மூடன்... அறிவாளி... ஏமாளி...

ஆசை ஒரு நீரோட்டம் நில்லாம ஓடும்... உள்ளுக்குள்ளே ஏதேதோ சங்கீதம் பாடும்... ஒன்னாக கலந்த உறவுதான்... எந்நாளும் இன்பம் வரவுதான்... இது காதல் என்கிற கனவு... தினம் காண எண்ணுற மனசு... இது சேர துடிக்குற வயசுதான்... வாழ்க்கையே கொஞ்சக் காலம்தான்... இந்த வாழ்க்கையில வாலிபம் கொஞ்ச நேரம்தான்...

⟪© பாலைவன ரோஜாக்கள் ✍ கங்கை அமரன் ♫ இளையராஜா 🎤 இளையராஜா @ 1986 ⟫


வர வர உன் புலம்பல் தாங்க முடியலே மனசாட்சி... போன பதிவுலே என்னடான்னா துறவியாகப் போகிறேன்னு பயமுறுத்துறே... இப்ப என்னடான்னா வாலிபம் கொஞ்ச நேரம்தாங்கிறே... கொஞ்சுகிற நேரம் கொஞ்சம் தான்... வாழ்க்கையிலே கெஞ்சுகிற நேரம் தான் இருக்கக்கூடாது... நான் சொல்வது நம்மகிட்டேயே... 20 வயது வரை சாப்பிடுவதற்காக வாழு... 20 வயதிற்குப் பின்னால் வாழ்வதற்காகச் சாப்பிடு... இல்லேன்னா நம்ம உடம்புகிட்டேயே நாம கெஞ்சணும்...! வயது பற்றி உன் அபிப்பிராயம்...?

'டக்'ன்னு பொய் சொல்ல வைக்கும் கேள்வி எல்லாம் கேட்கப்படாது... சரியா...? "வயசாயிடுச்சி" இந்த நினைப்பே தளர்ச்சியை ஏற்படுத்தும்... க்கும்... க்கும்... மனதிற்கு வயதில்லை...! அடப்பாவி...! 40 என்பதை 20 ஆக்கிட்டே...! ம்... அதுவும் சரி தான்... நீரழிவு குறைபாட்டில் உலகில் முதலிடம்; இப்போ மாநிலங்களுக்குள்ளே போட்டி...! ம்... விவசாயம் அப்படி...! சாப்பாடு அப்படி...!

இந்த அளவு அளவு என்பதை நாக்கிற்கு யாரும் சொல்லித் தருவதில்லை... உடம்பு ஒரு நாள் சொல்லித் தரும்... இன்றைய உணவைச் சாப்பிடும்... கவனி→படிப்பறிவே இல்லாத பெரியவங்க கூட இன்னைக்கும் சும்மா "கிண்"ன்னு இருக்காங்களே... ஏன்...? இருக்கும் வரை உழைப்பு...! அதனால் மனதும் "கிண்"...! அவர்களால் சும்மா இருக்க முடியாது... அழகான உலகை அற்புதமாக ரசிக்கிறார்கள் அதிகாலையிலிருந்து...! ஆமா உழைப்பு விடச் சிறந்த படிப்பு இருக்கா...?

நமக்குத் தூக்கமே சொர்க்கம்... பிறகு துக்கம்...! ஹிஹி... நேத்து பக்கத்து வீடு குறுகுறு-குறும்பு பையனிடம், "என்ன படிக்கிறாய்...?" என்று கேட்டேன்... L.K.G.ன்னு சொல்லிட்டு, "இன்னும் எதுவரை படித்தால் படிப்பு முடியும்...? படிப்பிலேயே உச்சமான படிப்பு எது...? அதைப் படிக்க இன்னும் எத்தனை வருசமாகும்...?" அப்படின்னு நான் கேட்ட ஒரு கேள்விக்கு, அவன் பல கேள்விகள் கேட்டுட்டான்... ஸ்... யப்பா... முடியலே...!

L.K.G. படிக்கத் தொடங்கும் போதே, வெவரமான + வெவகாரமான கேள்விகளை இன்றைய குழந்தைகள் கேட்பதில் வியப்பில்லை... படிப்புக்கு எல்லை உண்டு... இளங்கலை, முதுகலை பிறகு முனைவர் பட்ட ஆராய்ச்சி என்று படிப்புக்கு எல்லை உண்டு; ஆனால் கல்விற்கு எல்லை கிடையாது...

