விதி...

வணக்கம் நண்பர்களே... ஒரு முக்கியமான பதிவு...


பிரிவாற்றாமை மற்றும் கண்விதுப்பழிதல் குறளின் குரல் தொடருவோம் என்று நினைத்தால், அதன் பாடல்கள் எல்லாம் சோக ராகங்கள்... அதைப் பதிவேற்றம் செய்ய முற்பட்டால், Google Site "ஒரு வாரம் கழித்துத் தான் Folder உருவாக்க முடியும்"ன்னு சொல்லி விட்டதால், இந்த விதி பதிவு...?! நான் நினைக்கும் பலரும், "இதை எங்கோ வாசித்த மாதிரி இருக்கே..." என்று சொல்லலாம்...! 2015 ஆம் ஆண்டு எழுதிய குறிப்பை (draft post) 'பட்டி டிங்கரிங்' செய்து இன்று வெளியிட வேண்டும் என்பது விதி...! சரி நான் இங்கு 'எல்லாம் விதி' என்கிறேன், என் மனம் 'அது விதியில்லை' என்கிறது... உரையாடலுக்குச் செல்லும் முன் ஒரு பாடலை கேட்போமா...?

யாருக்கு நான் தீங்கு செய்தேன் இறைவா...? நாட்டில் யார் குடியை நான் கெடுத்தேன் இறைவா...? ஊருக்கு நான் என்ன செய்தேன் இறைவா...? என்னை உனக்குக்கூடப் பிடிக்கலையா இறைவா...? மக்கள் கூடும் மண்டபத்தை இடித்தேனா...? நீதி மன்றத்திலே பொய்யுரைத்து நெறி மறந்தேனா...? கற்றவர் மேல் பழி உரைத்துக் கலங்க வைத்தேனா...? ஒரு கடவுள் இல்லையென்று சொல்லி கருத்தழிந்தேனா...? குழந்தை உண்ணும் பாலினிலே விசங்கலந்தேனா...? ஏழை குடியிருக்கும் குடிசைகளைப் பிரித்தெறிந்தேனா... கொடுத்த கடன் இல்லையென்று மறுத்துரைத்தேனா...? நாளும் கொலை புரியும் பாவிகட்கு கொடிப்பிடித்தேனா...?


⟪ © ஆயிரங்காலத்துப் பயிர் ✍ கண்ணதாசன் ♫ S.M.சுப்பையா நாயுடு 🎤 T.M.சௌந்தரராஜன் @ 1963 ⟫

---

அதிகாரம் 38 ஊழ் (371-380)

---

371: இப்படிப் புலம்பிப் பாடுவதும் கூட விதி தானா...? மாத சம்பளம் வாங்கும் போதும் சரி, இப்போ வியாபார செய்து வாழும் வாழ்க்கையிலும் சரி, திருப்தி மட்டும் குறையல... அதனால மகிழ்ச்சியும் குறையல... தேவைக்கேற்ப வாழ்க்கையிலே எல்லா வளமும் கிடைக்குமென்று தெரிந்த பின்பும், செய்யும் தொழில்லே ஊக்கமும் குறையல... ஆனால், இப்போது இதெல்லாம் காணாமல் போய்விடுமோ என்று நினைச்சா, சோம்பல் உடனே வந்து எதிலும் ஈடுபட முடியலே... அட என்னடா பொல்லாத வாழ்க்கை...


371: ஆகூழால் தோன்றும் அசைவின்மை கைப்பொருள்
போகூழால் தோன்றும் மடி

---

372: அடேய் இதுக்குப் போய் அலட்டிக்கலாமா...? இப்படி நினைச்சிகிட்டே இருந்தா, உனக்குள்ளே இருக்கும் நானும், அறியாமைங்கிற விதியில் மூழ்க வேண்டியது தான்... வீதியில் சுற்றினால் விதி முடியும் என்பது இன்றைய விதி... பொறு... அழிவைத் தர்ற இன்றைய நிலை, ஆக்கம் தர்ற நிலையா மாறும்... அப்போ மட்டும் அறிவு விரிவடைந்து யோசிச்சு பயனில்லை... இப்போ தான் நிறைய யோசிக்கணும்... புத்தகங்களைப் படிக்கலாம்... பாடல்களைக் கேட்கலாம்... சோம்பலைத் தோற்கடிக்க இதுபோல் ஒரு அரிய வாய்ப்பு வராது...


