நீங்க மரமாகப் போறீங்க...

"வாங்க... வாங்க... தனபாலன்...! பார்த்து ரொம்ப நாளாச்சி"

"வணக்கம் நல்லமுத்து அவர்களே, சௌக்கியமா?"

"சௌக்கியம் தனபால். எப்படி வியாபாரம் எல்லாம் எப்படி இருக்கு...?"

"நல்லா இருக்கு...! என்ன தோஸ்து, விவசாயத்திலே இறங்கிடிங்க...? தப்பா நினைச்சிக்காதீங்க, எவ்வளவு நிறையப் படிச்சிருக்கிறீங்க, உங்களுக்குக் கிடைக்காத வேலையா...?"

"முதல்லே நம்ம தோட்டத்து எளனிய குடி... தனபால், நானும் படித்து முடித்தவுடன் வேலை தேடினேன். நினைத்த வேலை கிடைக்கலே. அதனாலே சும்மா இருக்க முடியுமா...? அப்பாவோட ஒரு ஏக்கர் நிலம் இருந்திச்சி. சின்னதா ஆரம்பிச்சேன். இப்ப...? வா, பக்கத்திலே தான் தோட்டம்... போகலாம்"

"தோஸ்து... இந்த மாதிரி பச்சைப் பசேலென்று வயல்வெளியைப் பார்த்தாலே மனசு முழுக்கச் சந்தோசமா இருக்கு...!"


"பாரு... இது தான் நம்ம தோட்டம். ஒரு பக்கம் காய்கறிகளைப் போடறேன். இந்தப் பக்கம் தென்னந்தோப்பு, அந்தப் பக்கம் வாழை... இப்ப தான் வளர்ந்துக்கிட்டிருக்கு... அப்பா கொடுத்த ஒரு ஏக்கரை ஐந்து ஏக்கரா ஆக்கியிருக்கேன்... இதைக் கவனிக்கவே நேரம் போதலே... வா... இன்னும் கொஞ்சம் உள்ளே போகலாம்... இது தான் என் Office...! கயத்துக் கட்டிலே உட்காரு..."

"அருமை...! அமைதியான இடம்... கலப்படமில்லாத காற்று... விதவிதமா பறவைகளின் சத்தம்... சொர்க்கம் நண்பா...!"

"இங்கேயே இரு, எனக்குக் கொஞ்சம் வெளியிலே வேலையிருக்கு. பேங்க் வரைக்கும் போயிட்டு வந்துறேன். இதெல்லாம் நம்ம தோட்டத்துப் பழங்கள், சாப்பிடு...! உதவிக்குத் தோட்டத்து நண்பர்களைக் கூப்பிட்டுக்கோ. அதோ அந்தக் கேட்டை தாண்டி உள்ளே போய்ப் பாரு... நிறைய மரம் வளர்த்து வைச்சிருக்கேன். எல்லா மரங்களும் என்னுடைய உயிர் நண்பர்கள்... சரி வரட்டுமா?"
ooo - O - ooo

1. அரசமரம் நான்...! என்னுடைய காற்று கர்ப்பத்தையே பலப்படுத்தும் அளவிற்குச் சக்தி வாய்ந்தது... என்னுடைய குச்சிகளை எரிப்பதால் மூச்சுத் திணறல், சளித் தொந்தரவுகளை நீக்குவேன். சோர்வு, களைப்பு, நரம்புத் தளர்ச்சி உள்ளவர்களுக்கும் உதவுவேன்... இன்னும் பல...

