சுயநலம் தேவை...!

பிறக்கும் போதும் அழுகின்றாய்... இறக்கும் போதும் அழுகின்றாய்...² ஒரு நாளேனும் கவலையில்லாமல் சிரிக்க மறந்தாய் மானிடனே² அன்னையின் கையில் ஆடுவதின்பம்; கன்னியின் கையில் சாய்வதும் இன்பம்² தன்னை அறிந்தால் உண்மையில் இன்பம்... தன்னலம் மறந்தால் பெரும் பேரின்பம்...பெரும்பேரின்பம்...



⟪ © கவலை இல்லாத மனிதன் ✍ கண்ணதாசன் ♫ M.S.விஸ்வநாதன் 🎤 J.P.சந்திரபாபு @ 1960 ⟫


கண்ணதாசன் அவர்கள் "தன்னலம் மறந்தால்" என்பதற்குப் பதில் "தன்னலம் துறந்தால்" அப்படிங்கிறதையும் ஏற்கனவே ஒரு பதிவில் கொஞ்சம் சொல்லிட்டே... (படிக்காதவர்கள் இங்கே சொடுக்கி பிறகு வாசிக்கலாம்) இப்ப ஒரு சந்தேகம்... அதாவது, நம்முடைய செயல்களில் தன்னலம் தான் ஒளிந்திருக்கிறது என்று சொல்கிறார்களே, அது உண்மையா...? அப்படிச் சுயநலமாக இருப்பது சரியா? அப்படியிருந்தால், குடும்பம் உருப்படுமா ? பொதுநலம் பேணுவது, பிறர் நலத்திற்காகப் பாடுபடுவதெல்லாம் எப்போது..?

உருப்படியா கேள்விகள் மனசாட்சி... நாட்டில் அடுத்தவர்களுக்கு உதவுகிறவர்கள் எத்தனை பேர் ? பிரதிபலன் கருதாமல் தர்மம் செய்பவர்கள் எத்தனை பேர் ? உயிரையும் துச்சமென மதித்து நாட்டின் பாதுகாப்பிற்காக வாழ்பவர்கள் எத்தனை பேர் ? உழைப்பைத் தவிரச் சிறந்த தெய்வம் எதுவுமில்லை என்று உழைப்பவர்கள் எத்தனை பேர் ? - இவர்கள் அனைவரின் செயல்களிலும் சுயநலம் எப்படி ஒளிந்திருக்கும்...? பொதுநலம் தானே மேலோங்கி இருக்கும்...! நல்லதைப் பார்ப்போமே...!

எதற்கெடுத்தாலும் அடுத்தவங்களுக்கு, இல்லேன்னா நாட்டுக்கு ! முதல்லே நம்மளப் பத்தி சொல்லு... கேள்விகளெல்லாம் எவ்வளவு வேகமா வருது...?

பலரின் சுயநலத்திலே பொதுநலமும் இருக்குன்னு சொல்ல வந்தேன்... சரி... ஒரு உளவியல் அறிஞர் சொல்கிறார் : சாலையோரத்தில் பிச்சை போடுகிறோமே பிச்சைக்காரர்களுக்கு, அதில் கூடத் தன்னலம் ஒளிந்து இருக்கிறதாம் ! எப்படி ? பிச்சை கேட்கிற பெரியவர், மூதாட்டி, குழந்தை - இப்படி யாரைப் பார்த்தாலும், அவர்களில் நம் தந்தை, தாய், குழந்தைகள் முகம் தெரிவதால் தான் பிச்சை போடுகிறோமாம்... இது எப்படி இருக்கு...?

அசிங்கமா இருக்கு...! வேறு ஏதாவது புரியிற மாதிரி சொல்லுப்பா...!

---

அசிங்கமாவா ? சரி... இந்த உலகத்திலே இருக்கிற நிலத்தையெல்லாம் எல்லோருக்கும் சரிசமமா பிரித்துக் கொடுத்திடலாமா...?

ஐ... அருமையான யோசனை...! கொடுத்திடலாம் மேலே சொல்லு...

இருக்கிற தங்கத்தையெல்லாம் சரிசமமா பிரித்துக் கொடுத்திடலாமா ?

பேஷ் பேஷ்...! பிரமாதம்...!!! சுறுசுறுப்பு இப்பத்தான் வருது...!!!

