நான் என் செய்வேன்...?

வணக்கம் நண்பர்களே... முதலில் ஒரு பாட்டு கேட்போமா...?


அவனை அழைத்துவந்து, ஆசையில் மிதக்கவிட்டு, "ஆடடா ஆடு" என்று, ஆட வைத்துப் பார்த்திருப்பேன்² படுவான், துடித்திடுவான், பட்டதே போதும் என்பான்² பாவி அவன் பெண் குலத்தைப் படைக்காமல் நிறுத்தி வைப்பான்... கடவுள் மனிதனாகப் பிறக்க வேண்டும் - அவன் காதலித்து வேதனையில் வாட வேண்டும்... பிரிவென்னும் கடலினிலே மூழ்க வேண்டும் - அவன் பெண்ணென்றால் என்னவென்று உணர வேண்டும்...!
மேலுள்ள பாடல் வரிகளை மட்டும் கேட்க → சொடுக்குக ►

⟪ © வானம்பாடி ✍ கண்ணதாசன் ♫ K.V.மகாதேவன் 🎤 T.M.சௌந்தரராஜன் @ 1963 ⟫

---

கவிஞரும் T.M.சௌந்தரராஜன் அவர்களும் பேசியதைக் கேட்டீர்களா...? முருகா...! பதிவிற்குச் செல்வோமா...? பிறந்து, வாடி, மூழ்கி, அப்படி என்ன உணர்ந்தான் காதலன்...? ஏனிந்த பிதற்றல்...? காரணம், எவ்வளவோ முயன்றும் தனது காதலியைச் சந்திக்க முடியவில்லை... அதனால் வந்த துயரத்தில், இறுதி முயற்சியாக தன் காதலை ஊராருக்குச் சொல்லி, காதலியை மணப்பதற்காகத் தன் நாணத்தை விட்டு, மடலேறுவேன் என்கிறான்... மடலேறுதல் என்றால் என்ன...? புரியவில்லையே...! அறிய "முன்னோட்டம்..." என்கிற பதிவை வாசிக்காதவர்கள் இங்கு சொடுக்கிச் சென்று, வாசித்து வந்து விடவும்...

---

என் மனதைப் பறித்துச்சென்று, என்னை விரும்பிய காதலியைச் சந்திக்கப் பலவழிகளில் முயன்றும் முடியவில்லையே... அதனால், எங்களது காதல் நிறைவேற வேண்டுமென்றால், நான் மடல் ஏறுதலைத் தவிர வேறு பலம் எனக்கில்லை...

காமம் உழந்து வருந்தினார்க்கு ஏமம்
மடலல்லது இல்லை வலி 1131

கண்ணாலே பெண்ணை அன்று கண்டது பாவம்... பாவம்... கொண்ட பின்னே பிரிவைச் சொல்லி வந்தது பாவம்... வெறும் கூடாகப் பூமியில் இன்னும் வாழ்வது பாவம்... வாழ்வது பாவம்... காதலுக்கே வாழ்ந்திருந்தேன் கற்பனை இல்லை... கல்யாணம் கொள்வது மட்டும் - என் வசமில்லை... என் வசமில்லை...
⟪ © பணக்கார குடும்பம் ✍ கண்ணதாசன் ♫ விஸ்வநாதன்-ராமமூர்த்தி 🎤 T.M.சௌந்தரராஜன் @ 1964 ⟫

---

அவளே எனது உயிரென்பதால், அவளைச் சந்திக்க முடியாமல் வரும் தடைகள் அனைத்தும், எனது உடலுக்கும் உயிருக்கும் மிகுந்த வலியைத் தருகிறது... அவளை அடைவதைவிட நாணம் பெரிதில்லை... அதைத் தூக்கி எறிந்துவிட்டு, துன்பத்தைப் பொறுக்காத எனது உடலும் உயிரும் ஒன்றாக மடல் ஏறத்தயங்காது...

