வாழ்ந்து கெட்டவர்கள்...!

வணக்கம் நண்பர்களே : வாழும் மட்டும் நன்மைக்காக வாழ்ந்து பார்ப்போம் வாடா நைனா... வாழ்வு யார் பக்கம் ? - அது நல்லவர் பக்கம்...! வாழ்வு யார் பக்கம் ? - அது நல்லவர் பக்கம்...! அட ஆடியில் செய்தவன் - ஆவணி வந்ததும் அனுபவிப்பானடா...! அவன் தேடிய வினையை வீட்டுக்கு வரலாம் பின்னால் பாரடா...!



⟪ © காளி ✍ கண்ணதாசன் ♫ இளையராஜா 🎤 S.P.பாலசுப்ரமணியம் @ 1980 ⟫

வாப்பா மனசாட்சி நைனா... இன்னைக்கு என்ன சொல்லப் போறே...?

இல்லே, ஒரு சந்தேகம்... அவரவர் முன்னோர்கள் சொத்தை எல்லாம் வச்சிக்கிட்டு, கூடப் பிறந்தவர்களையும் ஏமாத்திட்டு, பணம் இருக்கிற வரைக்கும் சுகவாசியா இருந்திட்டு, கடைசிக் காலத்திலே கஷ்டப்படுபவர்களைத் தான் வாழ்ந்து கெட்டவர்கள் என்று சொல்றாங்களோ...?

அட... அழியும் பணத்தை விடு... தாங்க முடியாத இழப்புகளைக் கூட தாங்கிக் கொண்டு, தவறான வழியில் செல்லாமல், தனக்கென வாழாத தியாக உள்ளங்களும் இருக்கத்தான் செய்கின்றன... நீ சொல்றது உழைக்காத சோம்பேறிங்க நிலை... அவர்களுக்குச் சுயநலமே பிரதானம்... அந்த சுயநலத்தை ஒரு நாள் அவர்களின் வாரிசுகளின் மூலம் உணர்வார்கள்... ஆனால் அவர்கள் தான் பலரின் முன்னேற்றத்திற்கும் தன்னம்பிக்கைக்கும் முதல் வழிகாட்டிகள்...! தொடர்ந்து ஏழு தலைமுறையாகச் சிறப்பாக வாழ்ந்த / வாழும் குடும்பங்களைச் சொல்ல முடியுமா...?

அப்பன் சொத்தை, பாட்டன் சொத்தை தூக்கிப் போடுடா; சொந்தக் காலில் நீயும் கொஞ்சம் வாழ்ந்து பாருடா; ஆயுள் ரேகை தேயும் வரை உழைப்போமடா; உழைச்சு நாம ஆயுளத்தான் வளர்ப்போமடா; வாழும்வரை மத்தவன மதிப்போமடா-மதிச்சுப்புட்டா வாழ்ந்தபின்னும் இருப்போமடா.! வாடா வாடா தோழா; நாம வாழ்ந்து பார்ப்போம்; வாழ்ந்து பார்ப்போம் வாடா...



⟪ © சிவகாசி ✍ பேரரசு ♫ ஸ்ரீகாந்த் தேவா 🎤 சங்கர் மகாதேவன் @ 2005 ⟫
ம்... பதிவின் விசயத்திற்கு வந்துட்டே...! எல்லோரின் வாழ்விலும் வளமும் வறுமையும் மாறி மாறித் தான் வரும்... வறுமையிலே இருக்கிறவங்க திடீரென்று பணக்காரங்க ஆயிட்டா, அவங்க குணத்திலும் நடவடிக்கையிலும் திடீர் மாற்றம் நடக்கும்... நல்லா பரம்பரை பரம்பரையாக பணக்காரர்களாக இருந்தவங்க திடீரென்று ஏழையாயிட்டாங்கன்னு வைச்சிக்கோ, அவங்ககிட்டே திடீரென்று குணநலம் மாறாது... பெருந்தன்மையாகவே இருப்பாங்க... ஆனா அவங்களை வாழ்ந்து கெட்டவங்கன்னு அடையாளைப்படுத்துறோம்...

திடீர் பணக்காரனுக்கு திடீர் டாம்பீகம் வர்ற மாதிரி, திடீர் ஏழைக்கு ஏதாவது குணநலம் திடீரென்று மாறாதா ? அல்லது எதுவுமே வராதா ? அது எப்படி...?

கெட்டாலும் மேன்மக்கள் மேன்மக்களே...! என்று இதற்காகத்தான் அந்தக் காலத்திலேயே சொல்லி வைச்சாங்க ! ஒரு உண்மை சம்பவத்தைக் கேளு :

---

சுவாமி விவேகானந்தர் பாரீஸ் நகரிலிருந்த போது, ஒரு கோச் வண்டியில் ஏறி நகரை உலா வரக் கிளம்பினார்... அவருடன் ஒரு ஐரோப்பியப் பெண் சிஷ்யையும் பயணம் செய்தார்... குதிரைகள் பூட்டிய அந்த கோச் வண்டியை ஓட்டிச் சென்றவர் வழியில் வசதியான உடை அணிந்த இரண்டு குழந்தைகளையும், அவர்களை அழைத்து வந்த பெண்ணையும் பார்த்து வண்டியை நிறுத்தினார்... வண்டியிலிருந்து இறங்கிச் சென்று, அந்த இரண்டு குழந்தைகளிடமும் பேசி விட்டு, தட்டிக் கொடுத்து விட்டுத் திரும்பினார்...

