என் வலி... தனி வழி...!

வணக்கம் நண்பர்களே... (1) படிப்பிற்கேற்ற வேலை கிடைக்கவில்லை என்பதற்காக, தெரிந்த அல்லது சொந்த தொழிலைத் தைரியமாகச் செய்பவர்களுக்கு... (2) அறிவை தந்த தந்தையின் பாரத்தையும், அன்பே அனைத்தும் எனும் தாயின் மனதையும், தன் பொறுப்புகளையும் எந்தச் சூழ்நிலையிலும் மாறாது உணர்ந்தவர்களுக்கு... (3) எப்பேர்ப்பட்ட வலிகள் இருந்தாலும், தொடர்ந்தாலும்... நல்ல எண்ணங்கள், பண்புகள், குணங்கள், மற்ற அனைத்தும் தளராத, அயராத உழைப்பின் மூலம் மட்டுமே என்று அறிந்து தெரிந்து புரிந்தவர்களுக்கு - இன்று மட்டுமல்ல... என்றும் நமக்குத் தொழிலாளர் தினம் தான்... அனைவருக்கும் வாழ்த்துக்கள்...


471 வேலைக்குப் போகணும்ன்னு நான் விரும்புறேன்... நீ சொந்தமா தொழில் செய்யணும்ன்னு உறுதியா இருக்கே... சரி... உன்னோட பலம் எனக்குத் தெரியும்... செய்யப் போற வேலை, உனக்கு உதவி செய்யப் போறேன்னு சொல்றவங்க பலமும், அதே சமயம் இந்தத் தொழிலை செய்றவங்க பற்றியும், நல்ல யோசனை பண்ணிட்டுதாம்பா தொழிலை தொடங்கணும்...

வினைவலியும் தன்வலியும் மாற்றான் வலியும்
துணைவலியும் தூக்கிச் செயல்

472 அப்பா... எல்லாத்தையும் ஆராய்ச்சி செய்து, எனக்குப் பொருத்தமான தொழில் தான்னு உறுதியான முயற்சியோடு இருக்கேன்... அதனாலே முடியாததுன்னு ஏதும் இல்லை...

ஒல்வ தறிவது அறிந்ததன் கண்தங்கிச்
செல்வார்க்குச் செல்லாதது இல்

473 உணர்ச்சி வயப்பட்டு ஒரு தொழிலை ஆரம்பிச்சிட்டு, "என் பலம் இவ்வளவு தான், நேரம் சரியில்லை... எதுவும் ஒத்து வரலே…" இப்படிச் சொல்லிட்டு, தொழிலைத் தொடர முடியாமல் இடையிலேயே விட்டுவிட்டு, கெட்டுப் போனவங்க உலகத்திலே பல பேர் இருக்காங்க...

உடைத்தம் வலியறியார் ஊக்கத்தின் ஊக்கி
இடைக்கண் முரிந்தார் பலர்

474 என்னப்பா... என் திறமை எனக்குத் தெரியாதா...? மத்தவங்களை மதிக்காம, அவங்க சொல்றதையும் கேட்காம, "எனக்கு எல்லாம் தெரியும்"ன்னு தன்னைத் தானே பெரிசா நினைக்கிறவங்கதாம்பா சீக்கிரத்தில் கெட்டுப் போவாங்க... நான் அப்படி இல்லே...

அமைந்தாங் கொழுகான் அளவறியான் தன்னை
வியந்தான் விரைந்து கெடும்

475 நல்லாவே தெரிஞ்சி வச்சிருக்கே... சந்தோசம்யா... ஆனா, அனுபவம் இல்லாத இந்த வயசுலே, இவ்வளவையும் இழுத்துப் போட்டு எப்படிச் செய்வேன்னு ஒரு சின்ன பயம்... ஏன்னா, மயிலிறகு ஏற்றின வண்டியே ஆனாலும், அளவுக்கு மீறி போச்சின்னா, வண்டியின் அச்சு முறிந்துபோகும்ன்னு சொல்வாங்க...

பீலிபெய் சாகாடும் அச்சிறும் அப்பண்டம்
சால மிகுத்துப் பெயின்

476 அளவுக்கு மீறி ஆசைப்பற்றவங்க தான் அப்படி... ஒரு மரத்திலே நுனிக்கொம்பில் ஏறினவங்க, அதற்கு மேலேயும் போகணும்ன்னு நினைச்சா என்னப்பா ஆகும்...? அந்த மாதிரி என்னைப்பற்றி அதிகமாகக் கணக்குப் போடமாட்டேன்...

