தோன்றின் _____?_____ தோன்றுக

"அபியும் நானும்" திரைப்படத்தில் வரும் ஒரு காட்சி... அந்தப் படத்தை பார்க்காதவர்களுக்காக ஓர் விளக்கம் :- தெருவில் திரியும் ஒரு பிச்சைக்காரனை அழைத்து வந்து, "நம்முடனேயே இருக்கட்டும்" என்று தன் தந்தையிடம் சொல்கிறார் மகள்... அந்த மகளின் மனதில் எந்த உணர்வு மிகுந்திருக்கும்....? சிலரை "குழந்தை மனசுய்யா அவங்களுக்கு" என்கிறோமே அது என்ன...? வேறு மாதிரி சிந்திப்போம்...

கொலை, பொய், களவு, மது அருந்துதல், குரு நிந்தை ஆகிய பஞ்சமாபாதகம் உட்பட மேலும் பல கொடுஞ்செயல்கள் செய்பவரை, "இவனெல்லாம் மனுசனா...? இவனுக்கு __ + _____ எல்லாம் இருக்காதா...?" எனத் திட்டுகிறோம்... அறிந்து விட்டீர்களா...? ஆம் அதே தான்...! இனி படிப்படியாகத் தெரிந்து கொண்டு, புரிந்து பேசுவோம் வாங்க...

முந்தைய பதிவை வாசிக்காதவர்கள் இங்கே சொடுக்கி பின்னூட்டங்களையும் வாசித்து விட்டு தொடர வேண்டுகிறேன்...

---

எனது மனதுடன் ஓர் உரையாடல்...
தோன்றின் _____?_____ தோன்றுக அஃதிலார்
தோன்றலின் தோன்றாமை நன்று (குறள் எண் : 236)
என்னடா இது... ஒரு குறளுக்கு இவ்வளவு அக்கப்போரா...? படிச்சவுன்னே விளக்கம் புரிய வேண்டாமா...? இப்படி எல்லா பதிவர்களையும் அலைக்கழிக்கிறே, இது நியாயமா ? நான் ஒரு முடிவுக்கு வந்துட்டேன் !

படிச்சவுன்னே புரியிறதுக்கு இது கதையல்ல... உண்மையை தெரிஞ்சிக்கணும்ன்னா மெனக்கெடனும்... பின்னூட்டங்களைப் பார்த்தே இல்லே... அலைக்கழிப்பா அது...? இல்லை, ஆர்வமாக, உண்மையைத் தேடும் தேடல்... நானென்ன எல்லா குறளையுமா படிக்கச் சொன்னேன்...? அந்த அதிகாரத்திலே உள்ள குறள்களைத் தானே சொன்னேன்... இருட்டிலே மோதிரத்தை தொலைச்சிட்டு, "வெளிச்சத்தில் தேடுவோம் வாங்க"-ன்னு முல்லா கதை மாதிரி சொல்றே...!

ஹேஹே... நீயும் சொல்லிட்டே...! குறள் விளக்கத்தை 'வாசிக்கிறவங்க தான் சொல்லணும்'கிற வீராப்பை விட்டுடு... எனக்கு ரொம்ப இளகிய மனசு, "புகழ்"ன்னா என்னான்னு சொல்லிடப் போறேன்...! என்னால முடியலே...!

கொஞ்சம் பொறுத்தால் பலபேர் இன்னும் சிந்திப்பாங்க இல்லே... பலரின் சிந்தனைகளால் நம் சிந்தனை மேம்படும் இல்லே... இப்படி பண்ணிட்டியே...! ஏனிந்த இரக்கம்...?

நீ என்ன புதிரா போட்டே, அவங்க விடை சொல்றதுக்கு...? கருத்துரை சொன்னவங்க சில பேரு, கிட்டக்க கிட்டக்க வந்துட்டாங்க... சொன்ன விதம் தான் வேறு... முடிவிலே அர்த்தம் - நாம நினைச்சது மாதிரி இருக்குல்லே...! அதுவுமில்லாமே, அடுத்த மாசம் ஊர் ஊரா சுத்தணுமில்லே...?!

