இதயமே இதயமே...

பனியாக உருகி நதியாக மாறி - அலை வீசி விளையாடி இருந்தேன்... தனியாக இருந்தும் உன் நினைவோடு வாழ்ந்து - உயிர் காதல் உறவாடிக் கலந்தே நின்றேன்... இது எந்தன் வாழ்வில் நீ போட்ட கோலம்...² கோலம் கலைந்ததே புது சோகம் பிறந்ததே... நீயில்லாத வாழ்வு இங்கு கானல்தான்... இதயமே இதயமே... உன் மௌனம் என்னைக் கொல்லுதே... இதயமே இதயமே...

⟪ © இதயம் ✍ வாலி ♫ இளையராஜா 🎤 S.P.பாலசுப்பிரமணியம் @ 1991 ⟫

"இதயமே இதயமே..." இப்படிப் பல சுகமான சோகங்கள் ஆண்கள் வாழ்வில்...! பெண் மனம் படும்பாட்டை யாரறிவார்...? வேறு யார்...? நம்ம ஐயனைத் தவிர...! நலம் புனைந்துரைத்தல் (இணைப்பு : -நிலவே மலரே) பற்றி எழுதும் போது குறள் விளக்கத்திற்கேற்ப பாடல்கள் தேர்ந்தெடுக்கச் சிரமம் இல்லை... ஆனால் இன்று எந்தப் பாடல் பொருத்தமாக இருக்கும் அல்லது ஆறுதலாக இருக்கும் என்பதோடு, மனம் விட்டு அகலாத அந்தப் பாடல்களின் படங்கள், பார்த்த இடமான டூரிங் கொட்டகைகள், அந்த வயதில் மனதிற்குள் பறந்த பட்டாம்பூச்சிகள் ! என எழுத ஓரிரு பதிவுகள் போதாது... ம்... போதும்...?!

125 "நெஞ்சோடு கிளத்தல்" அதிகாரத்தில், தன் நெஞ்சிடம் கேள்விகள் மூலம் பெண் மனம் படும்பாட்டைச் சொல்லி விட்டார் நம்ம திருவள்ளுவர்... நான் என் மனம் பாடும் பாட்டையும் சொல்லியுள்ளேன்...! ரசிக்கச் செல்வோமா...?

---

நெஞ்சமே...! இப்படி அவரை நினைத்து காதல் நோயால் துன்பப்படுகிறேனே, அது உன் கண்ணுக்குத் தெரியவில்லையா...? இந்தக் காதல் நோயைத் தீர்க்க மருந்து எதுவும் இருக்கிறதா என்பதைச் சிந்தித்துப் பார்த்து, நீயாவது சொல்ல மாட்டாயா...? காதலுக்குக் கண்ணில்லை என்பது உண்மையோ...?

நினைத்தொன்று சொல்லாயோ நெஞ்சே எனைத்தொன்றும்  
எவ்வநோய் தீர்க்கும் மருந்து (1241)  

என்னை எடுத்துத் தன்னைக் கொடுத்து... போனவன் போனாண்டி... தன்னைக் கொடுத்து என்னை அடைய வந்தாலும் வருவாண்டி... ஓ..ஓ..ஓ... போனவன் போனாண்டி... நெஞ்சை எடுத்து நெருப்பினில் வைத்து, போனவன் போனாண்டி ஹோய்... நீரை எடுத்து நெருப்பை அணைக்க, வந்தாலும் வருவாண்டி ஹோய்... வந்தாலும் வருவாண்டி ஹோய் ஹோய் ஹோய்... போனவன் போனாண்டி... ⟪ © படகோட்டி ✍ வாலி ♫ விஸ்வநாதன் ராமமூர்த்தி 🎤 P.சுசீலா @ 1964 ⟫

---

நெஞ்சமே...! மருந்தைச் சொல்லாமல், துன்பம் விளைவிப்பதும், நன்மை தருவதும் எதுவென்று எண்ணாமல், அவரால் உண்டாகும் தீமையை ஏற்றுக் கொண்டு, நன்மையை விட்டு விடும் முட்டாளாகவே வாழ்ந்து விட்டு போ...! அவர் என்னிடம் காதல் இல்லாதவராக இருக்க, நீ மட்டும் அவரையே எப்போதும் நினைத்து நினைத்துப் பார்த்து, கவலை கொள்ளும் மூடத்தனத்தை என்னவென்று சொல்வது...?

காதல் அவரிலர் ஆகநீ நோவது  
பேதைமை வாழியென் நெஞ்சு (1242)  

நினைக்கத் தெரிந்த மனமே உனக்கு மறக்கத் தெரியாதா...? பழகத் தெரிந்த உயிரே உனக்கு விலகத் தெரியாதா...? உயிரே விலகத் தெரியாதா...? மயங்கத் தெரிந்த கண்ணே உனக்கு உறங்கத் தெரியாதா...? மலரத் தெரிந்த அன்பே உனக்கு மறையத் தெரியாதா...? அன்பே மறையத் தெரியாதா...? ⟪ © ஆனந்த ஜோதி ✍ கண்ணதாசன் ♫ விஸ்வநாதன் ராமமூர்த்தி 🎤 P.சுசீலா @ 1963 ⟫

---

நெஞ்சமே...! நீ கவலைப்பட்டு என்ன பயன்...? ஆமாம், என் கூடவே இருந்து கொண்டு, அவர் வருவதை எண்ணி நீ வருந்துவதும் ஏன்...? அவர் என்மீது இரக்கப்படும் எண்ணமே இல்லையே... இந்நிலையில் அவரிருக்கும் இடத்திற்கும் செல்ல முடியாமல், இங்கேயே இறந்தும் போகாமல் தவித்துத் தத்தளிப்பது ஏன்...?

