இந்த உலகம் உணர்த்தும் ஒரு பாடம்...!

வணக்கம் நண்பர்களே... "எதை வைச்சி என்னை நினைப்பாங்க...?"-ன்னு நம்ம ஐயன் எங்காவது கேள்வி கேட்டுள்ளாரா...? என்பதை அறிய, இதன் முந்தைய பதிவை வாசிக்காதவர்கள் இங்கே சொடுக்கி வாசித்து வந்தால் தான், அதற்கு நம்ம ஐயன் சொன்ன தீர்வை இந்த அதிகாரத்தின் முடிவில் உள்ள குறளில் அறிய முடியும்...
⟪ © பாலும் பழமும் ✍ கண்ணதாசன் ♫ விஸ்வநாதன்-ராமமூர்த்தி 🎤 T.M.சௌந்தரராஜன் @ 1961 ⟫ இரவல் தந்தவன் கேட்கின்றான் - அதை இல்லை என்றால் அவன் விடுவானா...? உறவைச் சொல்லி அழுவதனாலே - உயிரை மீண்டும் தருவானா...? கூக்குரலாலே கிடைக்காது - இது கோர்ட்டுக்குப் போனால் ஜெயிக்காது - அந்தக் கோட்டையில் நுழைந்தால் திரும்பாது... போனால் போகட்டும் போடா² இந்த பூமியில் நிலையாய் வாழ்ந்தவர் யாரடா...? போனால் போகட்டும் போடா... || இன்றைய நாட்டு நிலையில் சிலர் பாடும் பாடல் இதுவாக இருக்குமோ...? அதற்காக இப்பதிவில் உள்ள குறள் விளக்கமும், குறள்களுக்கேற்ப திரைப்படப் பாடல் வரிகளும் "அவர்களுக்காக" என்று வாசிக்க வேண்டாம்...

கறுப்புப்பணம் மட்டுமல்ல... அளவிற்கு அதிகமாகப் பொன், பொருள் வைத்திருப்பவர்களுக்காக அன்றே நம்ம ஐயன் என்ன சொல்லியுள்ளார் என்பதைப் பார்ப்போம்... வாங்க...

பாடல் வரிகளைக் கேட்க, பாடலின் ஆரம்பத்தில் உள்ள பிளேரை இருமுறை சொடுக்கவும்... நன்றி... இதுவரை சந்தித்த, வாழ்ந்த, வாழ்கிற மனிதர்களைப் பற்றிய எனது அனுபவத்தில்... குறளின் குரலாக:- வாசிக்க.. ரசிக்க.. கேட்க..!

---

அதிகாரம் 101 - நன்றியில் செல்வம்...(1006-1010)

---

தானும் அனுபவிக்காமல், தகுதியானவர்க்குத் தரும் எண்ணமே இல்லாமல் வாழ்பவரிடம் இருக்கும் பெரும் செல்வம் எத்தகையது தெரியுமா...? அந்த செல்வத்துக்கே தீராத ஒரு நோய் போன்றவர்...

ஏதம் பெருஞ்செல்வம் தான்துவ்வான் தக்கார்க்கொன்று  
ஈதல் இயல்பிலா தான் (1006)  

இன்றிருப்போர் நாளை இங்கே இருப்பதென்ன உண்மை - இதை எண்ணிடாமல் சேர்த்து வைத்துக் காத்து என்ன நன்மை...?² இருக்கும் வரை இன்பங்களை அனுபவிக்கும் தன்மை - இல்லையென்றால் வாழ்வினிலே உனக்கு ஏது இனிமை...? ⟪ © மானமுள்ள மறுதாரம் ✍ அ மருதகாசி ♫ K.V.மகாதேவன் 🎤 சீர்காழி கோவிந்தராஜன் @ 1958 ⟫

---

அற்புதமான அழகுடைய தேவதை போல் ஒருத்தி, தன்னந்தனியாகவே வாழ்ந்து கிழவியானது போலத் தான், ஏதும் இல்லாதவர்க்கு மனதார ஏதாவது ஒன்றைக் கொடுத்து உதவாதவரின் செல்வம்...!

அற்றார்க்கொன்று ஆற்றாதான் செல்வம் மிகநலம்  
பெற்றாள் தமியள்மூத் தற்று (1007)  

தவற்றுக்கும் தவறான தவற்றைப் புரிந்துவிட்டு, தனிப்பட்டுப் போனவன் ஞானப்பெண்ணே² பதறி பதறி நின்று கதறி புலம்பினாலும் - பயன்பட்டு வருவானோ ஞானப்பெண்ணே...?² // சிங்காரம் கெட்டு சிறைப்பட்ட பாவிக்கு, சம்சாரம் ஏதுக்கடி - தங்கம் சம்சாரம் ஏதுக்கடி...?² மனைவியைக் குழந்தையை மறந்து திரிந்தவனை வாழ்த்துவதாகாதடி² தங்கம் மன்னிக்க கூடாதடி... ⟪ © தங்கப் பதுமை ✍ பட்டுக்கோட்டை கல்யாணசுந்தரம் ♫ விஸ்வநாதன்-ராமமூர்த்தி 🎤 C.S.ஜெயராமன், பத்மினி (வசனம்) @ 1959 ⟫

---

கஞ்சத்தனத்தால் யாருக்கும் எந்த உதவியும் செய்யாமல், எல்லோரிடமும் வெறுப்பையும் சம்பாதித்து வைத்திருக்கிறவரின் செல்வமும், ஊர் நடுவே நச்சு மரத்தில் காய்த்துக் குலுங்குகின்ற பழமும் வெவ்வேறானவையல்ல...!

