நான் பேசி நீங்கள் கேட்டு என்ன பயன்...?

பொய் சொன்னாலும், மெய் சொன்னாலும், வாயால் சொல்லிப் பலனில்லே...!² - அதை மையில நனைச்சிப் பேப்பரில் அடிச்சா, மறுத்துப் பேச ஆளில்லே...!² உலகம் இதிலே அடங்குது, உண்மையும் பொய்யும் விளங்குது...!² கலகம் வருது-தீருது, அச்சுக்கலையா நிலைமை மாறுது...!²



⟪ © குலமகள் ராதை ✍ கண்ணதாசன் ♫ K.V.மகாதேவன் 🎤 T.M.சௌந்தரராஜன் @ 1963 ⟫

நல்ல பாட்டு மனசாட்சி... வருங்காலத்தில் நிலைமை வேற மாதிரி...!

என்னப்பா இப்படி சொல்லிட்டே...! புத்தகங்கள் படிக்கலேன்ன எப்படி...? சரி அதை விடு... மனிசங்க ஓரளவிற்கு மனிசங்களா இருக்கணும்ன்னா எத்தனை சதவீதம் சரியா இருக்கணும்...?

இப்படி கேள்வி கேளு...! "படிக்கலேன்ன" என்பதை "வாங்கலேன்ன" என்றும் சொல்லலாம்...! இது நுகர்வு யுகம்... எல்லாவற்றிலுமே "ஏதாவது தள்ளுபடி கிடைக்குமா...?" என்று நுகர்வு கலாச்சார மனம் எதிர்பார்க்கத்தான் செய்யும்... வாழ்க்கை நெறிமுறைகளையும் அதைப் போல எடுத்துக் கொள்ள முடியுமா..? என்பது தான் மிகப் பெரிய கேள்வி... நாம் எல்லோருமே நல்ல குணங்களோடு தான் வாழ ஆசைப்படுகிறோம்... அப்படி வாழ இயலாத போது அல்லது முடியாத போது, ஏதேனும் சலுகை கிடைக்குமா என்று எதிர்பார்க்கிறோம்... வாழ்வைக் கெடுத்தும் கொள்கிறோம்...

ஹேஹே...! ஹேஹே...! வாழ்க்கையின் எந்த நெறிமுறைகளுமே படிப்பதற்கும், அடுத்தவர்க்கு உபதேசிப்பதற்கும் அல்லது அடுத்தவர் உபதேசத்தைக் கேட்பதற்கும் நன்றாகத் தான் இருக்கும்... ஆனால், நடைமுறை வாழ்க்கையில் அதைக் கடைப்பிடிக்கும் போது, வசதியாக அதை மறந்து விடுவது தானே நமது வாடிக்கை...? இதிலென்ன வேடிக்கை...? கொல்லும் பாம்பின் கொடும் விஷத்தை, சொல்லில் கொடுக்கத் தெரிந்து கொண்டான்... குள்ளநரி போல் தந்திரத்தால், குடியைக் கெடுக்கப் புரிந்து கொண்டான்... வெள்ளிப் பணத்தால் மற்றவரை, விலைக்கு வாங்கத் தெரிந்து கொண்டான்...² மனிதனாக வாழ மட்டும் மனிதனுக்குத் தெரியவில்லை ஹோ... (படம் : அழகு நிலா)

இப்போது சிறப்பான மனிதரைப் பற்றித் தெரிந்து கொள்வோம் :