2. ஆலமரம் நான்...! இந்தியாவின் தேசிய மரம்...! பல நூறு காலம் வாழ்வேன்... மழை, வறட்சியால் பாதிக்கப் பட மாட்டேன்... ஏனென்றால் என் விழுதுகள் என்னைத் தாங்கிக் கொள்ளும்... என் இலை, பழம், பூ, விழுது, பால் அனைத்தும் மருத்துவக் குணம் வாய்ந்தவை... என் இலைகளை அரைத்து உடலில் உள்ள கட்டிகளின் மேலே பூசிக்கொண்டால் கரைத்து விடுவேன்... எனது பட்டையை இடித்து வாயில் ஊற்றிக் கொப்பளித்துக் கொண்டால், வாய்ப்புண், வாய் நாற்றம், நா வெடிப்பு, ஈற்றுப்புண் இவற்றை நீக்குவேன்... ஆலும் வேலும் பல்லுக்குறுதி...! நான்கும் இரண்டும் சொல்லுக்குறுதி...! இன்னும் பல...

3. மாமரம் நான்...! கனிகளில் ராஜ கனியும், முக்கனிகளில் முதல் கனியும் நான் தான். எனது இலைகள் ஒரு கிருமி நாசினி என்பதால், என்னை மாவிலைத் தோரணமாக வீட்டு வாசலில் கட்டுகிறார்கள்... மலச் சிக்கலை போக்குவேன்... ஜீரண சக்தியை அதிகரிப்பேன்... வாய்ப்புண், வயிற்றுப் புண்ணையும் ஆற்றுவேன்... என் இலை, பூ, பிஞ்சுக் காய், பழம், வித்து, மரப்பட்டை, வேர், பிசின் அனைத்தும் மருத்துவக் குணம் வாய்ந்தவை... இன்னும் பல...

4. பலாமரம் நான்...! முக்கனிகளில் இரண்டாவது நான்... என்னை நினைத்தாலே நாவில் நீர் சுரக்கும்... இரத்தத்தை விருத்தி செய்வேன்... உடலுக்கு ஊக்கமளிப்பேன்... நரம்புகளுக்குப் புத்துணர்வு அளிப்பேன்... வாய்ப்புண், குடற்புண், வயிற்றுப் புண்ணையும் ஆற்றுவேன்... வாயுத் தொல்லைகளை நீக்குவேன்... எனது பழத்தை அதிகம் சாப்பிட்டு வயிறு பொருமலால் அவதிப் படுபவர்களுக்கு, எனது கொட்டையை மென்று சாற்றை மட்டும் விழுங்கினால், உடனே வயிற்றுப் பொருமலை நீக்குவேன்... இன்னும் பல...

5. வாழை மரம் நான்...! முக்கனிகளில் மூன்றாவது நான்... தாவர வகை என்றாலும் என்னை வாழை மரம் என்றே சொல்கிறார்கள்... உலகில் மிகப் பெரிய தாவரம் நான் தான்...! எல்லாவற்றுக்கும் பல மருத்துவக் குணங்கள் உண்டு... செவ்வாழை விளையாட்டு வீரர்களுக்கும் பூவன் வாழை குழந்தைகளுக்கும், இவ்வாறு பல வாழைகள் மூலம் பலவிதமாக உதவுகிறேன்... எனது வாழைப் பூ அவியல், நீரழிவு என்கிற உடற்குறை உள்ளவர்கள் சாப்பிட்டு நலமாக உள்ளார்கள்... எனது தண்டை இடித்துச் சாறெடுத்துக் காலையில் வெறும் வயிற்றில் குடித்து வந்தால் சிறுநீரகக் கல், சிறுநீர்ப் பாதையில் கிருமித் தொற்று, ஆகியவற்றை மறையச் செய்வேன்... சுருக்கமாக எனது எல்லா உறுப்புகளும் உண்பதற்கும், எல்லா வகை மருத்துவத்திற்கும் பயன்படுகிறது...

6. பனை மரம் நான்...! அன்றைய காலத்தில் ஓலைச் சுவடிக்கு உதவினேன்... எனது பனங்கிழங்கு ஆண்மைக்கு அருமருந்தாக இருக்கிறது... வெட்டைச் சூடு தணிய, வெண்குஷ்டம் விலக, காசநோய் விலக, சரும நோய்கள் விலக, போகம் பெருக, உடல் பருக்க, உடல் வலுவடைய, இன்னும் பல வழிகளில் உதவுவேன்... இன்னும் பல...