நச்சப் படாதவன் செல்வம் நடுவூருள்  
நச்சு மரம்பழுத் தற்று (1008)  

நல்ல குணத்தை இழப்பவன் இறுதியிலே - நல்ல சுகம் அடைவதேது... ? // வாஸ்தவம் குணத்தை இழந்தேன், கொண்டவளைத் துறந்தேன், கண்டவள் பின் சென்றேன், கட்டுடலையும் இழந்தேன், இன்று கண்ணையும் இழந்தேன்... வாழ்க்கையில் எனக்கு நிம்மதி ஏது...? ஏது...? // குற்றம் புரிந்தவன் வாழ்க்கையில் நிம்மதி கொள்வதென்பதேது...? ⟪ © ரத்தக் கண்ணீர் ✍ கு.சா.கிருஷ்ணமூர்த்தி ♫ விஸ்வநாதன்-ராமமூர்த்தி 🎤 C.S.ஜெயராமன் @ 1954 ⟫

---

சொந்த பந்தங்க கிட்டே கூட அன்போடு இருக்காம, நாய் பெற்ற தெங்கம் பழம் போல ஒருத்தரிடம் இருக்கும் பணமும் பொருளும், யாருக்கு கடைசியில் உதவும்...? அடுத்தவங்க கொண்டு போய் அனுபவிப்பாங்க...!

அன்பொரீஇத் தற்செற்று அறநோக்காது ஈட்டிய  
ஒண்பொருள் கொள்வார் பிறர் (1009)  

பட்டணத்தில் பாதி இவன் வாங்கி முடித்தான்... அந்த பட்டயத்தில் கண்டது போல் வேலி எடுத்தான்... அதில் எட்டடுக்கு மாடி வைத்து, கட்டிடத்தைக் கட்டி விட்டு, எட்டடிக்குள் வந்து படுத்தார்... மண்ணை கொட்டியவன் வேலி எடுத்தான்...! ஹோய்... உண்டாக்கி விட்டவர்கள் இரண்டு பேரு... இங்கே கொண்டு வந்து போட்டவர்கள் நாலு பேரு... கொண்டாடும் போது ஒரு நூறு பேரு... உயிர் கூடுவிட்டு போன பின்னே கூட யாரு...? ⟪ © முகராசி ✍ கண்ணதாசன் ♫ K.V.மகாதேவன் 🎤 T.M.சௌந்தரராஜன் @ 1966 ⟫

---

இத்தனையும் அறிந்து தெரிந்து புரிந்து உணர்ந்து, பிறர்க்குக் கொடுத்துப் பழகி சந்தோசமாக வாழும் புகழ்மிக்கவர்களுக்கு வறுமைப்பட நேர்ந்தால்...? அது மழை தரும் மேகமே வறுமைப்பட்டது போல சில நாட்கள் தான்...!

சீருடைச் செல்வர் சிறுதுனி மாரி  
வறங்கூர்ந் தனையது உடைத்து (1010)  

வெள்ளத்தினால் வரும் பள்ள மேடு போல் - செல்வம் வரும் போகும்... இதை எள்ளளவேனும் எண்ணாத கஞ்சர்க்குத் துன்பம் வரவாகும்...! கள்ளமில்லாத அன்பு செல்வமே என்றும் நிலையாகும்...!² கஷ்டம் தீரும்... கவலைகள் மாறும்... இன்பம் உருவாகும்... வெள்ளிப் பணத்துக்கும் நல்ல குணத்துக்கும் வெகு தூரம்... இது உள்ளபடி இந்த உலகம் உணர்த்தும் ஒரு பாடம்...! ⟪ © சபாஷ் மாப்பிள்ளை ✍ அ.மருதகாசி ♫ K.V.மகாதேவன் 🎤 P..B.ஸ்ரீனிவாஸ் @ 1961 ⟫

---

நண்பர்களே... ஒரு நிறைவான பாடலோடு பதிவை நிறைவு செய்கிறேன்... PLAY பட்டனைச் சொடுக்கிப் பாடல் வரிகளைக் கேட்டவர்களுக்கும் நன்றி... தங்களின் கருத்து என்ன...?(படம்:தர்மம் தலை காக்கும்|பாடல் வரிகள்:கண்ணதாசன் | வருடம்:1963) அள்ளிக்கொடுத்து வாழ்பவன் நெஞ்சம் ஆனந்த பூந்தோப்பு... வாழ்வில் நல்லவர் என்றும் கெடுவதில்லை - இது நான்குமறை தீர்ப்பு² என்றும் தர்மம் தலை காக்கும்... தக்க சமயத்தில் உயிர் காக்கும்... கூட இருந்தே குழி பறித்தாலும்... கொடுத்தது காத்து நிக்கும்... ம்ம்ம்... செய்த தர்மம் தலை காக்கும்... தக்க சமயத்தில் உயிர் காக்கும்...

---

புதிய பதிவுகளை பெறுதல் :

---

தொடர்புடைய எண்ணங்களின் வண்ணங்கள் சில :

முகநூல் மூலம் கருத்துக்களை பகிர :