நோனா உடம்பும் உயிரும் மடலேறும்
நாணினை நீக்கி நிறுத்து 1132

என்ன தவறு செய்தேன் அதுதான், எனக்கும் புரியவில்லை... வந்து பிறந்துவிட்டேன் ஆனால், வாழத் தெரியவில்லை... அருகில் இருந்து சொல்லிக் கொடுத்தால், உலகம் தெரியாதா ? அம்மா... விவரம் புரியாதா...? நான் உன்னை அழைக்கவில்லை... கண்ணை மறைத்துக்கொண்டால் மனதில், எண்ணம் மறைவதில்லை...
⟪ © எங்கிருந்தோ வந்தாள் ✍ கண்ணதாசன் ♫ M.S.விஸ்வநாதன் 🎤 T.M.சௌந்தரராஜன் @ 1962 ⟫

---

என்னிடம் முன்பிருந்த நாணமும், பல ஆற்றல்கள் கொண்ட நல்ல ஆண்மையையும், எனது திடமான உள்ளத்திலிருந்து தொலைத்து விட்டேனே... ஊரறிய மடலேறுவது வெட்கங்கெட்ட செயலாக இருந்தாலும், எனக்கு வேறு வழி இருப்பதாகத் தெரியவில்லையே...

நாணொடு நல்லாண்மை பண்டுடையேன் இன்றுடையேன்
காமுற்றார் ஏறும் மடல் 1133

யாருக்காக...? கண்கள் தீண்டும் காதல் என்பது - அது கண்ணில் நீரை வரவழைப்பது... பெண்கள் காட்டும் அன்பு என்பது - யாருக்காக...? எங்கிருந்து சொந்தம் வந்தது...? இன்று எங்கிருந்து நஞ்சு வந்தது...? அங்கிருந்து ஆட்டுகின்றவன் - தினம் ஆடுகின்ற நாடகம் இது...! யாருக்காக...? இது யாருக்காக...?
⟪ © வசந்த மாளிகை ✍ கண்ணதாசன் ♫ K.V.மகாதேவன் 🎤 T.M.சௌந்தரராஜன் @ 1972 ⟫

---

காதலுக்கு உதவாத இந்த நாணத்தையும், நல்லாண்மையையும் காத்துப் பொறுத்திருப்பதில் பயனில்லையே... விம்மிப் பெருகி விரைந்தோடும் இந்த காதல் பெருவெள்ளம், எனது ஞானம் உட்பட அனைத்தையும் அடித்துக் கொண்டு போய்விடுமோ என்று அஞ்சுகிறேன்... நான் என் செய்வேன்...?

காமக் கடும்புனல் உய்க்கும் நாணொடு
நல்லாண்மை என்னும் புணை 1134

என்னைப் படைத்ததும் ஏன்...? இன்பம் கொடுத்ததும் ஏன்...? - இதுபோலே பாதியிலே தட்டிப் பறித்ததும் ஏன்...?^{2 2} துன்பமெனும் நெருப்பாற்றில் எனை தூக்கி எறிந்ததும் ஏன்...?² கண் இல்லையோ...? மனம் இல்லையோ...? கலங்கும் என் நிலை மாற வழியில்லையோ...? செய்த பிழை என்ன...? தேகம் இருந்தென்ன...? உய்யும் வழி என்ன...? உனது தீர்ப்பென்ன...?
⟪ © பாசவலை ✍ அ.மருதகாசி ♫ விஸ்வநாதன்-ராமமூர்த்தி 🎤 C.S.ஜெயராமன் @ 1956 ⟫

---

நாம் என்ன செய்ய முடியும்...? இருக்கிறது, சொல்கிறேன்... அதற்குமுன் இவை (1131-1134) 114 நாணுத்துறவுரைத்தல் அதிகாரத்தின் குறளின் குரல்கள்... முன்னோட்டம் பதிவில் // காதலன் மடலேறி, பார்வை முழுவதும் தன் கையில் உள்ள கிழியின் மீது வைத்துக் கொண்டு, காதலியைப் பற்றிப் பாடிக் கொண்டேயிருப்பான் // என்று சொன்னேன் அல்லவா...? காதலன் பாடும் பாடல்களை நாம் கேட்க வேண்டாமா...? அதனால்..........

நாம் செய்ய வேண்டியது, மேலிருந்து ஒவ்வொரு இதயத்தையும் சொடுக்க வேண்டும்... குறளையும், அதற்கேற்ப திரைப்பாடல் வரிகளையும் கேட்டு ரசிக்கலாம்...! நன்றி... ☕

---

தொடரும்...

---

நண்பர்களே... நாணம் துறந்த தங்களின் அனுபவம் ஏதேனும்...?

---

புதிய பதிவுகளை பெறுதல் :

---

தொடர்புடைய எண்ணங்களின் வண்ணங்கள் சில :

முகநூல் மூலம் கருத்துக்களை பகிர :