---

வடலூர் வள்ளல் இராமலிங்க சுவாமிகளை எல்லோருக்கும் தெரியும்... உயிர்களிடத்தில் இரக்கம் காட்டும் ஜீவகாருண்ய ஒழுக்கத்தைத் தனது எழுத்தாலும், சொல்லாலும், செயலாலும் நடைமுறைப்படுத்தி போதனை செய்தவர்... அவர் வடலூரின் வாழ்ந்த காலத்தில், ஒரு நாள் மாலை 6 மணிக்கு, ஜீவகாருண்ய ஒழுக்கம் பற்றிச் சொற்பொழிவு நடப்பதாக ஏற்பாடு... வள்ளலாரின் அன்பர் ஒருவர் அருகிலுள்ள சிதம்பரத்திலிருந்து, வண்டி மாடு பூட்டி வடலூருக்கு வந்தார்... வள்ளலார் வருவதற்கு 10 நிமிடங்கள் தாமதமாகி விட்டது... சொற்பொழிவாற்ற உள்ளே வந்த வள்ளலார் அன்பரிடம், "என்ன தாமதமாகி விட்டதா..?" என்று கேட்டார்... " ஆமாம் சுவாமி, கொஞ்சம் தாமதமாகி விட்டது... இத்தனைக்கும் வண்டி மாட்டை விரட்டி விரட்ரென்று விரட்டினேன்" என்றார்... வள்ளலார் தனது சொற்பொழிவை அப்படியே நிறுத்தி விட்டு, "அன்பரே, முதலில் நீங்கள் வந்த வண்டி மாட்டைக் கொஞ்சம் காண்பியுங்கள்" என்றார்... இருவரும் சென்று வாயில் நுரை தள்ள, மூச்சு வாங்க படுத்திருந்த மாட்டைப் பார்த்தனர்... வள்ளலார் உள்ளம் பதைக்கச் சொன்னார், "அன்பரே, நீங்கள் இங்கு விரைந்து வந்திருப்பது எதற்காக...? நான் ஜீவகாருண்ய ஒழுக்கம் பற்றிப் பேசவிருக்கும் கருத்துக்களைக் கேட்பதற்காக; ஆனால் அதற்காகப் பாவம் ஒரு வாயில்லா ஜீவனை வதைத்து இங்கே வந்திருக்கிறீர்கள், உயிர்களிடத்தில் அன்பும் இரக்கமும் காட்ட வேண்டுமென்று நான் பேசி நீங்கள் கேட்டு என்ன பயன் விளையப் போகிறது...? வாருங்கள் நாம் இருவரும் சேர்ந்து இந்த வாயில்லா ஜீவனின் உடல் வருத்தத்தைப் போக்கி கவனிப்போம்...!"

---

நண்பர்களே... கேட்பவர்கள் அல்லது படிப்பவர்கள் அதன் கருத்தை உள்வாங்கிக் கொள்ளாதவரை, சொற்பொழிவு அல்லது புத்தகங்களில் சுவையும், உவமையும், கதையும், சுவாரஸ்யமும், தகவல்களும், இருந்து பயனில்லை...அதே வேளை படித்ததை / கேட்டதைப் பிறர் உணர்ந்து கொள்ளும் வகையில் , பகிர்ந்து கொண்டால், விளக்கிச் சொல்லும் திறமை பெற்றால், மேலும் சிறப்பு... அது தான் சிறப்பு...! அப்படியில்லையென்றால் , கொத்தாக மலர்ந்திருந்தாலும் மணம் கமழாத மலரைப் போன்றவர்கள்...

இணரூழ்த்தும் நாறா மலரனையர் கற்றது
உணர விரித்துரையா தார். (குறள் எண் 650)

அதே சமயம் அவர்களின் உள்வாங்கிய எண்ணங்களை அடுத்தவர்களைக் காயப்படுத்தும் பேச்சிலும், மமதையான எழுத்திலும் தெரிந்து கொள்ளலாம்...! பல அனுபவங்களால் வலியை உணர்ந்த மனது அடுத்தவர்களைக் காயப்படுத்தவும் நினைக்காது... நெஞ்சில் அருளும் அன்பும் இல்லாத கல் போன்ற மனதில், எவ்வளவு தான் நற்குண விதைகளை விதைத்தாலும், அவை முளைக்கப் போவதில்லை... முதலில் மனத்தை இளகிய வயலாக மாற்றினால், இடுகிற அன்பு விதைகள் எல்லாம் சிறப்பான விளைச்சலாய் மாறி, இந்த உலகையே உன்னதப்படுத்தும்...!