நுனிக்கொம்பர் ஏறினார் அஃதிறந் தூக்கின்
உயிர்க்கிறுதி ஆகி விடும்

477 சரிப்பா... எனக்கு இன்னும் சில வருசங்க தான் வருமானம் வரும்... உன் தங்கை பத்தாவது தான் படிக்கிறா... எல்லாத்தையும் மனசிலே வச்சி தீர்மானமா சொல்றேன், உனக்கென்னு சிறுகச் சிறுக வங்கியிலே சேர்த்து வைச்சிருக்கிறதை தர்றேன்... அதனோட மதிப்பை நீயும் உணர்ந்து, உயர்த்திக் காப்பாத்தணும்பா...

ஆற்றின் அளவறிந்து ஈக அதுபொருள்
போற்றி வழங்கு நெறி

478 1500 கடனோட வாழ்க்கையை ஆரம்பிச்சி, அக்காவையும் நல்லபடியா கல்யாணம் பண்ணிக் கொடுத்து, என்னையும் படிக்க வைக்கலையா...? உங்க அனுபவம் தான் மூலதனமே... கவலையேபடாதீங்கப்பா... எனக்கும் பொறுப்பு இருக்கு... இந்தத் தொழிலே ஆரம்பத்திலே சின்ன வருமானம் வந்தாலும் சேமிப்பு தான் செய்யப் போறேன்... கண்டமேனிக்குச் செலவு செஞ்சா, என்னென்ன கேடெல்லாம் வருமென்பது எனக்குத் தெரியும்... சேமிப்புப் பணம் ஓரளவு சேர்ந்த பின்னாடி தான், தொழிலைப் பெரிசா செய்யணும்னு எண்ணமே இருக்கு... எல்லாம் அம்மாகிட்டே கத்துக்கிட்டது...

ஆகாறு அளவிட்டி தாயினுங் கேடில்லை
போகாறு அகலாக் கடை

479 நீ இப்படித் தன்னம்பிக்கையா பேசுறது எவ்வளவு சந்தோசமா இருக்கு தெரியுமா...? நம்மகிட்டே இருக்கிறதை வச்சி, சந்தோசமா வாழ்ந்தாலே போதும்பா... இல்லேன்னா வாழ்க்கையிலே எல்லாம் இருக்கிற மாதிரி இருக்கும்... ஆனா, சீக்கிரம் நாம காணாம போயிடுவோம்...

அளவறிந்து வாழாதான் வாழ்க்கை உளபோல
இல்லாகித் தோன்றாக் கெடும்

480 சரியாச் சொன்னீங்கப்பா... மாசாமாசம் வங்கியிலே சேமிச்சது போக, மிச்ச பணத்தை அப்படியே அம்மாகிட்டே கொடுக்குறீங்க... அம்மா, அதிலேயும் எப்படியோ மிச்சம் பிடிச்சி, வீட்டுக்குத் தேவையானது மட்டும் வாங்கிப் போட்டு, வீட்டு நிர்வாகம் பண்ணலையா...? நான் கேட்கிற போதெல்லாம் நீங்க அள்ளிக் கொடுத்தா, பணத்தோட அளவும் குறைஞ்சி போகும், எனக்கும் பணத்தோட மதிப்பும் தெரியாமப் போகும்... நன்றிப்பா...

உளவரை தூக்காத ஒப்புர வாண்மை
வளவரை வல்லைக் கெடும்

---

நன்றி என்னும் குணம் கொண்ட, நன்மை செய்யும் மனம் கொண்ட நல்லதொரு குடும்பம் பல்கலைக்கழகம் என, பல சந்தோசமான குடும்பங்களின் திருப்தியான வாழ்க்கையைச் சிந்திக்கும் போது உதவிய, நம்ம வள்ளுவரின் அதிகாரம் (48) வலியறிதல் எனக்கு வழியறிதல்... வலிகள் இன்றி வாழ்க்கை இல்லை... வலிகளை ஏற்றுக் கொண்டால் வழிகள் பிறக்கும்...

என் வலி... தனி வழி...! (வள்ளுவரின் வலி வாழ்க்கைக்கு வழி)
⟪ © நாடோடி மன்னன் ✍ கவி லக்ஷ்மணதாஸ் ♫ S.M.சுப்பையா நாயுடு 🎤 சீர்காழி கோவிந்தராஜன் @ 1958 ⟫


இதுவும் தொழிலாளர்கள் பற்றிய பகிர்வு தான்... அறிய இங்கே சொடுக்கித் தொடர்வதற்கு முன் இந்தப் பதிவைப் பற்றி... நண்பர்களே... தங்களின் கருத்து என்ன ?

---

புதிய பதிவுகளை பெறுதல் :

---

தொடர்புடைய எண்ணங்களின் வண்ணங்கள் சில :

முகநூல் மூலம் கருத்துக்களை பகிர :