வீராப்பு கேன்சல்...! "ஆடிக்கு ஒரு தரம், அமாவாசைக்கு ஒரு தரம்" பழமொழி போல, நடுவே வெள்ளிவிழா பதிவைத் தவிரப் போன வருசம் ஆடியிலே பதிவு போட்டது, இந்த ஆடியிலே தொடங்கியிருக்கு...!

வியாபாரத்திற்காக எப்போ ஓடுவோம்-ன்னு தெரியாது... அப்போ நேரம் கிடைக்குமா...? இந்தளவு சிந்தித்து எழுத முடியுமா...? அதனாலே..........

ம்... பார்ப்போம்... சரி, "புகழ்"ன்னா என்னான்னு நீயே சொல்லு...

என்னத்த மறுபடியும் சொல்றது... நாம பேசியதிலேயே இருக்கே...! நீ ஆரம்பி... தகராறு பண்ண பாட்டு வரிகளோடு வர்றேன்...!

---

வணக்கம் நண்பர்களே... முந்தைய பதிவில், 'தேடித் தேடி' கருத்துரை சொன்னவர்களுக்கும், சிந்தித்தவர்களுக்கும் எனது நன்றிகள் பல... புகழ் எனும் சொல்லுக்கு, மனதின் ஈரம் அல்லது இரக்கம் என்கிற பொருளே சரி... நடைமுறை பேச்சு வழக்கில் புகழ் என்பதற்கு என்ன சொல்வார்கள்...? பெருமை அல்லது சிறப்பு என்பார்கள்... சரி "புகழ்தல்" என்றால் என்ன...? அனைத்து பெருமைகளையும் விளக்கமாக விரிவாகப் போற்றிச் சொல்லும் "பெருமை பேசுதல்" ஆகும்... இந்தப் பெருமை எனும் சொல் உணர்த்தும் முதல் நிலைப் பொருள் 'இரக்கம்' என்பதே... இரக்கமில்லா மனிதருக்குப் பெருமையே கிடையாது, பொறுமையும் கிடையாது...

புகழ் அதிகாரத்தில், ஐந்து முறை வரும் புகழ், நான்கு முறை வரும் இசை எனும் சொற்களும், ஒரு முறை வரும் வித்து எனும் சொல்லும், இரக்கப் பொருளில் தான் திருவள்ளுவர் சொல்லியுள்ளார்... அதை வரும் பதிவுகளில் சிந்திப்போம்... இப்போது நம் குறளுக்கு (236) பொருத்திப் பார்ப்போம் :-

ஒவ்வொரு செயலும் முயற்சியும் தோன்றும்போது இரக்கம் எனும் புகழ் நோக்கம் கொண்ட உயிர்கள் பிறக்க வேண்டும்... அவ்வாறு நோக்கம் இல்லாமல் தோன்றுவதினும் பிறக்காமல் போவதே நல்லது...

தன் பிள்ளைகளுக்காக எவ்வித தியாகமும் செய்யும் தந்தை, "நீயெல்லாம் பிறக்காமலே இருந்திருக்கலாம்..." என்பதையும், தன்னையே தியாகம் செய்யும் தாயோ, "உன்னையெல்லாம் பெத்ததுக்கு நான் செத்திருக்கலாம்..." என்பதையும் இன்றைக்கு அதிகமாகப் பார்க்கிறோம்... இந்தக் கொடுமையெல்லாம் அந்தக் காலத்திலேயே இருந்திருந்தால் இந்தக் குறளோ...? என்று நினைத்தால், அது மேலோட்டமாக குறளை புரிந்து கொள்வது போல... அதற்காக "யார் மீது தவறாக இருக்கும்" என்றோ, "பெற்றோர்கள் தரும் அறிவுரை / ஆலோசனை / தண்டனை மூலம் சரியாகும்" என்றோ சிந்திப்பது இங்கு முக்கியமல்ல... தன் மகனே தவறு செய்தாலும், அவனைக் கொல்வதைத் திரைப்படத்தில் (இந்தியன்) பார்க்கலாம்... ஆனால், நிஜத்தில்...? அப்படிப்பட்ட தந்தையின் வெறுப்பும் தாயின் துயரமும் எப்படி சமாதானம் அடையும் என்பது தான் முக்கியம்... அது :- "நம்ம புள்ளே வேறே எப்படி இருப்பான்...? நம்மளை மாதிரி தான்...!"