படித்ததினால் அறிவு பெற்றோர் ஆயிரம் உண்டு... பாடம் படிக்காத மேதைகளும் பாரினில் உண்டு...!



⟪ © படிக்காத மேதை ✍ கண்ணதாசன் ♫ K.V.மகாதேவன் 🎤 M.S.ராஜேஸ்வரி @ 1960 ⟫
இதோ பதிவின் முதல் பாட்டிற்குப் பதில் : இனி வருங்காலத்தில் மழை அரிது; மரம் அரிது; காகிதமும் அரிது...! அதனால் அச்சுக்கலை என்பதே இருக்கப் போவதில்லை... எல்லாம் இனி மின்நூல்கள் தான்...

நண்பர்களே... எத்தனையோ சிறந்த படைப்பாளிகள் தங்களின் படைப்புகளைப் புத்தக வடிவில் காண வேண்டும் என்கிற எண்ணம் இருக்கும்... பொருளாதார சிக்கல்கள் உட்படப் பல இருந்தாலும், முக்கியமாக எதிர்பார்ப்பு... அந்த எதிர்பார்ப்பு என்னவென்று உங்களின் சிந்தனைக்கே விட்டுவிடுகிறேன்... ஒரு அங்கீகாரம், சிறிய பாராட்டு - இது தான் முடிவான எதிர்பார்ப்பு... இதை விடப் பதிப்பகத்தாரின் நிலை சொல்லி மாளாது... புத்தக விற்பனை மூலம் சாதனை படைத்திருந்தாலும், கிட்டத்தட்ட உலகம் முழுவதும் 5000 பேர்களுக்கு மேல் ஒரு கட்டுரை பதிவிறக்கம் செய்து வாசிக்கப்பட்டது என்றால் நம்ப முடிகிறதா...? 5000 பேர்கள் என்பது இன்றைய நிலவரப்படி... நாளுக்கு நாள் அதிகமாகிக் கொண்டே போகும்... மனது முழுவதும் சந்தோசம் - அதுவும் திருப்தியாக...! யாருக்கு...? "டாலர் நகரம் புகழ்" அண்ணன் ஜோதிஜி (தேவியர் இல்லம்) அவர்களின் மின் நூலை வாசிக்கச் சொடுக்கவும் ஈழம் : வந்தார்கள் வென்றார்கள்

இலவச மின் நூல் திட்டம் - Link 1 : திரு. சீனிவாசன்

உங்களின் ஒரு வருடத்திலுள்ள 100 பதிவுகளை விருப்ப வரிசைப்படி மாற்றி மின் நூலாக்கலாம் - Link 2 : Blog to Book

மனிதன் மனிதன் எவன் தான் மனிதன்...? வாழும் போதும் செத்துச் செத்துச்செத்துப் பிழைப்பவன் மனிதனா...? வாழ்ந்த பின்னும் பெயரை நாட்டி நிலைப்பவன் மனிதனா...? பிறருக்காகக் கண்ணீரும், பிறருக்காகச் செந்நீரும், சிந்தும் மனிதன் எவனோ, அவனே மனிதன் மனிதன் மனிதன்...!!!

---

நெய்யா இருந்தா இப்படி ஊத்துவியா...? அறிய இங்கே சொடுக்கித் தொடரலாம். அதற்கு முன் இந்தப் பதிவைப் பற்றி தங்களின் கருத்து என்ன...?

---

புதிய பதிவுகளை பெறுதல் :

---

தொடர்புடைய எண்ணங்களின் வண்ணங்கள் சில :

முகநூல் மூலம் கருத்துக்களை பகிர :