என்னது படிப்பு : கல்வி - இரண்டும் வேறு வேறா...?

பள்ளி, கல்லூரிகளுக்குச் சென்று படிப்பதும் கல்வி தான்... ஆனால் அவை எல்லாம் எல்லைக்கு உட்பட்ட, ஒரு வட்டம் போட்டுப் படிக்கிற படிப்பு... இன்னும் இதற்குப் பாடத்திட்டம் உண்டு... பரிச்சை உண்டு... குழந்தைகளை... இல்லை இல்லை பெற்றோர்களைப் பாழாக்கும் Pass, Fail உண்டு... தேர்வானதுடன் படிப்பும் முடிந்து போகும்... கல்வி என்பது அப்படிப்பட்டது கிடையாது... அது பரந்து விரிந்தது... நம்முடைய ஆர்வமும் விருப்பமும் விரிவடைய விரிவடைய நமது கல்வியும், கற்கும் காலமும் விரிவடையும்... அதனால் தான் ஒரு தலைமுறையில் கற்ற கல்வியின் அறிவானது, ஏழேழு தலைமுறைக்கும் உதவும் என்று சொன்ன ஐயன், "ஒவ்வொரு மனிதனும் சாகும்வரைக்கும் கல்லாமலிருப்பது எதனால்..?" என்று கேட்கிறார் இங்கு :-
யாதானும் நாடாமால் ஊராமால் என்ஒருவன்
சாந்துணையுங் கல்லாத வாறு. (397)

G. M. பாலசுப்ரமணியம் ஐயா அவர்கள் முந்தைய பதிவு கருத்துரையில் சொன்னது போல் திருக்குறளும், திரைப்படப் பாடல்களும்... அதாவது உன் ஸ்பெசாலிட்டி இல்லாமல் ஒரு பதிவு எழுதுவதென்பது கொஞ்சம் சிரமம் போலிருக்கே...! கதை எதுவும் சொல்லாமல் இருக்கே... இருக்கா...?

எத்தனை உடல் உபாதைகள் இருந்தாலும், ஒற்றை விரலால் பகிர்ந்து கொண்டிருக்கிறாரே... அவரின் ஆர்வத்தையும் முயற்சியையும் என்னவென்று சொல்வது...? வலைத்தள உலகம் பொருத்தமட்டில் தனது அனுபவ பகிர்வுகள் பிறர்க்குப் பாடங்களாக... வாழ்க்கைக்குப் பாதை காட்டும் வழிகாட்டிகளாக... கருத்துரையால் ஊக்குவிக்கும்... இவ்வளவு ஏன்...? தொழினுட்பத்திலும் பல முயற்சிகள் செய்கிறார்கள்... அப்புறம் குறளின் சிறப்பை சொல்வதோ, அதில் இல்லாதது எதுவுமில்லை என்று சொல்வதோ எனது நோக்கமல்ல... குறள்களின் படி வாழ முயற்சி செய்து கொண்டிருக்கிறேன்... ISO வகுப்பு எடுக்கும் போது உதவின குறள்கள்... அது வேறு கதை...(!) இப்போ ஒரு உண்மை நிகழ்வைச் சொல்லட்டுமா...?