சுவாமி விவேகானந்தரும், சிஷ்யையும் ஆச்சரியப்பட்டனர்... வண்டி ஓட்டுநரிடம் கேட்டனர், "வசதியான குடும்பத்தைச் சேர்ந்தவர்களைப் போல உடை அணிந்த அந்தச் சிறுவர்களுக்கும் உங்களுக்கும் என்ன தொடர்பு...?" அதற்கு அவர், "அவர்கள் என் குழந்தைகள் தான்... அவள் என் மனைவி" என்று கூறி விட்டு, பாரீசில் உள்ள ஒரு பிரபலமான வங்கியின் பெயரைச் சொல்லி, "கேள்விப்பட்டிருக்கிறீர்களா.."? என்று கேட்டார்... "ஓ... நன்றாகத் தெரியுமே...! அந்த வங்கி தான் பாரீசிலேயே பெரிய வங்கி ஆயிற்றே... எனக்குக் கூட அந்த வங்கியில் கணக்கு உண்டு... ஆனால் அந்த வங்கி திவாலாகி விட்டதாகக் கூறுகிறார்களே !" என்றார் ஐரோப்பிய சிஷ்யை...

"அந்த வங்கியின் உரிமையாளன் நான் தான்... வங்கி இப்போது இக்கட்டில் உள்ளதும் உண்மை தான்... கடன்களை வசூல் செய்து சீர் செய்வதற்கு சில மாதங்கள் ஆகும்... அதுவரை அடுத்தவர்களுக்குச் சுமையாக இருக்க விரும்பாமல், சொந்த வீட்டை விற்றேன்... ஆனால் வசதியான ஒரு வீட்டை வாடகைக்கு எடுத்து, எனது குடும்பத்தைத் தங்க வைத்துள்ளேன்... வீட்டிலுள்ள சில பொருட்களையும், எனது மனைவியின் நகைகளைச் சிலவற்றை விற்றும் இந்த குதிரை வண்டியை வாங்கினேன்... இப்போது இந்த வண்டியை ஓட்டி ஓரளவு சம்பாதித்து வருகிறேன்... எனது மனைவியும் அவரின் திறமைக்கேற்ப சிறிதளவு சம்பாதிக்கிறார்... இருவரும் சம்பாதித்து குழந்தைகளுக்கு நல்ல கல்வியைக் கொடுத்து வருகிறோம்... நிலைமை கொஞ்ச நாளில் சீராகி விடும்... அதுவரை யாருக்கும் சிரமம் தராது நாமே உழைத்து, நிலைமையைச் சமாளித்து விடலாமே" என்றார் அவர்...

என்னோட ராசி மட்டும் எல்லாத்துக்கும் சேரும்... என்னால ஆன மட்டும் எல்லாருக்கும் லாபம்...² எட்டு மட்டும் வச்சிப்புட்டா கீழிறங்கி வாறதில்லே... புள்ளி மட்டும் வச்சிப்புட்டு விட்டுப்புட்டு போறதில்லே... ஆகாயத்தைத் தேடி நான் போறதில்லே பாரு... ஆண் பிள்ளை சிங்கம் அட என்னைப் போல யாரு... நான் உள்ளதைச் சொல்லுறேன்... சொன்னதைச் செய்யுறேன்... ஒதுங்கு ஒதுங்கு ஒதுங்கு ஒதுங்கு...



⟪ © மாவீரன் ✍ கங்கை அமரன் ♫ இளையராஜா 🎤 மலேசியா வாசுதேவன் @ 1986 ⟫
"சபாஷ்...! இவர் தான் சரியான வேதாந்தி...! எந்த நிலை வந்தாலும், சூழ்நிலைக்கு இரையாகி விடாமல், தொடர்ந்து மனத்திடத்தோடு உழைத்துக் கொண்டிருக்கிறார்... வாழ்க...!" என்று வாழ்த்தினார் சுவாமி விவேகானந்தர். குதிரை வண்டிக்காரர் மாவீரன் தான் மனசாட்சி...!

---

உழைக்கிற நோக்கம் உறுதியாயிட்டா - கெடுக்கிற நோக்கம் வளராது... மனம் கீழும் மேலும் புரளாது... திருடாதே பாப்பா திருடாதே... வறுமை நிலைக்குப் பயந்துவிடாதே... திறமை இருக்கு மறந்து விடாதே...→அப்படின்னு சொல்றே...!



⟪ © திருடாதே ✍ பட்டுக்கோட்டை கல்யாணசுந்தரம் ♫ S.M.சுப்பையா நாயுடு 🎤 T.M.சௌந்தரராஜன் @ 1961 ⟫
ஆம்... வாழ்ந்து கெட்டவர்கள் என்றால், வறுமைக்குப் பலியாகாமல், தொடர்ந்து அயராது உழைத்து, மீண்டும் வாழ்க்கையைத் தனது மனதளவில் திருப்தியாக வடிவமைத்துக் கொண்டு, எல்லோரிடமும் பெருந்தன்மையாக நடந்து, சிறப்பாக வாழ்பவர்கள்...!

---

மனதில் கனம் இருந்தால்...? அறிய இங்கே சொடுக்கித் தொடரலாம். அதற்கு முன் இந்தப் பதிவைப் பற்றி தங்களின் கருத்து என்ன...?

---

புதிய பதிவுகளை பெறுதல் :

---

தொடர்புடைய எண்ணங்களின் வண்ணங்கள் சில :

முகநூல் மூலம் கருத்துக்களை பகிர :