7. சந்தன மரம் நான்...! இந்திய மரங்களில் மிகவும் விலையுயர்ந்த மரம் நான்... சந்தனம் தயாரிக்க உதவுகிறேன்... உடல் சருமத்திற்குக் குளிர்ச்சி அளிப்பேன்... உடல் வெப்பம், சிறுநீர் எரிச்சல், சிறு நீர்க்கட்டுக் குணமாக, உடல் இளைக்க உதவுவேன்... பல மருந்துகள் தயாரிக்கவும், வாசனைத் திரவியங்கள் தயாரிக்கவும் உதவுவேன்... இன்னும் பல...

8. தேக்கு மரம் நான்...! நிறையத் தண்ணீர் குடித்தால் நன்றாக வளருவேன்... நீண்ட காலத்திற்கு நன்மை அளிப்பேன்... என்னைப் பொறுமையாக வளர்த்தவர்கள் இன்று குரோர்பதிகளாக உள்ளார்கள்... மேசையாகவும், நாற்காலியாகவும், இன்னும் பல விதங்களில் உதவுவேன்... அவ்வளவு எளிதில் உடைய மாட்டேன்... இன்னும் பல...

9. முருங்கை மரம் நான்...! என்னைக் கற்பகத் தரு என்று சொல்வார்கள்... உடல் வலுவுடன் இருக்க, இருப்புச் சத்து அதிகரிக்க, உடல் சூட்டைத் தணிக்க, பித்தத்தைக் குறைக்க, இளநரையைப் போக்க, மூல நோயைப் போக்க, ஆண்மையை அதிகரிக்க... இன்னும் பலப் பல...

10. புங்கை மரம் நான்...! வெயில் காலத்தில் நல்ல குளிர்ச்சியான நிழலைத் தருவேன்... எனது பூக்கள் மருந்தாகப் பயன்படும்... எனது விதைகள் மருந்தாகவும், பயோ டீசலாகவும் பயன்படும். எனது இலை, பூ, காய், விதை, வேர், பால், நெய் ஆகியவை மருந்தாகப் பயன்படுகிறது... இன்னும் பல...




ooo - O - ooo
"நண்பா... நண்பா.. என்ன தூக்கமா...? தோட்டத்தைச் சுத்திப் பார்த்த அலுப்போ...?"

"அது மட்டும் இல்லே நண்பா, நிறையப் பழம் சாப்பிட்டேன்... அருமையான காற்று! கயத்துக் கட்டிலே அப்படியே படுத்திட்டேன்... இதிலே கனவு வேறே...! நாளைக்கு என் வீட்டிற்கு வரணும்... உங்களை வைத்து ஒரு கட்டுரை எழுதப் போறேன்... வரட்டுமா?"

"அதெல்லாம் வேண்டாம்பா... நான் என்ன அவ்வளவு பெரிய ஆளா?"

"நீங்க வாங்க தோஸ்து... அப்புறம் பேசிக்கலாம்"

ooo - O - ooo
"வாங்க நல்லமுத்து... இன்னும் உங்களைப் பற்றித் தான் எழுத வேண்டியிருக்கு, இதோ :-"

"என் நண்பரைப் பற்றி... நிறையப் படித்தவர் என்பதை விட நன்றாகப் படித்தவர். கூடப் பிறந்தவர்கள் பிற தொழில்கள் செய்தாலும், 'இந்தத் தொழிலை நான் செய்வேன்' என்று, லாப நோக்கத்துடன் செய்யாமல், செய்யும் தொழிலைச் சிறப்பாகச் செய்யும் அன்பு நண்பரின் தொழில் விவசாயம்...! உழவே தலை...! அருமையான தோட்டங்கள், பலவித மரங்கள், கலப்படமில்லாத காற்று, எப்போதும் சிரித்த முகத்துடன் அன்பு நண்பர்..... சுருக்கமாக 'உன்னால் முடியும் தம்பி' படத்தில் மரம், செடி, கொடிகளை நேசிக்கும் அந்தப் பாசமான முதியவரைப் போல. அவர் பெயருக்கேற்ற 'நல்ல முத்து' தான்"