ஆக, முதலில் வளர்த்த விதமும், பிறகு அவர்கள் வளர்ந்த விதமும் பொறுத்துத் தான் அனைத்தும் அமையும் என்பார்கள் பலர்... இன்றைக்கு நினைத்துப் பார்க்கவே முடியாத பல குற்றங்கள் நடப்பது ஏன்...? பலரும் கல்நெஞ்சர்களாக மாற்றிக் கொண்டிருக்கிறார்கள்... இரக்கமற்ற மனிதர்களின் வழி வந்தவர்கள் எண்ணிக்கை பெருகுகிறது... இப்படிப்பட்ட ஆட்களைத் தான் பிறக்காமல் இருப்பதே நல்லது என்கிறார் திருவள்ளுவர்...

சரி, "இப்படி எல்லாம் எங்கள் குடும்பத்திலேயே... அவ்வளவு ஏன், எங்கள் பரம்பரையிலேயே கிடையாது..." என்றால், ஈவும் இரக்கமும் உடைய தயாள சிந்தனை கொண்டவர்களின் வழி வந்தவர்கள்... அவர்கள் எல்லாம் நெஞ்சில் இரக்கத்துடன் இருப்பார்கள்... ஆக, இரக்கம் என்பது வழிவழியாக தொடரும் ஒரு குலத்தின் பண்பு ஆகும்... இந்த பண்பு தான் அதிகம் பெருகி, உலகம் வளம் பெற வேண்டும், அதனால் இந்த உலகில் உயிர்கள் பிறப்பதானால் இரக்கத்துடனே பிறக்கட்டும் என்று நம்ம தாத்தா விரும்புகிறார்...

---

எந்தக் குழந்தையும் நல்ல குழந்தைதான் - மண்ணில் பிறக்கையிலே² பின் நல்லவராவதும் தீயவராவதும் - அன்னை வளர்ப்பதிலே² ⟪ © நீதிக்கு தலை வணங்கு ✍ புலமைப்பித்தன் ♫ M.S.விஸ்வநாதன் 🎤 K.J.யேசுதாஸ் @ 1976 ⟫

அடேய்... வந்துட்டியா...? அன்னைக்கு பதிலா ஆயா...! இன்னைக்கு பல வீட்டிலே அப்படித்தான்...! சரி, அதை விடு... எந்த அம்மாவாவது, "தண்ணியடி, புகைபிடிக்க கத்துக்கோ, திருடு, கொள்ளை அடி, கொலை செய்"-ன்னு சொல்லியா கொடுக்குது...? "நல்ல பண்பு தவறிய பிள்ளையைப் பெற்றவர் - பேர் சொல்லி வாழ்வதில்லை..." பாட்டு முடிவிலே இப்படி இருக்கே... இதைத் தான் சிந்திக்க வேண்டும்...

குழந்தையும் தெய்வமும் குணத்தால் ஒன்று - குற்றங்களை மறந்து விடும் மனத்தால் ஒன்று... நடந்ததெல்லாம் நினைப்பதெல்லாம் துயரம் என்று - ஞானிகளும் மேதைகளும் சொன்னார் அன்று... ⟪ © குழந்தையும் தெய்வமும் ✍ வாலி ♫ M.S.விஸ்வநாதன் 🎤 P.சுசீலா @ 1965 ⟫