372: பேதைப் படுக்கும் இழவூழ் அறிவகற்றும்
ஆகலூழ் உற்றக் கடை

---

373: புத்தகங்களைப் படித்தால் மட்டும் அறிவு...? என்னதான் வாழ்நாள் முழுக்க நுட்பமான கருத்துக்கள் உட்பட, பலதரப்பட்ட புத்தகங்களைப் படிச்சாலும், நமக்கு விதித்த விதிப்படி தான் இயல்பான அறிவு இருக்கும்...!


373: நுண்ணிய நூல்பல கற்பினும் மற்றுந்தன்
உண்மை யறிவே மிகும்

---

374: அதாவது இருந்துட்டுப் போவுது...! புத்தகங்களைப் படிக்கிறதாலே அறிவு பெருகுதோ இல்லையோ, அதனாலே நம் வாழ்வு முறை மேம்பட்டு இருக்குல்லே...? என்னதான் படிச்சாலும் மத்தவங்களுக்கு பயனா இருக்குறது தான் முக்கியம்... உலகத்திலே இருவேறு நிலை தெரிஞ்சிக்கோ... ஒன்னு பணம் படைத்தவன், இன்னொன்னு அறிவு படைத்தவன்... உன்னோட சிந்தனையிலே கேட்கிறேன், இதிலே எந்த விதி நமக்கு வேணும்...?


374: இருவேறு உலகத்து இயற்கை திருவேறு
தெள்ளிய ராதலும் வேறு

---

375: எந்த விதியும் வேண்டாம்... அளவிற்கு மேல் ஆசைப்படாம, இருக்கிறதை வைச்சிட்டு சந்தோசமா வாழலாம், நல்லதே நடக்கும்னு நினைச்சா கெட்டது நடக்க ஆரம்பிக்குது... கெட்டது நடந்து விடுமோன்னு பயந்தா உடனே நல்லது நடக்குது... அதனாலே இறைவன் வகுத்த தலைவிதியே போதும்...! என்னத்த சம்பாதித்து, என்னத்த கொண்டு போகப் போறோம்...?


375: நல்லவை எல்லாஅந் தீயவாம் தீயவும்
நல்லவாம் செல்வம் செயற்கு

---

376: ஐஐ... இந்த 'விதி'கதை எல்லாம் வேண்டாம்... நாம என்ன தான் எல்லாவற்றையும் கட்டிக் காத்தாலும், போகணும்னு இருந்தா போயே தீரும்... அதே சமயம் நாமே வேண்டவே வேண்டாம்னு வெளியே தள்ளினாலும், எதுவும் நம்மை விட்டுப் போகாது...! எத்தனை பாத்திருக்கோம்...? இப்போ என்ன, இதிலே உயிரையும் சேர்த்துக்க வேண்டியது தான்...!


376: பரியினும் ஆகாவாம் பாலல்ல உய்த்துச்
சொரியினும் போகா தம

---

377: இதைத்தான் 'விதி'ன்னு சொல்றேன்...! கோடானுகோடி செல்வ வளங்கள் இருந்தாலும், இறைவன் விதித்த விதிப்படிதான் நாம் அதை அனுபவிக்க முடியும்... அதுவும் வாழ்க்கை நெறிப்படி நாம் நடக்கா விட்டால், ஓரளவு கூட நம் விருப்பப்படி அனுபவிப்பது கடினம் தான்... நடப்பது எல்லாம் அவன் செயல்...