"தனபால்...! என்னைக் கடைசியில் கிழவன் ஆக்கிட்டியே! ஹா... ஹா... மேலே உள்ளதில் ஐந்து வகை மரம் தான் என் தோட்டத்தில் உள்ளது. என் தோட்டத்தில் உள்ள வேப்ப மரம், புளியமரம், கொய்யா மரம், தென்னை மரம், நாவல் மரம், மாதுளை மரம், பப்பாளி மரம், மருதாணி மரம்... இன்னும் பலவற்றை எழுதவில்லையே?... அது சரி.. அது என்ன தலைப்பு...? "நீங்க மரமாகப் போறீங்க"-ன்னு...?"

"நீங்கள் மரம் மீது உள்ள பற்றைப் பார்க்கும் போது அந்தப் படத்தின் முதியவர் பாத்திரம் நினைவிற்கு வந்தது. அப்புறம் மரங்களைப் பற்றி எழுத ஆரம்பித்தால் முடியுமா தோஸ்து...? அதனால் பத்து மரங்களைப் பற்றி மட்டும் எழுதினேன்... மற்ற மரங்களைப் பற்றி விரிவாக உங்களிடம் கேட்டுக் கொள்கிறேன்... சரி, இப்ப தலைப்பிற்கு வருவோம். இது ஒரு சுய பரிசோதனை... நாளை முதல் 'நீங்க மரமாகப் போறீங்க' என்று வைத்துக் கொண்டால் 'என்ன மரம் ஆவீங்க?' சொல்லுங்க நல்லமுத்து"

"ஓ...! இது தான் நீ கண்ட கனவா...? ம்... நான் எப்போதும் நல்லவனாக, நல்ல மனிதனாக இருக்க ஆண்டவனை வேண்டுகிறேன்..."

"தோஸ்து... இந்தக் கதை எல்லாம் விடப் பாடாது... இது ஒரு சிந்தனை தானே...?! 25 வருடமா விவசாயம் செய்கிற, பல மரங்களை அறிந்த நீங்களே இப்படிச் சொன்னால் எப்பட...? சுருக்கமா ஒரு வார்த்தையில் சொல்லுங்க நண்பா...!"

"மேலே நம்பர் இரண்டு... ஆலமரம்...!"

"நான் நினைத்தேன்... உங்கள் குடும்பத்தை நீங்கள் தானே தாங்கிக் கொள்கிறீர்கள்... உங்களை என் நண்பர் என்று சொல்லிக் கொள்வதில் நான் மிகவும் பெருமைப் படுகிறேன்...!"

"அதெல்லாம் சரி. நீ என்ன மரம் ஆவே?"



⟪ © குலவிளக்கு ✍ கண்ணதாசன் ♫ K.V.மகாதேவன் 🎤 P.சுசீலா @ 1969 ⟫
"திரைப்படத்தில் வராத பாடலை கேட்டாயா...? "பனை மரம் - தென்னை மரம் - வாழை மரம் - மக்கள் பழகும் பழக்கத்துக்கு மூணு மரம்...!" பாடலில் மூன்றாவது மரம், பதிவில் ஐந்து...! நம்ம நண்பர்களிடம் கேட்டு விடலாம்..."

"நண்பர்களே!
நீங்க மரமாக போறீங்க...
என்ன மரம் ஆவீங்க...?

"என்ன மரம் ஆகலாம் ?" என்று முடிவு செய்து விட்டீர்களா ? அப்படியே உங்க மந்திரச் சொல்லையும் இங்கே சொடுக்கி சொல்லிடுங்க... அதற்கு முன் இந்தப் பதிவைப் பற்றித் தங்களின் கருத்து என்ன...?

---

புதிய பதிவுகளை பெறுதல் :

---

தொடர்புடைய எண்ணங்களின் வண்ணங்கள் சில :

முகநூல் மூலம் கருத்துக்களை பகிர :