க்கும்... இதிலேயும் "பிள்ளைகளாய் இருந்தவர் தான் பெரியவரானார் - அந்தப் பெரியவர்கள் கோபத்தினால் சிறியவரானார்² கள்ளமில்லா உள்ளத்தினால் பிள்ளைகளெல்லாம்² - என்றும் கண்ணெதிரே காணுகின்ற தெய்வங்களானார்²" வரிகள் முக்கியம்... சாகப்போகிற நேரத்திலே ஞானம் வந்தா...? குழந்தைகளா இருக்கும் போது எல்லோரும் தெய்வங்கள் தான்...! பிறகு ஏன் மாறுது...? அப்பா அம்மா செய்ற எல்லாத்தையும் பாக்குது, கேட்குது, பழகுது... வளர வளர, நல்லதோ கெட்டதோ அதுவும் கூடவே வளருது...! இதைத்தான் பிறவிக்குணம்-ன்னு சொல்வாங்க...! மனசுலே ஏதோ ஒன்னு இடறுகிறதே... ம்,சரி... நான் பாட்டு பாடினா தான் நீ அடங்குவே...!

திட்டும் வாயைப் பூட்டி வச்சாலும், திருடும் கையை கட்டி வச்சாலும், தேடும் காதை திருகி வச்சாலும், ஆடும் கண்களை அடக்கி வச்சாலும்² - மாறாதையா மாறாது... மனமும் குணமும் மாறாது... ⟪ © குடும்பத்தலைவன் ✍ கண்ணதாசன் ♫ K.V.மகாதேவன் 🎤 T.M.சௌந்தரராஜன் @ 1962 ⟫

ஓ... பெற்றோரும் எப்போ மாறுவாங்க-ன்னு கேட்கிறியா...? அப்பாவை மீண்டும் இரக்கத்தை கற்றுக் கொடுக்கும் காட்சியும் உண்டு... தெருவில் திரியும் ஒரு மனநிலை சரியில்லாத பெண்ணிற்கு, பர்ஸோடு தனது சட்டையும் கொடுத்து விட்டு, வீட்டிற்கு பனியனோடு நடந்து போகும் அப்பாவின் பெருமித காட்சி...! இன்றைக்குக் குழந்தைகளிடமிருந்து(ம்) பெற்றோர்கள் கற்றுக் கொள்ள வேண்டும் என்பதை ஆழமாகச் சொல்லும் திரைப்படம்... நல்லவர் நட்பு, இரக்கக் குணம், கொடைப் பண்பு, இன்னும் பல நல்ல நல்லொழுக்கங்களும் பிறவியிலேயே பதிந்திருந்தால்தான் வரும் என்பார்கள்... இந்த மாதிரி குழந்தை இருந்தால், பிறவிக்குணமும் மாறலாம்... மனசே, இடறல் சரியாச்சி... தெளிவா இன்னொன்றும் சொல்லியாகணும்...

இப்படியும் உண்டு... சிலர் மிகவும் ஈகையுடனும் இரக்கத்துடனும் வாழ்கிறார்கள்... இதற்கு எதிர்மறையாக வாழ்ந்தவர்கள் அவர்களின் பெற்றோர்கள்...! சமீபத்தில் அந்த நண்பரைச் சந்தித்தேன்... குறள் விளக்கத்தில், "இரக்கமற்ற மனிதர்களின் வாரிசுகள்... தயாள சிந்தனை கொண்டவர்களின் வாரிசுகள்..." என்று சொல்லாமல், இரு வரிகளிலும் "வழி வந்தவர்கள்" என்று சொன்னதற்குக் காரணம் இது தான்... இரக்கத்திற்கு உதாரணமான விவசாயி மழையை வேண்டுவது போல் நாமும் வேண்டுவோம் :-

இரக்கமே இ_ர/ற_ங்கி வந்து உலகைச் சூழ்...

---

மேலும் தங்களின் விளக்கம் என்ன நண்பர்களே...?

---

புதிய பதிவுகளை பெறுதல் :

---

தொடர்புடைய எண்ணங்களின் வண்ணங்கள் சில :

முகநூல் மூலம் கருத்துக்களை பகிர :