சிறந்த பத்து (நண்பர்கள்)

வணக்கம் நண்பர்களே, "உங்கள் நண்பர்களைச் சொல்லுங்கள்... நான் உங்களைப் பற்றிச் சொல்கிறேன்" என்று சொல்வார்கள்... இன்று எனது வாழ்க்கையில் சந்தித்த நண்பர்களின் சிறப்புகளை, அவர்களே தன்னிடம் பிடித்தவற்றை உங்களுக்குச் சொல்கிறார்கள்...!



நண்பர் 01 : "சிறந்த ஒழுக்கமுடையவராய் வாழ்தல்"

நண்பர் 02 : "தம் செயலால் தம்மைப் பிறர் போற்றும்படி வாழ்தல்"

நண்பர் 04 : "வாய்மையுடையவராய் வாழ்தல்"

நண்பர் 05 : "நோயின்றி வாழ்தல்"

நண்பர் 06 : "பழிபாவங்களைச் செய்ய நாணுதல்"

நண்பர் 07 : "சிறந்த கல்வி உடையவராய் இருத்தல்"

நண்பர் 08 : "கற்றறிந்த பெரியோரை வழிபாடு செய்பவராய் இருத்தல்"

நண்பர் 09 : "தம் பகைவரை அழித்தலினும் தம்மை உயர்த்திக் கொள்ளுதல்"

நண்பர் 10 : "இளமையிலும் ஈட்டிய செல்வம் முதுமையிலும் குறையாதிருக்கும் படி வாழ்தல்"

---

" சிறந்த பத்து "

(சிறந்ததெனக் கூறப்படும் பத்துப் பொருளைத் தன்னகத்தே கொண்டிருப்பது சிறந்த பத்து)

ஆர்கலி உலகத்து மக்கட் கெல்லாம்
ஓதலில் சிறந்தன்று ஒழுக்கம் உடைமை. (01)

காதலில் சிறந்தன்று கண்ணஞ்சப் படுதல். (02)

மேதையில் சிறந்தன்று கற்றது மறவாமை. (03)

வண்மையில் சிறந்தன்று வாய்மை யுடைமை. (04)

இளமையில் சிறந்தன்று மெய்பிணி இன்மை. (05)

நலனுடை மையின் நாணுச் சிறந்தன்று. (06)

குலனுடை மையின் கற்புச் சிறந்தன்று. (07)

கற்றலின் கற்றாரை வழிபடுதல் சிறந்தன்று. (08)

செற்றாரைச் செறுத்தலில் தற்செய்கை சிறந்தன்று. (09)

முன்பெரு கலின்பின் சிறுகாமை சிறந்தன்று. (10)

---

நண்பர்களே... உங்களிடமே இருக்கும் நண்பனைக் கண்டு கொண்டீர்களா...? இல்லை, இந்த நண்பர்களைச் சந்தித்த ஞாபகம் வருகிறதா...? "இந்தப் பதிவு சிறந்த பத்து பதிவுகளாக இருக்கும்" என்று நினைப்பது தெரிகிறது... அதான் பக்கத்திலுள்ள, முன்னணி பிடித்த பத்து பதிவுகள் (Popular Posts Widget)-இல் உள்ளதே. அப்பப்போ மாறுமே. நாம கூட கொஞ்சம் மாறுவோம் என்று தான் !

திருவள்ளுவர் "நீ நிறையக் குறள்களைப் பதிவுகளில் நகலெடுத்து ஒட்டுகிறாய் (copy and paste) என்று சொல்லி விட்டாரா...! அதனால், திருக்குறளுக்குப் பதில் இந்த முறை எடுத்துக் கொண்டது, மதுரைக் கூடலூர்கிழார் அவர்களின் முதுமொழிக்காஞ்சியில், எனக்குப் பிடித்த முதல் (1) சிறந்த பத்து...

[ மற்றவை : (2) அறிவுப் பத்து (3) பழியாப் பத்து (4) துவ்வாப் பத்து (5) அல்ல பத்து (6) இல்லைப் பத்து (7) பொய்ப் பத்து (8) எளிய பத்து (9) நல்கூர்ந்த பத்து (10) தண்டாப் பத்து ] ஐயன் கோபித்துக் கொண்டாலும் பரவாயில்லை... ஒரே ஒரு குறள் : (391)

கற்கக் கசடறக் கற்பவை கற்றபின்
நிற்க அதற்குத் தக.

மனசாட்சி : இந்தக் குறளின் ஒவ்வொரு சொல்லுக்கும் நிறைய எழுதலாம்... சரி... மேலே மூன்றாவது விளக்கம் எங்கே...? மறக்கக் கூடாதே...!

நன்றி மனசாட்சி... அறிவில் மேதையாய் இருப்பதைவிடக் கற்ற கல்வி எதுவானாலும் மறக்காமல் இருப்பது மிகவும் சிறப்புடையது...(03)

---

இந்த நண்பர்கள் வரம் ஏதோ கேட்கிறார்கள் இங்கே சொடுக்கித் தொடர்வதற்கு முன் இந்தப் பதிவைப் பற்றி நண்பர்களே... தங்களின் கருத்து என்ன...?

---

புதிய பதிவுகளை பெறுதல் :

---

தொடர்புடைய எண்ணங்களின் வண்ணங்கள் சில :

முகநூல் மூலம் கருத்துக்களை பகிர :