அதே போல இருக்கிற ஆடு மாடுகளையெல்லாம் கூடச் சரிசமமா...?

வேணாம்... ஏன்னா எனக்குன்னு சொந்தமா 20, 30 ஆடு மாடுகள் இருக்கு...!

அதானே...! ஊருக்கென்று பொதுநலம் பேசுகிற நாம், தனக்கென்று வரும்போது ரொம்பவே சிந்திக்க ஆரம்பிக்கிறோம்... ஹா... ஹா...

---

சுறுசுறுப்பு டொய்ங் தன்னலம் கருதாத பொதுநலம் சாத்தியமேயில்லையா ?

வேறு மாதிரி யோசிப்போம்; தன்னலச் சேவைகளிலே பொதுநலம் கருதுவது சாத்தியமாகுமா ? நிச்சயமாக முடியும் ! நாம் நம்முடைய தேவைக்கேற்ப... ஒஓ அதுவே சந்தேகம் தான்; சரி, தேவைக்கேற்பத் தான் சம்பாதிக்கிறோம் என்றே இருக்கட்டும்... சம்பாதிக்கிற பணத்தில் நியாயமான பகுதியை வரிப்பணமாக நாட்டுக்குச் செலுத்தி விட்டால், அது கூட பொதுநலம் தான் !

அதைச் சொல்லு முதல்லே ↔ வீடு உருப்படும்...! அப்படி ஒழுங்கா, ஒழுக்கமா சம்பாதிச்சா, நம்முடைய குழந்தைகளை நல்லெண்ணத்தோடு படிக்க வைச்சி சாதிக்கலாம்... அவங்க படிக்கிற படிப்பும், தேடுகிற வேலையும் நாட்டுக்குப் பயன்படுகிற வகையிலிருந்தாலே போதும், அதுவே பொதுநலமாக ஆகிவிடும்... நாடும் உருப்படும்...! இந்தச் சுயநலம் தேவை...! தப்பில்லை...!

ஆரம்பத்திலே உருப்படியா கேள்வி கேட்டு, இப்போ பதிலும் சொல்லிட்டே...! ம்... நம்மின் எந்தச் செயலும் நம்மிடமிருந்தே தான் தொடங்க வேண்டும்; ஆனால், செயலின் முடிவு பொதுநலமாக இருந்தால் போதும் ! அதுவே தன்னலத்தில் பொதுநலம் கருதும் செயலாக அமைந்து விடும்...!

தங்களின் கருத்து என்ன நண்பர்களே...?
இப்போ மேலே நான் சொன்னதே என்னைக் கேள்வி கேட்குது, என்னென்னா : "ஒழுங்கா, ஒழுக்கமா" எல்லாம் சரி தான்... இந்த "நம்முடைய" நினைப்பாலே தான் கூட்டுக் குடும்பம் இல்லையோ...? முறைக்காதே...! அடுத்த பதிவுக்கு அச்சாரம்ன்னு வைச்சிக்கோ... ஹிஹி... "தன்னலம் துறந்தால்"-ன்னு கவிஞர் ஏன் எழுதலைன்னு லேசா புரியுது..! வேற பாட்டு பாடிட்டு கிளம்புறேன்..!

'நாடென்ன செய்தது ந‌ம‌க்கு...?' - என கேள்விகள் கேட்பது எதற்கு...? 'நீயென்ன செய்தாய் அதற்கு...' - என நினைத்தால் நன்மை உனக்கு...!² 'நான் ஏன் பிறந்தேன்...? நாட்டுக்கு நலம் என்ன புரிந்தேன்...?' - என்று நாளும் பொழுதும் வாழும் வரையில்... நினைத்திடு என் தோழா... நினைத்துச் செயல்படு என் தோழா... உடனே செயல்படு என் தோழா...


⟪ © நான் ஏன் பிறந்தேன் ✍ வாலி ♫ சங்கர் கணேஷ் 🎤 T.M.சௌந்தரராஜன் @ 1972 ⟫

---

புதிய பதிவுகளை பெறுதல் :

---

தொடர்புடைய எண்ணங்களின் வண்ணங்கள் சில :

முகநூல் மூலம் கருத்துக்களை பகிர :