இருந்துள்ளி என்பரிதல் நெஞ்சே பரிந்துள்ளல்  
பைதல்நோய் செய்தார்கண் இல் (1243)  

வாசலிலே உன் காலடி ஓசை கேட்டிருப்பேன்... வந்தவுடன் உன் ஆசை முகத்தைப் பார்த்திருப்பேன்... கண்ணில் நீரைக் காணாமல், கவலை ஏதும் கூறாமல், என்னை எண்ணி வாழாமல், உனக்கென நான் வாழ்வேன்...! எங்கே நீயோ நானும் அங்கே உன்னோடு... ⟪ © நெஞ்சிருக்கும் வரை ✍ கண்ணதாசன் ♫ எம்.எஸ்.விஸ்வநாதன் 🎤 P.சுசீலா @ 1967 ⟫

---

நெஞ்சமே...! நீ தவித்தாலும் வருந்தினாலும் சரி... அடுத்த முறை அவரிடம் போகும் போது, எனது இரண்டு கண்களையும் கொண்டு சென்று விடு... அவரைக் காணவேண்டும் என்கிற ஆவலில் என் இரு கண்களும் என்னையே பிடுங்கித் தின்று விடுவது போல் திணற வைக்கிறது...!

கண்ணும் கொளச்சேறி நெஞ்சே இவையென்னைத்  
தின்னும் அவர்க்காணல் உற்று (1244)  

பச்சைக் கிளியானால் பறந்தேனும் தேடுவேன்... பாடி வரும் தென்றல் தேரேறி ஓடுவேன்...² சென்ற இடம் காணேன், சிந்தை வாடலானேன், சேதி சொல்லும் யாரும் தூது செல்லக் காணேன்...² கண்கள் இரண்டும் என்று உம்மைக் கண்டு பேசுமோ...?² காலம் இனி மேல் நம்மை ஒன்றாய்க் கொண்டு சேர்க்குமோ...? கண்கள் இரண்டும் என்று உம்மைக் கண்டு பேசுமோ...? ⟪ © மன்னாதி மன்னன் ✍ கண்ணதாசன் ♫ விஸ்வநாதன் ராமமூர்த்தி 🎤 P.சுசீலா @ 1960 ⟫

---

நெஞ்சமே...! நீயே சொல்... உனக்கு அந்தளவு தைரியமிருக்கிறதா என்பதையும் சொல்...! என்னை விரும்பாத அவர் மீது நான் காதல் கொண்டு விரும்பி சென்றாலும், என்னை வெறுத்து விட்டார் என்று நினைத்து, அவர் மீது கொண்ட காதலைக் கைவிட்டு விட முடியுமா...?

செற்றார் எனக்கை விடல்உண்டோ நெஞ்சேயாம்  
உற்றால் உறாஅ தவர் (1245)  

ஒரு மட மாது உருகுகின்றாளே - உனக்கா புரியவில்லை...? இது சோதனையா ? நெஞ்சின் வேதனையா ? - உன் துணையேன் கிடைக்கவில்லை...?² நெஞ்சம் மறப்பதில்லை... ⟪ © நெஞ்சம் மறப்பதில்லை ✍ கண்ணதாசன் ♫ விஸ்வநாதன் ராமமூர்த்தி 🎤 P.B.ஸ்ரீனிவாஸ், P.சுசீலா @ 1963 ⟫

---

பெண் மனம் பாடும் ஆறுதல், ஏக்கப் பாடல்களோடு விரைவில் அடுத்த பகுதியைத் தொடர்கிறேன்... இதயத்தைத் தொலைத்த பாடலோடு ஆரம்பித்த இப்பதிவு, இதயத்தைக் கொடுத்த பாடலோடு முடித்தால் "நமக்கும்" ஆறுதலாக இருக்கும் இல்லையா...?

உந்தன் நெற்றி மீதிலே - துளி வேர்வை வரலாகுமா...? சின்னதாக நீயும்தான் - முகம் சுழித்தால் மனம் தாங்குமா...? உன் கண்ணிலே துளி நீரையும் - நீ சிந்தவும் விடமாட்டேன்... உன் நிழலையும் தரை மீதிலே - நடமாடவும் விடமாட்டேன்... ஒரே உடல் ஒரே உயிர் ஒரே மனம்... நினைக்கையில் இனிக்கிறதே... நீயே என் இதயமடி... நீயே என் ஜீவனடி... ஒரு முறை பிறந்தேன்... ஒரு முறை பிறந்தேன்... உனக்கென உயிரையும் நான் கொடுப்பேன்... மனதினில் உன்னைச் சுமப்பதினாலே - மரணத்தைத் தாண்டி வாழ்ந்திருப்பேன்.... என் கண்ணில் உனை வைத்தே - காட்சிகளைப் பார்ப்பேன்... ஒரு நிமிடம் உனை மறக்க - முயன்றதிலே தோற்றேன்... நீயே என் இதயமடி... நீயே என் ஜீவனடி...

⟪ © நெஞ்சிருக்கும் வரை ✍ தாமரை ♫ சிறீகாந்து தேவா 🎤 ஹரிஹரன், சாதனா சர்கம் @ 2006 ⟫

---

இதன் அடுத்த பகுதி இங்கே சொடுக்கித் தொடரவும்... அதற்கு முன் இந்தப் பதிவைப் பற்றித் தங்களின் கருத்து என்ன...?

---

புதிய பதிவுகளை பெறுதல் :

---

தொடர்புடைய எண்ணங்களின் வண்ணங்கள் சில :

முகநூல் மூலம் கருத்துக்களை பகிர :