்லை... இந்த குறளிலுள்ள எண்களைப் பற்றி...? ஓரளவு விளக்கமாகப் பேசி இருந்தாலும், எண்ணென்ப பதிவை வாசித்தவர்கள் புரிந்து கொள்வார்கள்... மேலும் விளக்கம் சொல்லலாம்... இந்தக் குறள், ஒன்று, ஐந்து, ஏழு, என மூன்று பகா எண் கொண்ட குறள் என்று இணையத்தில் பலகாலமாகச் சுற்றிக் கொண்டிருப்பது சரியா...? சுற்றுவது கூட அதிக வருத்தம் தரவில்லை... ம்... பிறகு...? ஐந்தும் ஏழும் பகா எண்கள்... ஆனால் ஒன்று (1) பகு எண்ணும் அல்ல பகா எண்ணும் அல்ல...! முருகா...! சரி, இந்தப் பதிவு "எண்ணென்ப" பதிவுக்குத் துணைப் பதிவா...? இல்லை... மூன்றாவது ஒரு முன்னோட்ட பதிவு... என்ன அது...? இணையத்தில் 'திருக்குறள் சிறப்புகள்' எனத் தொடரும் தவறுகளைத் திருத்த அல்லது தடுக்க...! ஆனாலும் இதற்கு வழிகாட்டியாக இருந்தோர்க்கு நன்றி... புள்ளி விவரங்களைப் பற்றியே தன் ஆய்வின் முடிவாக ஒருவர் சொன்னது என்ன...? பொய் இரண்டு வகைப்படும்... ஒன்று பொய்... இன்னொன்று புள்ளி விவரம்...! ஏன்...? ஆய்வாளர் "மெய்ப்பொருள் காண்பது அறிவு" என வரும் இரண்டு குறள்களில் சொன்னது போல் ஆய்வை செய்திருப்பார்...! அதேபோல் தொடர்வோம்... நன்றி...

---

புதிய பதிவுகளை பெறுதல் :

---

தொடர்புடைய எண்ணங்களின் வண்ணங்கள் சில :

முகநூல் மூலம் கருத்துக்களை பகிர :