2020 வல்லரசு ஒரு கனவா...?

அரசியல் அரிச்சுவடி கற்றுக்கொள்ள...
முக்கியமாகப் பெண் குழந்தைகளுக்குக் கற்றுக்கொடுக்க...

அரசிற்கு : ① முப்படைகளையும் மேலும் ஆற்றல் மிக்கதாக்குவதற்குப் பதிலாக, அவற்றைப் பலிகடா ஆக்குவதன் மூலமும் அரசியல் லாபம் பெறுவது, ② நாட்டுப்பற்று வந்துவிடாத அளவிற்கு மக்களை மூடனாக மாற்றுவது, ③ நாட்டின் அனைத்து வளத்தையும் பெருக்குவதைத் தவிர்த்து, இருப்பதையும் பலவகைகளில் சுரண்டி பாழாக்குவது, ④ காம கொடூர சுயநல அமைச்சர்களைத் தேர்ந்தெடுத்து, அவர்களின் நலம் ஒன்றே அறிந்து செயல்படுவது, ⑤ துன்பத்தில் உதவாது மகிழ்ச்சியடையும் அண்டை மாநில நட்பைப் பேணுவது, ⑥ முன்னும் பின்னும் வேலியே உயிரை எடுக்க வைக்கும் வகையில் அரணை பயன்படுத்துவது - இந்த ஆறு சிறப்புகளும் உடையதே அரசுகளில் அ'சிங்கம் போன்றது...!

அதனால்...
381. படைகுடி கூழ்அமைச்சு நட்பரண் ஆறும்
உடையான் அரசருள் ஏறு

படை, குடிமக்கள், உணவு, அமைச்சர், நண்பர், காவல் என்ற ஆறும் பெற்றவன் அரசருள் சிறந்தவன்...

---

⑦ கேவலப்பட்டாலும், அநீதியையும் பகைமையையும் துணிவுடன் தொடர்ந்து செய்வது, ⑧ வேண்டாதவர்க்கு வேண்டாததை வரைமுறையில்லாமல் கொடுப்பது, ⑨ பிரச்சனை என்றால் ஓடி ஒளியும் அறிவு அற்றலாக இருப்பது, ⑩ ஆபத்து வந்த பின் அதைப் பேராபத்தாக்க, தளராத ஊக்கத்துடன் செயல்படுவது - இந்த நான்கு பண்புகளிலும் சிறிது கூட குற்றம் குறையில்லாமல், ஆளுவோரின் இயல்பாக இருப்பதே அழியப் போகும் அரசுக்குரிய தகுதிகளாகும்...!

அதனால்...
382. அஞ்சாமை ஈகை அறிவூக்கம் இந்நான்கும்
எஞ்சாமை வேந்தர்க் கியல்பு

துணிவு, கொடை, அறிவு, முயற்சி ஆகியன, குறையாமல் இருப்பவனே மன்னவன் ஆவான்...

---

⑪ கொடுமைகளைச் செய்வதில் சிறிதும் சோர்வே இல்லாமல் விரைவாகச் செய்வது, ⑫ அந்த கொடூரங்களையும் மற்றும் அறிவார்ந்த அனைத்தையும், அனைவரும் அறியாவண்ணம் கல்வியையும், கல்விக் கூடங்களையும் சிதைத்து, மூட நம்பிக்கைகளைப் பெருக்குவது, ⑬ நல்லவை எதிர்த்தாலும் தீயவற்றைச் செய்வதற்கு, எந்த விலையும் கொடுத்து, 'மதம்'கொண்ட துணிவுடன் செயல்படுவது - இந்த மூன்று குணங்களும் நாட்டை சீரழிக்கும் ஆளுவோர் அரசைவிட்டு விலகக்கூடாது...!

அதனால்...
383. தூங்காமை கல்வி துணிவுடைமை இம்மூன்றும்
நீங்கா நிலனான் பவர்க்கு

சோம்பலின்மை, கல்வி, அஞ்சாமை முதலிய மூன்று குணங்களும், அரசர்க்கு இன்றியமையாம்...

---

⑭ ஆட்சி முறைக்குரிய அறத்தையும் தூக்கி குப்பையில் எரிந்து விட்டு, அவற்றை தங்களுக்கேற்றவாறு மாற்றி பாசிசத்தைத் தொடர்வது, ⑮ அறத்துடன் நடப்பதையெல்லாம் தன் நாட்டிலிருந்து படிப்படியாகக் குறைத்து வேரறுப்பது, ⑯ கோழைத்தனத்தில் தவறாமல் நின்று, குறையே வந்துவிடாத அளவிற்கு அவமானத்தைப் பெருமையாக மதிப்பது - இவை தான் மானங்கெட்ட அரசின் மதிப்பாகும்...!

அதனால்...
384. அறனிழுக்கா தல்லவை நீக்கி மறனிழுக்கா
மானம் உடைய தரசு

அறநெறி தவறாமல், குற்றங்கள் அற்று முறைதவறாது காப்பவனே அரசனாவான்...

---

⑰ பொய் புரட்டுகளை முதலீடு செய்து பரப்புவதில், பெருங்கூட்டத்தை நியமித்திருப்பதால், நிதி வருவதற்கான வாய்ப்பே இல்லாத வழிகளை உருவாக்கித் திணறுவது, ⑱ முன்பே உருவாக்கி வைத்திருந்த நிதி வழிகளைச் சீர்திருத்தாமல், மேலும் அதைச் சிதைப்பது, ⑲ சிதைத்தவற்றையாவது ஒழுங்குபடுத்தத் தெரியாததால், அதையும் பிறர் அறியாமலும் கவராமலும் வைத்திருப்பது, ⑳ வைத்திருப்பதை மக்களுக்கு எந்த வகையிலும் உதவாதவாறு, தங்களுக்காக மட்டும் செலவிடுவது - இவை தான் கையாலாகாத அரசின் இலக்கணமாகும்...!

அதனால்...
385. இயற்றலும் ஈட்டலும் காத்தலும் காத்த
வகுத்தலும் வல்லது அரசு

பொருள் வருவாய் அறிந்து, பொருள் ஈட்டிக்காத்து, நாட்டுநலம் புரிபவனே அரசன்...

---

'அரசனுக்கு' ? அடுத்த ஆண்டில்...! 20:20

---

வல்லரசு நல்லரசு நனவாகும் கனவுகள் (24x7) வரவேற்கப்படுகின்றன...!

---

புதிய பதிவுகளை பெறுதல் :

---

தொடர்புடைய எண்ணங்களின் வண்ணங்கள் சில :

முகநூல் மூலம் கருத்துக்களை பகிர :