சுவாமி இராம தீர்த்தர் ஒருமுறை ஜப்பானுக்குக் கப்பலில் பயணித்துக் கொண்டிருந்த போது, ஒரு ஜப்பானிய முதியவர், கண்களில் ஒரு தடித்த கண்ணாடியைப் போட்டுக் கொண்டு, தட்டுத்தறுமாறி எதையோ படித்துக் கொண்டிருந்ததைப் பார்த்தார்... "என்ன செய்து கொண்டிருக்கிறீர்கள்" என்று கேட்டார்... அதற்கு "சீன மொழி கற்றுக் கொள்ள வேண்டுமென்று நீண்ட நாட்களாக ஆசை... அதனால் தான் அந்த மொழியைத் திரும்பத் திரும்பப் படித்து, எழுதிப் பார்க்கும் முயற்சியை ஈடுபட்டுக் கொண்டிருக்கிறேன்" என்றார் முதியவர்.... "மற்ற எந்த மொழியை விடவும் சீன மொழியைக் கற்றுக் கொள்ளக் கடினம் என்கிறார்களே..." என்று கேட்டார் இராம தீர்த்தர்... "கடினமான மொழி என்பதற்காகக் கற்றுக் கொள்ளாமல் இருக்க முடியுமா...?" என்றார் முதியவர்... "சீன மொழியைக் கற்றுக் கொள்ளப் பல வருடங்களாகும் என்கிறார்கள்... மிகுந்த பலவீனமான உடல்நிலையில், கைகால்கள் எல்லாம் சொன்னபடி கேட்காத நிலையில் இருக்கிறீர்கள்... உங்களைப் பார்த்தால் வயது தொண்ணூறைத் தாண்டியவர் போலத் தோன்றுகிறீர்கள்... இந்த இறுதிக் காலத்திலும் இம்முயற்சி தேவையா...? என்று கேட்டார் இராம தீர்த்தர்... ஜப்பானிய முதியவர் படித்துக் கொண்டிருந்த புத்தகத்தை மடித்து வைத்துக் கொண்டு, கண்களை அகல விரித்து சுவாமி இராம தீர்த்தரைப் பார்த்து :-

---

"வாழ்க்கை என்பது தங்குதடையற்ற ஒரு பிரவாகம்... தொடர்ந்து நீரோட்டம் இருந்து கொண்டே இருக்க வேண்டும்... வாழ்க்கை நீரோட்டத்தில் ஓய்வு என்பதே இல்லை... நீரோட்டம் நின்று போனால், அது நதியாக இருக்க முடியாது... நமது வாழ்க்கை நீரோட்டத்தில் எப்போதும் புதிய புதிய முயற்சிகளில் ஈடுபட்டுக் கொண்டே இருக்க வேண்டும்... அப்போது தான் வாழ்க்கையில் மகிழ்ச்சி குறையாமல் இருக்கும்... வயது ஏறுகிறதே என்று வருத்தப்படாமல், முயற்சியும் உழைப்பும் குறையாமல் இருக்கிறதே என்று மகிழ்ச்சிப்பட வேண்டும்... அப்போது தான் வாழ்க்கையும் இனிக்கும்... ஆயுளும் நீளும்"

---

ஒருவனுக்கு ஒருத்தியென்ற உயிர்மூச்சை உள்ளடக்கி...

அறனெனப் பட்டதே இல்வாழ்க்கை
அஃதும் பிறன்பழிப்ப தில்லாயின் நன்று

எனும் திருக்குறளை மறவாதே... விதி தவறிப் போகாதே... வாழ்க்கை என்னும் ஓடம் - வழங்குகின்ற பாடம் - மானிடரின் மனதினிலே மறக்கவொண்ணா வேதம்... வாலிபம் என்பது தணிகின்ற வேடம் - அதில் வந்தது வரட்டும் என்பவன் முழு மூடன்... வருமுன் காப்பவன் தான் அறிவாளி - புயல் வருமுன் காப்பவன் தான் அறிவாளி - அது வந்த பின்னே தவிப்பவன்தான் ஏமாளி...! துடுப்புகள் இல்லா படகு - அலைகள் அழைக்கின்ற திசையெல்லாம் போகும்... தீமையைத் தடுப்பவர் இல்லா வாழ்வும் - அந்தப் படகின் நிலைபோலே ஆகும்² (படம் : பூம்புகார்)

⟪ © பூம்புகார் ✍ மு.கருணாநிதி ♫ R.சுதர்சனம் 🎤 K.B.சுந்தராம்பாள் @ 1964 ⟫

---

மகிழ்ச்சியும் ஆயுளும் ஆர்வமாகக் கற்றுக் கொள்வதின் மூலம் நீளும் என்றால், கற்றுக் கொள்வதை எல்லாத் துறைகளிலும் உருவாகிக் கொள்வோமே நண்பர்களே... தங்களின் கருத்து என்ன... ?

---

புதிய பதிவுகளை பெறுதல் :

---

தொடர்புடைய எண்ணங்களின் வண்ணங்கள் சில :

முகநூல் மூலம் கருத்துக்களை பகிர :