377: வகுத்தான் வகுத்த வகையல்லால் கோடி
தொகுத்தார்க்கு துய்த்தல் அரிது

---

378: நடப்பதெல்லாம் நன்மைக்கே...? நம்மளாலே...! நீ சொல்லும் விதியால், துன்பங்கள் எல்லாம் பறந்து விடும் என்றால், வறுமையால் தினந்தினம் துயரப்படுபவர்கள் எல்லாம் எப்போதோ துறவிகள் ஆகியிருப்பார்களே...! துறவு வாழ்க்கைக்கும் விதி உதவ வேண்டும் என்று சொன்னால் ஏற்றுக் கொள்கிறேன்... ஏன்னா, மெய்ப்பொருளை நாடுபவர்களின் துறவு, உலக நோக்கம் கொண்டது, தூய ஒழுக்கங்களும் நிறைந்தது... மானம் | குலம் | கல்வி | வண்மை | அறிவுடைமை | தானம் | தவம் | உயர்ச்சி | தாளாண்மை | காமம் | இந்த பத்தும், எது வந்தால் பறந்தே போகும்...?


378: துறப்பார்மன் துப்புர வில்லார் உறற்பால
ஊட்டா கழியு மெனின்

---

379: புரியுது, துறவியானாலும் சோறு தான் முக்கியம்...! சரி, வாழ்க்கையில் நன்மையும் தீமையும் மாறி மாறி வந்தால் தானே வாழ்க்கை...? இதில் ஒன்று மட்டும் தொடர்ந்தால், வாழ்வு முடியப்போகிறது என்று அர்த்தம் தானே...? நன்மை வரும்போது மட்டும் நல்லதாக ஏற்றுக்கொண்டு மனம் மகிழ்வது போல், விதியால் தீமை வரும்போது அதை ஏற்றுக்கொள்ளாது மனம் வருந்துகிறதே... ஏன்...?


379: நன்றாங்கால் நல்லவாக் காண்பவர் அன்றாங்கால்
அல்லற் படுவ தெவன்

---

380: செய்வதெல்லாம் செய்து விட்டு, பழியை விதியின் மீது போட்டால் எப்படி...? 'விதியை மதியால் வென்று விடலாம்' என்று எந்த வழியிலும் சென்று முயற்சி செய்தாலும், "வணக்கம் நலமா...?" என்று நம்முன் வந்து சிரித்துக்கொண்டே நின்று, வந்த வேலையை முடிக்கும்...! அதை விதி என்பதை விட, இயற்கையின் பேராற்றல் என்று சொல்ல வேண்டும்... அத்தகைய இயற்கை நிலையை மாற்றி மற்றொரு செயற்கை நிலையை அமைத்திட நினைத்தால், விதி வலியது தான்...! வெள்ளப் பெருக்கு, எரிமலை வெடிப்பு, நில நடுக்கம், மண்சரிவு என எத்தனையோ இயற்கைப் பேரழிவுகளை வென்ற தடுத்த மனிதன், இப்போது வந்துள்ள துயரத்தையும் மனம் தளராமல் இடைவிடாத முயற்சி செய்து, தடுத்து விடலாம்... ஆனால், இயற்கை செய்யும் விளையாட்டை யாராலும் கணிக்க முடியாது... அது, அரசியலில் பிழை செய்தவர்களை அறம் தண்டிப்பதை எவ்வாறு என்று, இதுவரை யாரும் அறுதியிட்டுச் சொல்லவே முடியாதது போல... இயற்கைக்கு எதிராக எதையும் செய்யக்கூடாது... செய்யவும் முடியாது என்பதையும், அதை எந்தக்காலத்திலும் மனிதன் வெல்லவே முடியாது என்பதை, அவ்வப்போது உணர வைப்பது தான் இயற்கையின் விதி...!

---

380: ஊழிற் பெருவலி யாவுள மற்றொன்று
சூழினுந் தான்முந் துறும்

---

புதிய பதிவுகளை பெறுதல் :

---

தொடர்புடைய எண்ணங்களின் வண்ணங்கள் சில :

முகநூல் மூலம் கருத்துக்களை பகிர :